Hulyo 26, 2021
Lunes sa Ikanapulog-pitong Semana sa Ordinaryong Panahon
Mga Pagbasa Karong Adlawa
San Joaquin ug Santa Ana—Handumanan
Paminaw sa Iningles
Gisultihan niya sila og laing sambingay. “Ang Gingharian sa langit sama sa patubo nga gikuha sa usa ka babaye ug gisagol sa tulo ka takos nga harina sa trigo hangtod nga mitubo ang tibuok minasa.” Mateo 13:33
Dako og gahom ang patubo. Bisan og kasagaran mga 1% lamang kini sa usa ka tinapay, makapadako kini sa tinapay og kapin sa doble. Siyempre, aduna usab kini talagsaong epekto nga makapahumok ug makapaluyat sa minasa samtang kini motubo. Kon walay patubo, ang minasa magpabiling gahi ug mas gamay kaayo. Dili kini mahimong tinapay nga gituyo unta alang niini.
Ang mga Amahan sa Simbahan nagtanyag og daghang paghubad niining mubo nga sambingay nga usa lamang ka hugpong sa mga pulong. Ang uban nag-ingon nga ang tulo ka takos nga harina nagrepresentar sa espiritu, kalag ug lawas diin isulod ang Ebanghelyo. Ang uban usab nag-ingon nga ang tulo ka takos nga harina nagrepresentar sa tulo ka nagkalainlaing matang sa tawo o sa tulo ka ang-ang sa pagpamunga sa atong kinabuhi. Ang patubo gisabot sa uban ingong mensahe sa Ebanghelyo diha sa Kasulatan, ug sa uban ingong gugma nga kinahanglang molukop sa atong kinabuhi ug sa tibuok kalibotan. Siyempre, ang mga sambingay ni Jesus, ingon man ang matag pagtulon-an nga anaa sa Kasulatan, nagtanyag kanato og daghang ang-ang sa pagsabot ug kahulogan nga pulos husto ug nahiuyon sa usag usa. Usa sa labing mahinungdanong mga pangutana nga angay pamalandongan mao kini: Unsa ang gustong isulti sa Dios kanimo pinaagi niining sambingaya?
Kon isipon nimo ang imong kaugalingon nga mao ang tulo ka takos nga harina, ug ang patubo mao ang Dios, ang Iyang balaang Pulong ug ang Iyang malumo apan tin-aw nga Tingog nga nakigsulti kanimo, sa unsang konkretong mga paagi nimo makita nga ang imong kinabuhi mitubo isip direktang resulta niini? Sa unsang paagi nimo makita nga nahimo ka sa tawo nga gituyo alang kanimo tungod sa pagsulod sa Dios sa imong kinabuhi? Ug makita ba nimo nga ang epekto niini tinuod nga makapausab ug nagkadako pa gayod sa nagkapaspas nga paagi?
Usahay gamay ra o wala gayoy epekto ang Pulong sa Dios sa atong kinabuhi. Siyempre, dili kini sala sa Pulong sa Dios; hinunoa, tungod kini kay wala nato tugoti ang Dios sa paghimo sa Iyang buhat nga makapausab kanato. Aron molihok ang patubo, ang minasa kinahanglang pasagdan una sa makadiyot. Busa sa atong kinabuhi, aron mahimo sa Dios ang Iyang buhat, kinahanglan nato Siyang tugotan sa paglihok sa malumo ug gamhanang paagi. Kini nga proseso nagkinahanglan nga atong isilsil sa atong kasingkasing ang tanan nga gisulti sa Dios kanato. Unya, diha sa pag-ampo, kinahanglan natong tugotan ang Iyang mga buhat nga molihok sa atong sulod, ug tugotan nato nga ang kausaban mahinay apan sigurado, sumala sa Iyang balaang plano.
Usahay mawad-an usab kita og pailob sa mga buhat sa Dios. Sa makausa pa, nagkinahanglan og panahon ang patubo aron molihok. Kon wala kitay pailob sa grasya sa Dios, mahimo kining mahisama sa pagkuha sa minasa ug pagmasa niini pag-usab ug pag-usab sa wala pa gani makalihok ang patubo. Apan kon mapailobon kita diha sa pag-ampo, nga nagtugot sa Dios sa paghimo sa Iyang buhat sa atong kinabuhi sumala sa Iyang kabubut-on ug sa Iyang panahon, nan sa hinayhinay masinati nato ang kausaban nga Iyang gisugdan.
Pamalandongi karong adlawa kining mubo apan gamhanang sambingay. Tan-awa ang imong kaugalingon isip maong minasa ug ang Diyos ug ang Iyang paglihok sa imong kinabuhi isip patubo. Samtang imong palandongon kining hulagway diha sa pag-ampo, tugoti ang Diyos nga ipadayag kon unsaon Niya paglihok diha kanimo ug kon unsaon Niya pagbag-o kanimo. Pag-ampo alang sa pailob. Salig nga kon dawaton nimo sa imong kalag ang Iyang Pulong nga makapabag-o, buhaton gayod Niya ang Iyang buot buhaton. Ug salig nga kon mahitabo kini, mahimo ka gayod nga tawo nga gusto sa Diyos nga ikaw mamahimo.
Ginoo ko nga nagbag-o kanako, gitinguha Nimo nga mosulod sa kinahiladman sa akong kinabuhi ug molukop sa tibuok kong pagkatawo. Gitinguha Nimo nga bag-ohon ako, sa hinayhinay, aron mahimo akong tawo nga Imong gitinguha. Palihog tabangi ako nga mahimong matinagdanon sa tanan nga buot Nimong buhaton diha kanako ug mapailobong maghulat sa pagbag-o nga Imo nang gisugdan. Jesus, nagsalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Mga Santos/Kasaulogan Karong Adlawa
Mga Kapilian sa mga Basahon sa Misa
