Cebuano

Paghalad sa Imong Kinabuhi

Abril 25, 2021
Ikaupat nga Domingo sa Pasko sa Pagkabanhaw (Tuig B)—Domingo sa Maayong Magbalantay
Mga Pagbasa Karong Adlawa

Bidyo

Miingon si Jesus: “Ako ang maayong magbalantay. Ang maayong magbalantay mohalad sa iyang kinabuhi alang sa mga karnero. Ang sinuholan, nga dili magbalantay ug dili iya ang mga karnero, mobiya sa mga karnero ug modagan inigkakita niya nga may nagpadulong nga lobo. Dakpon sa lobo ang mga karnero ug patibulaagon sila. Kay nagtrabaho lang siya tungod sa suhol ug wala siyay pagtagad sa mga karnero.” Juan 10:11

Sumala sa tradisyon, kining Ikaupat nga Domingo sa Pasko sa Pagkabanhaw gitawag nga “Domingo sa Maayong Magbalantay.” Gitawag kini sa ingon kay ang mga pagbasa sa Ebanghelyo niining Domingoa, sa matag usa sa tulo ka liturhikanhong tuig, gikan sa ikanapulong kapitulo sa Ebanghelyo ni San Juan. Dinhi, tin-aw ug balikbalik nga gitudlo ni Jesus ang Iyang tahas isip Maayong Magbalantay. Unsay buot ipasabot sa pagkahimong magbalantay? Labaw sa tanan, giunsa ni Jesus pagtuman sa labing hingpit nga paagi ang Iyang tahas isip Maayong Magbalantay natong tanan?

Makapahimuot sa kasingkasing ang hulagway ni Jesus isip magbalantay. Daghang pintor ang naghulagway kang Jesus isip malumo ug buotan nga tawo nga nagkugos ug karnero o nagpas-an niini sa Iyang mga abaga. Kining balaang hulagway maoy usa sa atong handurawon ug pamalandongon karong adlawa. Makadani kini kanato ug makatabang nga modangop kita sa atong Ginoo, sama sa bata nga modangop sa iyang ginikanan kon nagkinahanglan siya. Apan bisan tuod makadani kaayo kining malumo ug matahom nga hulagway ni Jesus isip magbalantay, aduna pay laing mga bahin sa Iyang tahas isip Magbalantay nga angay natong pamalandongon.

Ang Ebanghelyo nga gikutlo sa ibabaw nagpadayag sa kinauyokan sa gitudlo ni Jesus bahin sa labing importanteng kinaiya sa maayong magbalantay. Siya ang “mohalad sa iyang kinabuhi alang sa mga karnero.” Andam siyang mag-antos tungod sa gugma alang niadtong gitugyan sa iyang pag-atiman. Giuna niya ang kinabuhi sa mga karnero kay sa iya mismong kinabuhi. Ang pagsakripisyo mao ang kinauyokan niining pagtulon-ana. Ang magbalantay andam mosakripisyo. Ug ang pagkaandam sa pagsakripisyo mao ang labing tinuod ug tukmang kahulogan sa gugma.

Si Jesus mao ang “Maayong Magbalantay” nga naghalad sa Iyang kinabuhi alang kanatong tanan. Kita usab kinahanglang maningkamot matag adlaw sa pagsundog sa Iyang gugma nga andam mosakripisyo alang sa uban. Kinahanglan nga sa matag adlaw, kita ang mahimong Kristo, ang Maayong Magbalantay, alang sa uban. Mahimo nato kini pinaagi sa pagpangita ug mga paagi nga ikahalad nato ang atong kinabuhi alang kanila: unahon nato sila, buntogon ang matag kahakog sa kaugalingon, ug gamiton ang atong kinabuhi sa pag-alagad kanila. Ang gugma dili lamang ang pagsinati ug malipayon ug makapatandog nga mga higayon uban sa uban. Labaw sa tanan, ang gugma mao ang pagkaandam sa pagsakripisyo.

Pamalandonga karong adlawa kining duha ka hulagway ni Jesus, ang Maayong Magbalantay. Una, pamalandonga ang malumo ug maaghop nga Ginoo nga nagdawat ug nag-atiman kanimo sa balaan, maluluy-on ug mahigugmaong paagi. Unya itutok ang imong mga mata sa Paglansang sa Krus. Tinuod gayod nga gihalad sa atong Maayong Magbalantay ang Iyang kinabuhi alang kanatong tanan. Ang Iyang gugma isip Magbalantay maoy nagtukmod Kaniya sa pag-antos pag-ayo ug sa paghalad sa Iyang kinabuhi aron maluwas kita. Wala mahadlok si Jesus nga mamatay alang kanato, kay hingpit ang Iyang gugma. Kita ang bililhon alang Kaniya, ug andam Siyang mobuhat sa bisan unsang gikinahanglan aron higugmaon kita, lakip na ang paghalad sa Iyang kinabuhi tungod sa gugma. Pamalandonga kining labing balaan ug putli nga gugma nga andam mosakripisyo, ug paningkamoti nga ihalad kini sa mas hingpit nga paagi ngadto sa tanan nga gitawag kang higugmaon.

Jesus, among Maayong Magbalantay, kinasingkasing akong nagpasalamat Kanimo sa paghigugma Kanako hangtod sa paghalad sa Imong kinabuhi sa Krus. Gihigugma Mo ako dili lamang uban sa hilabihang kalumo ug kaluoy, kondili uban usab sa pagsakripisyo ug sa walay paghunahuna sa kaugalingon. Samtang gidawat ko ang Imong diosnong gugma, hinigugma kong Ginoo, tabangi usab ako sa pagsundog sa Imong gugma ug sa paghalad sa akong kinabuhi alang sa uban. Jesus, akong Maayong Magbalantay, mosalig ako Kanimo.

Mga Pag-ampo sa Pasko sa Pagkabanhaw

Dugang nga mga Pamalandong sa Ebanghelyo

Mga Pamalandong sa Diosnong Kalooy

Tanang Santos/Mga Kapistahan

Santo sa Adlaw – San Marcos, Ebanghelista
Dili kini saulogon isip liturhikanhong handomanan karong tuiga kay natunong kini sa Domingo

Mga Kapilian sa mga Basahon sa Misa

Mga hulagway nga gipakita sa ibabaw: Bintanang de kolor nga bildo sa St John the Baptist’s Anglican Church