የመለወጥ ድፍረት

ሴፕቴምበር 26፣ 2024
በመደበኛው ዘመን የሃያ አምስተኛው ሳምንት ሐሙስ
የዛሬ ንባባት

የአራተኛው ክፍል ገዥ ሄሮድስ እየተከናወነ ስለነበረው ሁሉ ሰማ። አንዳንዶች፣ “ዮሐንስ ከሙታን ተነሥቷል”፣ ሌሎች፣ “ኤልያስ ተገልጧል”፣ ሌሎች ደግሞ፣ “ከቀድሞዎቹ ነቢያት አንዱ ተነሥቷል” እያሉ ስለነበር፣ እጅግ ግራ ተጋባ። ሉቃስ 9:7–8

ሄሮድስ አንቲጳስ በመባልም የሚታወቀው የአራተኛው ክፍል ገዥ ሄሮድስ፣ የገሊላ አይሁዶችን ለአርባ ሁለት ዓመታት ያህል ገዝቷል። ግዛቱን ከክርስቶስ ልደት በፊት በ2 ጀምሮ፣ ከክርስቶስ ልደት በኋላ በ37 በሮም ንጉሠ ነገሥት እስከተሰደደበት ጊዜ ድረስ መግዛቱን ቀጠለ። በግዛቱ ዘመን፣ በገሊላ ባሕር ምዕራባዊ ዳርቻ ከሚገኙት ዋና ዋና ከተሞች አንዷ በሆነችው በጥብርያዶስ ብዙ ጊዜ ያሳልፍ ነበር። አብዛኛው የኢየሱስ አገልግሎት የተከናወነው በሄሮድስ ግዛት፣ ማለትም በመላው ገሊላ ውስጥ ስለነበር፣ ሄሮድስ ስለ ኢየሱስ የሚወሩትን ብዙ ነገሮች በደንብ ያውቅ ነበር።

የዛሬው ወንጌል፣ ሄሮድስ ኢየሱስን ለማየት ይጥር እንደነበር በመናገር ይደመደማል። በእርግጥ፣ ሄሮድስ በዚያ አካባቢ እንደሚኖር ማንኛውም ሰው፣ ኢየሱስን ለመስማት በፈለገው ጊዜ እርሱ ወደሚሰብክበት ቦታ መሄድ ይችል ነበር። ነገር ግን ይህን አላደረገም። ይልቁንም፣ ስለ ኢየሱስ የሚወራውን መስማቱን ቀጠለ፤ ኢየሱስ ማን እንደሆነ ለማወቅ መንገድ እየፈለገ፣ ስለ እርሱ የነበረው ጉጉት እንዳለ ቀረ።

ሄሮድስ በተከፈተ ልብ ኢየሱስን ለመስማት፣ እርሱ ወደሚሰብክበት ቦታ ሄዶ ቢሆን ኖሮ ምን ሊሆን እንደሚችል ለማሰብ ሞክር። ይህን አድርጎ፣ በእውነትም አዳምጦ ቢሆን ኖሮ፣ ሄሮድስ በሐሳብ ሊታዩ ከሚችሉት ሁሉ እጅግ ታላቅ ከሆኑ ስጦታዎች አንዱን ባገኘ ነበር። የእምነትንና የልብ መመለስን ስጦታ ተቀብሎ፣ ወደ ዘላለማዊ ድኅነት በሚወስደው መንገድ መጓዝ በጀመረ ነበር። ነገር ግን ሄሮድስ ብልሹ ሕይወት እየኖረ ነበር። ጨካኝ ገዥ፣ እንዲሁም ንስሐ የማይገባ አመንዝራ እንደነበር ይታወቅ ነበር። ሥልጣኑን ይወድድ ነበር፤ እንዳያጣውም እጅግ ይሳሳለት ነበር። ሄሮድስ ኢየሱስን ቢሰማ፣ መለወጥ እንደሚኖርበት፣ ቢያንስ በልቡ ጥልቅ ውስጥ፣ ያውቅ እንደነበር ይገመታል። መለወጥ ግን አይፈልግ እንደነበርም ይገመታል።

ይህ ለሁላችንም ጠንካራ ትምህርት ይሰጠናል። እያንዳንዳችን፣ በልባችን ጥልቅ ውስጥ መለወጥ ስለማንፈልግ፣ ከጌታችን የሚመጡትን የተለያዩ መልእክቶችና ጥሪዎች በቀላሉ ወደ ጎን ልንተው እንችላለን። እግዚአብሔር በሕይወታችን በእያንዳንዱ ቀን፣ ቀኑን ሙሉ ይናገረናል። የሙሉ ወንጌሉን መልእክት ያለማቋረጥ ያቀርብልናል። እግዚአብሔር ከሚናገረው ብዙውን ለመቀበል ዝግጁ ብትሆንም፣ እያወቅህ ወይም ሳታውቅ የማታዳምጣቸው የመለኮታዊ መልእክቱ ክፍሎች ሊኖሩ ይችላሉ። እግዚአብሔር ሊናገርህ የሚፈልገውን ሁሉ ለመስማት የሚያስችለው ቁልፍ፣ እርሱ እንድትለወጥ በሚፈልግበት በማንኛውምና በሁሉም መንገድ ሙሉ በሙሉ ለመለወጥ ዝግጁ መሆን ነው።

ዛሬ ስለ ሄሮድስ አሰላስል። በመጀመሪያ፣ ስለ ኢየሱስ ለማወቅ በነበረው ጉጉት ላይ አሰላስል። ይህ ከግዴለሽነት እጅግ የተሻለ ስለሆነ፣ መልካም ባሕርይ ነው። ከዚያም፣ ሄሮድስ ኢየሱስን ለመስማት ወደ እርሱ ፈጽሞ እንዳልሄደ አስብ። ከኢየሱስ ጋር ለመጀመሪያ ጊዜ የተገናኘው፣ ኢየሱስ በተያዘበት ሌሊት፣ ጌታችንን ሲመረምረውና ሲያፌዝበት ነበር። የሄሮድስን እልከኝነት ስታስብ፣ የራስህን ሕይወት ለመመርመር ተጠቀምበት። የእልከኝነት፣ የመለወጥ ፍርሃት ወይም የተዘጋ ልብ ትንሽም ምልክት ባየህበት ቦታ፣ ወደ ጌታችን በመመለስ ይህን ለማስተካከል ጣር። እርሱ ሊነግርህ የሚፈልገውን ሁሉ ለመቀበል ልብህ ክፍት እንደሆነ፣ እንዲሁም እንድትለወጥ በሚጠራህ በማንኛውም መንገድ ለመለወጥ ዝግጁና ፈቃደኛ እንደሆንህ ንገረው። ጌታችን ከአንተ የሚፈልገውን ለውጥ አትፍራ። ያንን ለውጥ በፈቃድ መቀበል፣ ወደ እውነተኛ የሕይወት ቅድስና በፍጥነት በሚያደርሰው ጠባብ መንገድ ላይ ያስገባሃል።

ሁልጊዜ ከእኔ ጋር ያለህ ጌታዬ ሆይ፣ ቅዱስ ቃልህን ስሰማ እንድለወጥ እየጋበዝኸኝ፣ ቀንና ሌሊት ትጠራኛለህ። በጸጋህ ያለማቋረጥ ለምታነሣሣኝ አመሰግንሃለሁ፤ ከእኔ የምትጠይቀውን ሁሉ ለመቀበል ዝግጁ ሆኜ ለመኖርም ቃል እገባለሁ። ጌታዬ ሆይ፣ አንተን እመርጣለሁ። ወደ አንተም ስመለስ፣ ለጥሪህ በሙሉ ልቤ ምላሽ ለመስጠት የሚያስፈልገኝ ድፍረት እንዲኖረኝ እጸልያለሁ። ኢየሱስ ሆይ፣ በአንተ እታመናለሁ።

ከካቶሊካዊ ሕይወቴ አዲስ የቀረበ!