ማርች 24፣ 2020
በዐቢይ ጾም አራተኛ ሳምንት ማክሰኞ
የዛሬ ንባባት
ኢየሱስም፣ «ተነሣ፣ ምንጣፍህን አንሥተህ ሂድ» አለው። ሰውየውም ወዲያውኑ ዳነ፤ ምንጣፉንም አንሥቶ ሄደ። ዮሐንስ 5:8–9
ከላይ ባለው ንባብ ውስጥ ካሉት ግልጽ ምሳሌያዊ ትርጉሞች አንዱን እንመልከት። ኢየሱስ የፈወሰው ሰው መራመድም ሆነ ራሱን መንከባከብ የማይችል ሽባ ነበር። ደግነትና ትኩረት ተስፋ እያደረገ በመጠመቂያው አጠገብ ተቀምጦ ሳለ፣ ሌሎች ችላ ብለውት ነበር። ኢየሱስ ያየዋል፣ ሙሉ ትኩረቱንም ይሰጠዋል። ከአጭር ውይይት በኋላ ኢየሱስ ይፈውሰዋል፤ ተነሥቶ እንዲራመድም ይነግረዋል።
አንዱ ግልጽ ምሳሌያዊ መልእክት፣ የዚህ ሰው አካላዊ ሽባነት ኃጢአት በሕይወታችን የሚያስከትለውን ውጤት የሚያሳይ ምስል መሆኑ ነው። ኃጢአት ስንሠራ ራሳችንን «ሽባ» እናደርጋለን። ኃጢአት በሕይወታችን ላይ ከባድ መዘዞች አሉት፤ ከሁሉ ግልጽ የሆነው መዘዝም ተነሥተን በእግዚአብሔር መንገዶች መሄድ እንዳንችል ማድረጉ ነው። በተለይም ከባድ ኃጢአት ለመውደድና በእውነተኛ ነፃነት ለመኖር አቅም ያሳጣናል። ተጠምደን፣ የራሳችንን መንፈሳዊ ሕይወትም ሆነ ሌሎችን በምንም መንገድ መንከባከብ እንዳንችል ያደርገናል። የኃጢአትን መዘዞች ማየት አስፈላጊ ነው። ጥቃቅን ኃጢአቶች እንኳን ችሎታችንን ይገድባሉ፣ ኃይላችንን ያሟጥጣሉ፣ በተለያየ መጠንም በመንፈሳዊ ሕይወታችን ሽባ ያደርጉናል።
ይህን ታውቀዋለህ፣ ለአንተም አዲስ መገለጥ አይደለም ብዬ ተስፋ አደርጋለሁ። ሆኖም ለአንተ አዲስ መሆን ያለበት፣ አሁን ያለብህን የኃጢአት በደል በቅንነት ማመን ነው። በዚህ ታሪክ ውስጥ ራስህን ማየት አለብህ። ኢየሱስ ይህን ሰው የፈወሰው ለዚያ ሰው ብቻ ጥቅም እንዲሆን አልነበረም። ከፈወሰው ምክንያቶች አንዱ፣ አንተም የኃጢአትህን መዘዞች ስትቀበል በተሰበርክበት ሁኔታ እንደሚያይህ ለመንገር ነው። እርዳታ እንደሚያስፈልግህ ያያል፣ ወደ አንተም ይመለከታል፣ ተነሥተህ እንድትራመድም ይጠራሃል። በሕይወትህ ውስጥ ፈውስ እንዲያደርግ መፍቀድ ያለውን አስፈላጊነት አታቃልል። መዘዙን በአንተ ላይ የሚያሳርፍ ከሁሉ ትንሽ የሆነ ኃጢአትን እንኳን ለይተህ ለማወቅ ቸል አትበል። ኃጢአትህን ተመልከት፣ ኢየሱስም እንዲያየው ፍቀድለት፣ የፈውስና የነፃነት ቃላትን ሲናገርህም አዳምጠው።
ዛሬ፣ ይህ ሽባ ሰው ከኢየሱስ ጋር ስላደረገው ጥልቅ ተጽዕኖ ያለው ግንኙነት አሰላስል። በዚያ ስፍራ ራስህን አስብ፣ ይህ ፈውስ ለአንተም የሚደረግ መሆኑን እወቅ። በዚህ ዐቢይ ጾም እስካሁን ኑዛዜ ካልተናዘዝክ፣ ሄደህ ተናዘዝ፤ በዚያ ምሥጢርም የኢየሱስን ፈውስ አግኝ። በተለይም በቅንነትና ምንም ሳይሸሸግ ሲደረግ፣ ኑዛዜ ወደሚጠብቅህ ነፃነት የሚያደርስህ መልስ ነው።
ጌታ ሆይ፣ እባክህ ኃጢአቶቼን ይቅር በለኝ። ኃጢአቶቼን ማየትና በእኔ ላይ የሚያስከትሉትን መዘዝ አምኜ መቀበል እፈልጋለሁ። ከእነዚህ ሸክሞች ነፃ ልታወጣኝና ከሥራቸው ልትፈውሳቸው እንደምትፈልግ አውቃለሁ። ጌታ ሆይ፣ በተለይም በዕርቅ ምሥጢር ኃጢአቶቼን ለአንተ እንድናዘዝ ድፍረት ስጠኝ። ኢየሱስ ሆይ፣ በአንተ እታመናለሁ።
40 ቀናት ከመስቀሉ ሥር – ሃያ ሰባተኛ አስተንትኖ – ውርደት – ልብሶቹ ተገፈፉ
የኮሮና ቫይረስ ወረርሽኝን ለመዋጋት የሚቀርቡ ጸሎቶችና ቅዳሴ በመስመር ላይ
