ጁን 13, 2022
በዓመቱ መደበኛ ጊዜ የአሥራ አንደኛው ሳምንት ሰኞ
የዛሬ ንባቦች
የፓዱዋው ቅዱስ አንጦንዮስ፣ ካህንና የቤተ ክርስቲያን መምህር—መታሰቢያ
“እኔ ግን እላችኋለሁ፤ ክፉ የሚያደርግባችሁን ሰው አትቃወሙ። ማንም በቀኝ ጉንጭህ ቢመታህ፣ ሌላውንም አዙርለት።” ማቴዎስ 5:39
ይህ ለመቀበል ከባድ የሆነ ትምህርት ነው!
ኢየሱስ በእርግጥ ይህን ማለቱ ነበርን? ብዙ ጊዜ አንድ ሰው ሲበድለን ወይም ሲጎዳን፣ ይህ የወንጌል ክፍል እኛን እንደማይመለከት ለማሳመን ወዲያውኑ ምክንያቶችን ልንደረድርና ለእኛ አይሠራም ብለን ልናስብ እንችላለን። አዎን፣ ለማመን አስቸጋሪ፣ በሕይወት ለመኖርበት ደግሞ ይበልጥ አስቸጋሪ የሆነ ትምህርት ነው።
“ሌላውን ጉንጭ ማዞር” ምን ማለት ነው? በመጀመሪያ፣ ይህን በቀጥተኛ ትርጉሙ ልንመለከተው ይገባል። ኢየሱስ የተናገረውን በእርግጥ ማለቱ ነበር። ለዚህም ፍጹም ምሳሌ እርሱ ራሱ ነው። በጉንጩ በጥፊ ከመመታቱም በላይ፣ በጭካኔ ተገርፎ በመስቀል ተሰቅሏል። ምላሹም፣ “አባት ሆይ፣ የሚያደርጉትን አያውቁምና ይቅር በላቸው” የሚል ነበር። ስለዚህ ኢየሱስ፣ ራሱ ለማድረግ ፈቃደኛ ያልሆነበትን ማንኛውንም ነገር እንድናደርግ አይጠራንም።
ሌላውን ጉንጭ ማዞር ማለት የሌላ ሰውን አስከፊ ድርጊቶች ወይም ቃላት መሸፋፈን አለብን ማለት አይደለም። ምንም በደል እንዳልፈጸመ ማስመሰል የለብንም። ኢየሱስ ራሱ፣ ይቅር ሲልና አብም ይቅር እንዲላቸው ሲለምን፣ በኃጢአተኞች እጅ የደረሰበትን ከባድ ግፍ አምኖ ተቀብሏል። ዋናው ነገር ግን በክፋታቸው እንዲሳብ ራሱን አለመፍቀዱ ነው።
ብዙ ጊዜ፣ በምሳሌያዊ አነጋገር፣ ሌላ ሰው ጭቃ እንደወረወረብን ሲሰማን፣ እኛም መልሰን ልንወረውርበት እንፈተናለን። ሊበድለን ከሚሞክረው ሰው ጋር ልንጣላና መልሰን ልንገፋው እንፈተናለን። የሌላ ሰውን ክፋትና ጭካኔ ለማሸነፍ ዋናው ነገር ግን ወደዚያ ጭቃ ለመውረድ እምቢ ማለት ነው። ሌላውን ጉንጭ ማዞር፣ በሞኝነት ጭቅጭቅ ወይም ክርክር ራሳችንን ዝቅ ለማድረግ እምቢ እንደምንል የምንገልጽበት መንገድ ነው። ምክንያታዊ ያልሆነ ባሕርይ ሲያጋጥመን፣ በዚያ ለመሳተፍ እምቢ እንላለን። ከዚያ ይልቅ፣ የሌላውን ሰው ክፋት በሰላም ተቀብለንና ይቅር ብለን፣ ክፋቱን ለራሱና ለሌሎች እንዲገልጥ ለመፍቀድ እንመርጣለን።
ይህ ማለት ኢየሱስ፣ ከአቅማችን በላይ የሆነ በደል በሚደርስብን ግንኙነቶች ውስጥ ለዘላለም እንድንኖር ይፈልጋል ማለት አይደለም። ነገር ግን ሁላችንም ከጊዜ ወደ ጊዜ ግፍ እንደሚያጋጥመን፣ እናም በምሕረትና ወዲያውኑ ይቅር በማለት ልንጋፈጠው እንጂ፣ ክፋትን በክፋት ወደ መመለስ መሳብ እንደሌለብን ማለት ነው።
ዛሬ፣ ለእርስዎ አስቸጋሪ ስለሆኑ ግንኙነቶች ያሰላስሉ። በተለይም ይቅር ለማለትና ሌላውን ጉንጭ ለማዞር ምን ያህል ዝግጁ እንደሆኑ ያሰላስሉ። ይህን ማድረግ በዚያ ግንኙነት ውስጥ የሚፈልጉትን ሰላምና ነፃነት ሊያመጣልዎ ይችላል።
ይቅር ባይ ጌታዬ ሆይ፣ ታላቅ ምሕረትህንና ይቅር ባይነትህን እንድመስል እርዳኝ። የጎዱኝን ሰዎች ይቅር እንድልና ከሚደርስብኝ ማንኛውም በደል በላይ እንድነሣ እርዳኝ። ኢየሱስ ሆይ፣ በአንተ እታመናለሁ።
ለኢየሱስ ቅዱስ ልብ የሚቀርብ የዘጠኝ ቀን ጸሎት
የዘጠኝ ቀን ጸሎቱ ቀናት፦ ጁን 15-23, 2022
ጁን 24, 2022፦ የኢየሱስ ቅዱስ ልብ ታላቅ በዓል
የዕለቱ ቅዱስ – የፓዱዋው ቅዱስ አንጦንዮስ፣ ካህንና የቤተ ክርስቲያን መምህር
ከላይ የቀረበው ምስል፦ በካራቫጆ የተሣለው «በእሾህ አክሊል መደፋት»፣ ከዊኪፔዲያ የተገኘ
