ሜይ 4, 2022
በፋሲካ ዘመን የሦስተኛው ሳምንት ረቡዕ
የዛሬ ንባባት
“ወደ እኔ የሚመጣውን ማንንም አልገፋም።” ዮሐንስ 6:37
ይህ አጭር አረፍተ ነገር ስለ ጌታችን መለኮታዊ ምሕረት ብዙ ይናገራል። በቅድስት ፋውስቲና የእግዚአብሔር ምሕረት የዕለት ማስታወሻ ውስጥ በተደጋጋሚ የሚገኝ አረፍተ ነገር ነው፤ ብዙ ሰዎችም ሊሰሙት የሚያስፈልጋቸው ንግግር ነው።
ይህን መስማት ለምን አስፈላጊ ሆነ? ምክንያቱም ብዙ ጊዜ የመገፋትን ሸክም ተሸክመን ልንኖር እንችላለን። በሕይወታቸው መገፋት የደረሰባቸው፣ በዚህም ምክንያት እንዳይጎዱ በመፍራት በግንኙነት ውስጥ ልባቸውን ለመክፈት የሚፈሩ ብዙ ሰዎች አሉ፤ ይህን ፍርሃታቸውንም ራሳቸው እንኳ ላያስተውሉት ይችላሉ። በግንኙነት ውስጥ አንዴ ከተጎዳህ፣ ከዚያ በኋላ በጥንቃቄ ትራመዳለህ። ይህ ጉዳት ከቤተሰብ አባል፣ ከትዳር አጋር፣ ከጓደኛ ወይም በፍቅር ልንቀርበው ሞክረን ጉዳትና መገፋት ብቻ ካገኘንበት ከማንኛውም ሰው ሊመጣ ይችላል። ይህም ያማል።
የኢየሱስ ቃላት ኢየሱስ የሚታመን መሆኑን እንደገና እንድንተማመን ስለሚረዱን ልዩ ጠቀሜታ አላቸው። ወደ እርሱ መምጣት፣ ልባችንን ለእርሱ መክፈትና ምንም ሳንደብቅ ራሳችንን ሙሉ በሙሉ ለእርሱ ማጋለጥ እንደምንችል፣ እርሱም እጅግ በላቀ ርኅራኄ፣ አክብሮት፣ ደግነትና እንክብካቤ እንደሚቀበለን እውነት ነው። ኢየሱስ እኛ ራሳችንን ከምንንከባከብበት በላይ ይንከባከበናል!
ዛሬ በእነዚህ የኢየሱስ ቃላት ላይ አሰላስል። ደጋግመህም በላቸው። “ወደ እኔ የሚመጣውን ማንንም አልገፋም።” ወደ እርሱ እንድትመጣና ልብህን ሙሉ በሙሉ ለእርሱ እንድትከፍት እንደሚፈልግ እወቅ። ይህን ማድረግህ ለአንተ ያለውን ፍቅር እንዲገልጥልህ ዕድል ይሰጠዋል፤ አንተም ይቻላል ብለህ ከገመትከው በላይ በእርሱ እንድትታመን ያስችልሃል።
በፍቅር የምትቀበለኝ ጌታዬ ሆይ፣ በመከራዬና በመገፋቴ ውስጥ ወደ አንተ መምጣት እፈልጋለሁ። መለኮታዊ ፈዋሽ እንደሆንክና ለነፍሴ መጽናናትን እንደምታመጣ አውቃለሁ። በአንተ እንድታመንና እንድትወደኝ እንድፈቅድልህ እርዳኝ። ኢየሱስ ሆይ፣ በአንተ እታመናለሁ።
ስለ እግዚአብሔር ምሕረት ዕለታዊ ማሰላሰያዎች፦
365 ቀናት ከቅድስት ፋውስቲና ጋር
አማዞን – ባርንስ ኤንድ ኖብል – ጉግል ፕሌይ – አይቱንስ
.jpg){kind=link}