ኦገስት 25፣ 2022
በዓመቱ መደበኛ ጊዜ የሃያ አንደኛው ሳምንት ሐሙስ
የዛሬ ንባባት
የካላሳንዝ ቅዱስ ዮሴፍ፣ ካህን—አማራጭ መታሰቢያ
“ንቁ! ጌታችሁ በየትኛው ቀን እንደሚመጣ አታውቁምና።” ማቴዎስ 24:42
ያ ቀን ዛሬ ቢሆንስ?! ጌታችን በሕያዋንና በሙታን ላይ ለመፍረድ በሙሉ ግርማውና ክብሩ ወደ ምድር የሚመለስበት ቀን ዛሬ መሆኑን ብታውቁስ? ከተለመደው የተለየ ነገር ታደርጉ ይሆን? ምናልባትም ሁላችንም እንዲሁ እናደርግ ነበር። በተቻለን መጠን ብዙ ሰዎችን አግኝተን የጌታ መመለስ መቃረቡን እናሳውቃቸው፣ ለኑዛዜ እንሄድ፣ ከዚያም ቀኑን በጸሎት እናሳልፍ ይሆናል።
ግን ለእንዲህ ያለ ጥያቄ ከሁሉ የተሻለው ምላሽ ምን ይሆን? ከእግዚአብሔር በሚመጣ ልዩ መገለጥ፣ ጌታ የሚመለስበት ቀን ዛሬ መሆኑ ቢገለጥላችሁ፣ ከሁሉ የተሻለው ምላሽ ምን ይሆን? አንዳንዶች፣ ከሁሉ የተሻለው ምላሽ ቀናችሁን እንደ ሌላው ማንኛውም ቀን ማሳለፍ ነው ይላሉ። ለምን? ምክንያቱም፣ በተገባው መሠረት ሁላችንም እያንዳንዱን ቀን የመጨረሻችን ቀን እንደሆነ እየቆጠርን እንኖራለን፤ ከላይ ያለውንም የመጽሐፍ ቅዱስ ቃል በየቀኑ እንሰማለንና። በየቀኑ “ነቅተን ለመኖር” እና ጌታችን በማንኛውም ጊዜ ሲመለስ ዝግጁ ሆነን ለመገኘት እንተጋለን። ይህን የመጽሐፍ ቅዱስ ቃል በእውነት ተቀብለን እየኖርን ከሆነ፣ መመለሱ ዛሬም ይሁን፣ ነገ፣ በሚቀጥለው ዓመት ወይም ከብዙ ዓመታት በኋላ ቢሆን፣ ለውጥ አያመጣም።
ነገር ግን ይህ “ንቁ” የሚለው ጥሪ፣ ከክርስቶስ የመጨረሻና የክብር መምጣት ብቻ የሚልቅ ትርጉም አለው። ጌታችን በጸጋ ወደ እኛ የሚመጣበትን፣ በእያንዳንዱ ቀን ያለውን እያንዳንዱን ቅጽበትም ያመለክታል። ፍቅሩና ምሕረቱ በልባችንና በነፍሳችን ውስጥ የሚያነሣሱትን እያንዳንዱን መነሳሳት ያመለክታል። ወደ እርሱ ይበልጥ እንድንቀርብ ያለማቋረጥ በለስላሳ ሹክሹክታ የሚጠራንን ድምፁን ያመለክታል።
በእነዚህ መንገዶች በየቀኑ ወደ እናንተ ሲመጣ ትኩረት ትሰጡታላችሁ? ወደ ሕይወታችሁ ይበልጥ በሙላት ለመግባት የሚፈልግባቸውን ቁጥር የሌላቸውን መንገዶች በትኩረት ታስተውላላችሁ? ጌታችን በመጨረሻው ድል የሚመጣበትን ቀን ባናውቅም፣ እያንዳንዱ ቀንና በእያንዳንዱ ቀን ያለው እያንዳንዱ ቅጽበት፣ በጸጋ የሚመጣበት ጊዜ መሆኑን እናውቃለን። ድምፁን አዳምጡ፣ ትኩረት ስጡ፣ ተጠንቀቁ፣ ነቅታችሁም ኑሩ!
የጸጋ ሁሉ ጌታ ሆይ፣ ድምፅህን እንድፈልግና በሕይወቴ ውስጥ ላለህ መገኘት ትኩረት እንድሰጥ እርዳኝ። ስትጠራኝ አንተን ለመስማት ዘወትር የነቃሁና የተዘጋጀሁ እንድሆን አድርገኝ። ኢየሱስ ሆይ፣ በአንተ እታመናለሁ።
ወደ ቅድስት ሞኒካ የሚቀርብ የዘጠኝ ቀን ጸሎት
ኦገስት 18–26
የዕለቱ ቅዱሳን –
