Septiyembre 16, 2021
Huwebes sa Ikakawhaag-upat nga Semana sa Ordinaryong Panahon
Mga Pagbasa Karong Adlawa
Mga Santos Cornelius, Papa, ug Cyprian, Obispo, mga Martir—Handumanan
Paminaw sa Iningles
Miingon Siya kaniya, “Gipasaylo na ang imong mga sala.” Ang uban nga kauban Niya sa kan-anan miingon sa ilang kaugalingon, “Kinsa man kini nga bisan ang mga sala Iyang gipasaylo?” Apan miingon Siya sa babaye, “Ang imong pagtuo nakaluwas kanimo; lakaw nga malinawon.” Lucas 7:48–50
Kining mahigugmaong mga pulong gisulti ni Jesus ngadto sa usa ka makasasala nga babaye nga miabot nga wala damha samtang nanihapon si Jesus sa balay sa usa ka Pariseo. Gitamay ug gihukman siya sa Pariseo, apan wala niya kini tagda. Tungod sa iyang kasubo sa iyang mga sala, gidihogan niya ang mga tiil ni Jesus ug nagpaubos siya sa Iyang atubangan, gibasa ang Iyang mga tiil sa iyang mga luha ug gipahiran kini sa iyang buhok.
Natapos ang panag-istoryahanay sa dihang mitan-aw si Jesus kaniya ug miingon, “Gipasaylo na ang imong mga sala.” Matikdi ang reaksiyon sa mga kauban Niya sa kan-anan. Gipakita kanato kon unsa ang anaa sa ilang hunahuna. Miingon sila sa ilang kaugalingon, “Kinsa man kini nga bisan ang mga sala Iyang gipasaylo?”
Kadtong natawo ug nagdako diha sa pagtuo sukad pa nakasabot nga ang Dios mopasaylo. Gitudloan kita niini sukad sa pagkabata, daghan kitag nakat-onan bahin niini sa pagpangandam alang sa Sakramento sa Pagpasig-uli, ug nadungog nato kining mensahe sa lainlaing paagi sa tibuok natong kinabuhi. Apan handurawa nga sa tibuok nimong kinabuhi wala ka gayod makadungog o makasinati sa pagpasaylo sa Dios, ug unya sa kalit, usa ka adlaw, nakasinati ka niini. Handurawa kon unsay gibati niining mga tawhana sa ilang unang pagsugat sa pagpasaylo sa mga sala diha sa Persona ni Jesus sa dihang gipasaylo Niya kining makasasala nga babaye. Tingali medyo nalibog sila niini, apan labaw tingali sa tanan, gibati nila ang balaang kahingangha ug pagdayeg sa gibuhat sa Dios. Nakita nilang misulod kining makasasala nga babaye, namatikdan nila ang mahukmanon ug mapasipad-anong tinamdan sa mga Pariseo, nakita nila ang iyang pagpahayag sa kasubo ug pagpaubos, ug unya nakita nila nga gipasaylo siya ni Jesus.
Nahingangha ka ba sa gasa sa pagpasaylo sa imong mga sala ug sa mga sala sa uban? O giisip mo lang nga ordinaryo ug angay ra nga madawat ang pagpasaylo? Ang kahibulong ug kahingangha nga gipakita sa mga tawo sa pagpasaylo sa mga sala niining babayhana angayng motabang kanato sa pagsusi sa atong kaugalingong tinamdan ngadto sa kalooy ug pagpasaylo sa Dios. Kinahanglan natong padayon nga ugmaron sa atong kaugalingon ang samang kahingangha sa kalooy sa Dios nga gibati niining mga tawhana. Kinahanglan kitang maningkamot nga dili gayod isipon nga ang pagpasaylo usa lamang ka butang nga angay rang madawat o usa lamang ka ordinaryong bahin sa kinabuhi. Hinuon, kinahanglan natong tan-awon kini isip talagsaon, kanunayng bag-o, kanunayng mahimayaon, ug sa walay kataposan makapahingangha.
Pamalandongi karong adlawa ang mga pulong niining unang mga sumusunod ni Jesus nga napuno sa kahingangha: “Kinsa man kini nga bisan ang mga sala Iyang gipasaylo?” Samtang mamalandong ka, tugoti ang Dios nga pun-on ka sa kinahiladman nga pagpasalamat tungod sa pagpasaylo nga Iyang gitanyag kanimo. Bag-oha ang imong paghatag og bili niining gasa sa Dios nga wala nimo kahagoi, ug tugoti nga kana nga pagpasalamat mahimong tinubdan sa imong padayon nga kahingangha sa kalooy sa Dios.
Akong mapasayloong Ginoo, ang Imong kalooy ug pagkamabination ngadto sa makasasala tinuod gayod nga makapahingangha. Salamat sa Imong paghigugma kanako ug sa tanan Mong sumusunod sa ingon kalawom nga gugma. Palihog pun-a ang akong kasingkasing sa balaang kahingangha sa Imong talagsaong kalooy. Hinaot nga kanunay akong mahingangha sa Imong pagpasaylo ug kanunayng mapuno sa kinahiladman nga pagpasalamat samtang akong masinati kini sa akong kinabuhi. Jesus, misalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Santo sa Adlaw – Sila San Cornelius, Papa, ug San Cyprian, Obispo, mga Martir
Mga Kapilian sa mga Basahon sa Misa
