Septiyembre 17, 2021
Biyernes sa Ika-24 nga Semana sa Ordinaryong Panahon
Mga Pagbasa Karong Adlawa
San Robert Bellarmine, Obispo ug Doktor—Opsiyonal nga Paghandum
Santa Hildegard of Bingen, Birhen ug Doktor sa Simbahan—Opsiyonal nga Paghandum
Paminaw sa Iningles
Si Jesus milibot sa mga lungsod ug mga baryo, nga nagsangyaw ug nagpahibalo sa maayong balita sa Gingharian sa Dios. Kauban Niya ang Napulog Duha ug pipila ka mga babaye nga naayo gikan sa daotang mga espiritu ug mga sakit… Lucas 8:1–2
Ang atong Ginoo adunay misyon. Naglakaw Siya gikan sa usa ka lungsod ngadto sa lain, nga “nagsangyaw ug nagpahibalo sa maayong balita sa Gingharian sa Dios.” Ang Iyang mensahe tinuod gayod nga “maayong balita.” Giayo Niya ang mga masakiton, gipapahawa ang mga demonyo ug, labaw sa tanan, gipasaylo Niya ang mga sala. Tungod niini, daghan ang misugod sa pagsunod Kaniya. Ang Iyang mga sumusunod dili lamang ang Napulog Duha nga personal nga gitawag ni Jesus ug nga sa ulahi Iyang ipadala isip Iyang mga Apostoles; may uban usab nga misunod Kaniya. Ang Ebanghelyo karon naghisgot usab sa tulo ka babaye pinaagi sa ilang mga ngalan: Maria nga taga-Magdala, Juana ug Susana. Pipila lamang sila sa mga tawo nga natandog pag-ayo sa atong Ginoo, ug tungod niini mibiya sa tanan aron mosunod Kaniya.
Ang pagpili niining unang mga sumusunod sa pagbiya sa tanan ug pagsunod kang Jesus nagdapit kanato sa pagsusi kon hangtod asa usab nato gitugyan ang atong kinabuhi sa pagsunod Kaniya. Taliwala sa daghang tawo nga nakadungog kang Jesus nga nagsangyaw, sa walay duhaduha nagkalainlain ang ilang mga tubag. Ang uban misalikway Kaniya, ang uban nadani Kaniya, ang uban mituo Kaniya apan dili andam nga mahimong Iyang tinun-an, ug ang uban mitugyan sa ilang kaugalingon sa bug-os nga kasingkasing kang Jesus ug sa Iyang misyon sa pagsangyaw sa maayong balita. Alang niining naulahi, ang maayong balita nga ilang nadungog nakapausab sa ilang kinabuhi.
Unsa ang imong tubag sa atong Ginoo? Usa ka maayong paagi aron matubag kini sa tukma mao ang pagsusi kon unsa kadakong panahon ug kusog ang imong gigahin alang sa atong Ginoo ug sa Iyang mensahe sa maayong balita. Unsa kadaghang panahon ang imong gigahin sa pagbasa sa Iyang balaang Pulong, pag-ampo Kaniya, pagsulti mahitungod Kaniya ug pagkat-on sa pagtuo nga Iyang gitudlo? Unsa kadako ang impluwensiya sa Iyang mensahe sa imong mga desisyon sa kinabuhi? Ang pagkakristohanon dili usa ka butang nga mahimo natong ilain sa ubang bahin sa atong kinabuhi. Dili kita mahimong mogahin lamang og pipila ka gutlo matag semana isip atong “panahon alang sa pagtuo” ug unya igahin ang nahibilin natong panahon sa ubang mga kalihokan. Tinuod, ang atong mga adlaw mapuno sa daghang kalihokan nga kasagarang bahin lamang sa atong kinabuhi. Kitang tanan adunay mga katungdanan ug mga responsibilidad nga nagkinahanglan sa dakong bahin sa atong adlaw. Apan ang “bug-os nga pagtugyan,” ingnon ta, nagpasabot nga si Jesus ug ang Iyang mensahe motuhop sa tanan natong ginabuhat. Bisan ang atong ordinaryong adlaw-adlaw nga mga kalihokan sama sa trabaho, mga buluhaton sa balay, ug uban pa, kinahanglan buhaton alang sa himaya sa Dios ug uyon sa Iyang balaang kabubut-on.
Alang sa unang mga sumusunod ni Jesus, bisan tuod miuban sila Kaniya gikan sa usa ka lungsod ngadto sa lain ug bug-os nga nausab ang dagan sa ilang adlaw-adlaw nga kinabuhi, nagpadayon gihapon sila sa pagbuhat sa daghang ordinaryong mga kalihokan. Apan kining ordinaryong mga kalihokan gihimo, sa kataposan, aron makatabang kanila ug sa uban sa pagtuman sa ilang labing mahinungdanong misyon: ang pagpaminaw ug pagtubag sa Pulong sa Dios.
Pamalandongi karon kon hangtod asa na nimo gihalad ang matag bahin sa imong kinabuhi ngadto sa atong Ginoo ug sa Iyang misyon. Ang pagbuhat niini wala magpasabot nga kinahanglan kang mahimong magwawali sa Ebanghelyo sa publiko, mogugol sa tibuok adlaw sa simbahan, o magbuhat ug susamang mga butang. Nagpasabot lamang kini nga imong gidapit si Jesus ug ang Iyang misyon ngadto sa tanan nimong gibuhat, matag adlaw ug sa tibuok adlaw. Dili gayod nato maingon nga igo na ang atong pag-alagad sa atong Ginoo. Samtang imong susihon ang imong adlaw-adlaw nga mga kalihokan, pangitag mga paagi aron maapil ang atong Ginoo sa tanan nimong gibuhat. Sa pagbuhat niini, tinuod kang mahimong usa sa Iyang matinumanong mga tinun-an nga bug-os nga nagtugyan sa ilang kinabuhi Kaniya.
Akong diosnong Ginoo, ang Imong misyon mao ang pagluwas sa mga kalag ug ang pagtukod sa Imong mahimayaong Gingharian. Nagpasalamat ako Kanimo sa pagdapit Kanako dili lamang aron mabag-o pinaagi sa Imong balaang Pulong, kondili usab aron makatabang sa pagpakaylap nianang Pulonga ngadto sa uban. Imoha ang akong kinabuhi, minahal nga Ginoo. Palihog sulod sa matag bahin sa akong adlaw-adlaw nga kinabuhi ug gamita ako alang sa Imong himaya. Jesus, nagsalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Mga Santos sa Adlaw –
San Robert Bellarmine, Obispo ug Doktor
Santa Hildegard sa Bingen, Birhen ug Doktor sa Simbahan
Mga Kapilian sa mga Basahon sa Misa
_LOC_matpc.23120.jpg){kind=link}