ጃንዋሪ 19፣ 2020
በዓመቱ መደበኛ ጊዜ ሁለተኛ እሑድ፣ ዓመት ሀ
የዛሬ ንባባት
መጥምቁ ዮሐንስ ኢየሱስ ወደ እርሱ ሲመጣ አይቶ እንዲህ አለ፦ «እነሆ፣ የዓለምን ኃጢአት የሚያስወግድ የእግዚአብሔር በግ። ‘ከእኔ በኋላ አንድ ሰው ይመጣል፤ ከእኔ በፊት ስለነበረ፣ ከእኔ ይበልጣል’ ያልሁት እርሱ ነው።» ዮሐንስ 1:29-30
እንዴት ያስደንቃል! ቅዱስ መጥምቁ ዮሐንስ ስለ ኢየሱስ የነበረው ማስተዋል በእርግጥ መንፈስን የሚያነቃቃ፣ ምሥጢራዊና አስገራሚ ነው። ኢየሱስ ወደ እርሱ ሲመጣ ያያል፤ ወዲያውም ስለ ኢየሱስ የተገለጡለትን ሦስት እውነቶች ይናገራል፦ 1) ኢየሱስ የእግዚአብሔር በግ ነው፤ 2) ኢየሱስ ከዮሐንስ ይበልጣል፤ 3) ኢየሱስ ከዮሐንስ በፊት ነበረ።
ዮሐንስ ይህን ሁሉ እንዴት ሊያውቅ ቻለ? ስለ ኢየሱስ የተናገራቸው እነዚህ ጥልቅ ቃላት ምንጫቸው ምን ነበር? ምናልባት ዮሐንስ በዚያን ጊዜ የነበሩትን ቅዱሳት መጻሕፍት አጥንቶ፣ የቀድሞ ነቢያት ስለሚመጣው መሲሕ የተናገሯቸውን ብዙ ቃላት ያውቅ ነበር። መዝሙራትንና የጥበብ መጻሕፍትንም ያውቅ ነበር። ነገር ግን ከሁሉ አስቀድሞና ከሁሉ በላይ፣ ዮሐንስ ያወቀውን ያወቀው በእምነት ስጦታ ነበር። እግዚአብሔር የሰጠው እውነተኛ መንፈሳዊ ማስተዋል ነበረው።
ይህ እውነታ የዮሐንስን ታላቅነትና የእምነቱን ጥልቀት ብቻ ሳይሆን፣ በሕይወታችን ልንደርስበት መጣር ያለብንን ምሳሌም ያሳየናል። እግዚአብሔር በሚሰጠን እውነተኛ መንፈሳዊ ማስተዋል ተመርተን በየዕለቱ ለመጓዝ መጣር አለብን።
ይህ ማለት በየቀኑ በግልጽ በሚታይ ነቢያዊና ምሥጢራዊ ሁኔታ መኖር አለብን ማለት አይደለም። ከሌሎች የላቀ ዕውቀት እንዲኖረን መጠበቅ አለብን ማለትም አይደለም። ይልቁንም የሰው አእምሮ በራሱ ጥረት ብቻ ሊያገኘው ከሚችለው በላይ የሆነ ስለ ሕይወት ዕውቀትና ግንዛቤ እንድናገኝ፣ የመንፈስ ቅዱስን ስጦታዎች ለመቀበል ልባችንን መክፈት አለብን።
ዮሐንስ በጥበብ፣ በማስተዋል፣ በምክር፣ በዕውቀት፣ በጽናት፣ በአክብሮትና በመደነቅ የተሞላ መሆኑ ግልጽ ነበር። እነዚህ የመንፈስ ቅዱስ ስጦታዎች በእግዚአብሔር ጸጋ የሚደገፍ ሕይወት ለመኖር ችሎታ ሰጡት። እግዚአብሔር ብቻ ሊገልጣቸው የሚችላቸውን ነገሮች ዮሐንስ ያውቅና ያስተውል ነበር። እግዚአብሔር ብቻ ሊያነሳሳው በሚችል ጥልቅ ፍቅርና ፈቃዱን በማስገዛት፣ ኢየሱስን ይወድና ያከብር ነበር። እጅግ ግልጽ የሆነው፣ የዮሐንስ ቅድስና ከእግዚአብሔር ጋር ካለው ኅብረት የተገኘ ፍሬ መሆኑ ነው።
ዛሬ ዮሐንስ ስለ ኢየሱስ በተናገረው፣ ልዩ ጥልቅ ማስተዋል በሚያሳየው በዚህ ቃል ላይ አሰላስል። ዮሐንስ ያወቀውን ሊያውቅ የቻለው፣ እግዚአብሔር በሕይወቱ ውስጥ ሕያው ሆኖ ስለሚመራውና እነዚህን እውነቶች ስለሚገልጥለት ብቻ ነበር። ዛሬ የዮሐንስን ጥልቅ እምነት ለመምሰል ራስህን አስገዛ፤ እግዚአብሔር ሊነግርህ የሚፈልገውን ሁሉ ለመቀበልም ልብህን ክፈት።
ውድ ጌታዬ ኢየሱስ ሆይ፣ አንተን እንዳውቅና በአንተ እንዳምን ማስተዋልንና ጥበብን ስጠኝ። ማን እንደሆንህ የሚገልጠውን ታላቅና ግርማ ሞገስ የተሞላ ምሥጢር በየዕለቱ ከዕለቱ ይበልጥ በሙላት እንድገነዘብ እርዳኝ። ጌታዬ ሆይ፣ እወድሃለሁ፤ ይበልጥ እንዳውቅህና እንድወድህም እጸልያለሁ። ኢየሱስ ሆይ፣ በአንተ እታመናለሁ።
