Cebuano

Pag-ila sa Tingog sa Dios

Abril 26, 2021
Lunes sa Ikaupat nga Semana sa Pasko sa Pagkabanhaw
Mga Pagbasa Karong Adlawa

Bidyo

Paminaw sa Iningles

Apan ang mosulod agi sa ganghaan mao ang magbalantay sa mga karnero. Ablihan siya sa tigbantay sa ganghaan, ug madungog sa mga karnero ang iyang tingog samtang tawgon niya sa ngalan ang iyang kaugalingong mga karnero ug dad-on sila pagawas. Sa dihang napagawas na niya ang tanan niyang karnero, mag-una siya sa paglakaw ug mosunod kaniya ang mga karnero kay nakaila sila sa iyang tingog. Juan 10:2–4

Nakaila ka ba sa tingog sa Magbalantay? Giyahan ka ba Niya matag adlaw ngadto sa Iyang balaang kabubut-on? Unsa ka kamatinagdanon sa Iyang gisulti matag adlaw? Kini mao ang pipila sa labing mahinungdanong mga pangutana nga angay pamalandongan.

Daghang tawo ang naglisod sa pag-ila sa tingog sa Dios. Kasagaran, daghang nag-indigay nga mga “tingog” ang mosulti kanato matag adlaw. Gikan sa labing bag-ong mga ulohan sa balita, ngadto sa mga opinyon sa mga higala ug pamilya, ngadto sa mga tentasyon nga naglibot kanato sa sekular nga kalibotan, hangtod sa mga opinyon nga kita mismo ang naghimo, kining mga “tingog” o “ideya” nga nagpuno sa atong hunahuna mahimong lisod ilain. Unsa ang gikan sa Dios? Ug unsa ang gikan sa ubang mga tinubdan?

Mahimo gayod natong mailhan ang tingog sa Diyos. Una sa tanan, daghan nang kamatuoran alang sa tanan ang gisulti sa Diyos kanato. Pananglitan, ang tanan nga anaa sa Balaang Kasulatan mao ang tingog sa Diyos. Buhi ang Iyang Pulong. Ug sa atong pagbasa sa Kasulatan, mas mailhan pa gayod nato ang tingog sa Diyos.

Mopamulong usab ang Dios kanato pinaagi sa malumong mga pagdasig nga magdala sa Iyang kalinaw. Pananglitan, kon naghunahuna ka bahin sa usa ka desisyon nga kinahanglan nimong himoon, ug imong idangop kana nga desisyon sa atong Ginoo pinaagi sa pag-ampo ug dayon magpabiling bukas sa bisan unsang Iyang gusto alang kanimo, kasagaran ang Iyang tubag moabot sa dagway sa usa ka lawom ug sigurado nga kalinaw sa kasingkasing.

Makakat-on ka sa pag-ila sa tingog sa Dios sa imong adlaw-adlaw nga kinabuhi pinaagi sa pag-ugmad sa usa ka batasan sa imong kinasuloran sa pagpaminaw, pag-ila, pagtubag, pagpaminaw pag-usab, pag-ila ug pagtubag, ug uban pa. Samtang mas kanunay nimong madungog ang tingog sa Dios, mas mailhan nimo ang Iyang tingog bisan sa labing hinay ug dili dayon mamatikdang mga paagi. Ug samtang mas madungog nimo ang maong malumong mga timailhan sa Iyang tingog, mas makahimo ka sa pagsunod. Sa kataposan, mahimo lamang kini pinaagi sa padayon nga batasan sa lawom nga pag-ampo nga nagpalig-on kanimo. Kon wala niini, lisod kaayong mailhan ang tingog sa Magbalantay sa panahon nga labing gikinahanglan nimo Siya.

Pamalandonga karong adlawa kon unsa ka ka matinagdanon sa Diyos sa imong pag-ampo. Unsay naandan nimong paagi sa pag-ampo matag adlaw? Mogahin ka ba ug panahon matag adlaw sa pagpaminaw sa malumo ug matahom nga tingog sa atong Ginoo? Naningkamot ka ba nga maanad sa pagpaminaw aron mas moklaro pa gayod ang Iyang tingog kanimo? Kon wala, ug kon naglisod ka sa pag-ila sa Iyang tingog, desisyoni nga palig-onon ug palawmon ang imong naandang pag-ampo matag adlaw, aron ang tingog sa atong mahigugmaong Ginoo mao ang mogiya kanimo sa matag adlaw.

Jesus, akong Maayong Magbalantay, namulong Ka kanako matag adlaw. Kanunay Mong gipadayag kanako ang Imong labing balaang kabubut-on alang sa akong kinabuhi. Tabangi ako nga kanunayng mailhan ang Imong malumong tingog aron magiyahan Mo ako latas sa mga hagit sa kinabuhi. Hinaot nga ang akong kinabuhi sa pag-ampo mahimong lawom kaayo ug makapalig-on kanako aron ang Imong tingog kanunayng molanog sa akong kasingkasing ug kalag. Jesus, misalig ako Kanimo.

Mga Pag-ampo sa Pasko sa Pagkabanhaw

Dugang nga mga Pamalandong sa Ebanghelyo

Mga Pamalandong sa Diosnong Kalooy

Mga Santos/Kasaulogan Karong Adlawa

Mga Kapilian sa mga Basahon sa Misa

Mga hulagway nga gipakita sa ibabaw: Bintana nga may hulagway ni Jesus, ang Maayong Magbalantay, sa St. Matthew’s Lutheran Church, Charleston, South Carolina