Septiyembre 22, 2021
Miyerkules sa Ika-25 nga Semana sa Ordinaryong Panahon
Mga Pagbasa Karong Adlawa
Paminaw sa Iningles
Gitigom ni Jesus ang Napulog Duha ug gihatagan sila og gahom ug awtoridad batok sa tanang demonyo ug sa pag-ayo sa mga sakit, ug gipadala Niya sila aron imantala ang Gingharian sa Dios ug ayohon ang mga masakiton. Lucas 9:1–2
Kini ang unang higayon nga gipadala ni Jesus ang Iyang mga Apostoles sa usa ka misyon. Niining misyona, giandam Niya sila alang sa ilang kataposang misyon, nga moabot sa panahon sa Pentecostes, human mamatay si Jesus, mabanhaw ug mokayab sa Langit. Apan sa pagkakaron, gisugo ni Jesus kining mga Apostoles sa pagbuhat og tulo ka butang: paghingilin sa mga demonyo, pag-ayo sa mga masakiton ug pagmantala sa Gingharian sa Dios.
Sama sa mga Apostoles, gitawag kita sa pagpakigbatok sa yawa ug sa iyang mga demonyo. Mga anghel sila nga nangahulog nga nagpabilin ang ilang kinaiyanhong mga gahom, ug gigamit nila kining kinaiyanhong mga gahom aron sulayan ang paglimbong kanato, pagdaogdaog kanato ug, sa pipila ka kahimtang, bisan ang pagsanib kanato. Apan walay gahom ang mga demonyo atubangan sa Dios, ug ang Dios naghatag kanato og espirituhanong awtoridad batok kanila. Ug bisan tuod adunay pipila nga gitugyanan sa talagsaong ministeryo sa eksorsismo sulod sa Simbahan, kitang tanan adunay espirituhanong awtoridad batok sa mga demonyo, ilabina batok sa ilang kinaiyanhong espirituhanong mga pag-atake pinaagi sa mga tentasyon.
Ang pangunang paagi sa atong pagpakigbatok sa mga demonyo mao ang pagbutyag ug pagpadayag sa ilang mga bakak. Si San Ignacio de Loyola, sa iyang klasiko nga sinulat sa espirituhanong kinabuhi nga Ang mga Espirituhanong Ehersisyo, nagpasabot kanato sa pipila ka kasagarang mga taktika nga gigamit niining mga demonyo ug kon unsaon nato pagbuntog kanila. Siya nag-ingon nga alang niadtong nalubong sa kinabuhi sa grabeng sala, ang mga demonyo padayon nga nagbutang sa ilang hunahuna sa bakak nga ang ilang mga sala makalingaw ug makahatag og katagbawan, aron padayon nilang pilion kini. Ug alang niadtong naningkamot nga mahimong balaan, kining mga demonyo naningkamot sa pagpaluya sa ilang kadasig samtang nagkalalom ang ilang pagkakabig. Sila “mopaak, mopaguol ug magbutang og mga babag, magsamok pinaagi sa bakak nga mga rason, aron ang tawo dili mopadayon” (Lagda 2). Ang paagi sa pagbuntog niining mga tentasyon mao ang pagdangop sa kamatuoran. Una, pinaagi sa pag-ila nga ang bakak nga mga “kalipay” sa sala mao gayod kana: bakak, lumalabay ug sa kataposan makapaubos sa atong dignidad. Dugang pa, mabuntog nato kining mga tentasyon pinaagi sa pagdawat gikan sa Dios og “kaisog ug kusog, mga paghupay, mga luha, mga inspirasyon ug kalinaw, nga nagpagaan ug nagwagtang sa tanang babag.” Sa laing pagkasulti, mabuntog nato ang mga demonyo pinaagi sa pagtugot sa Dios nga lig-onon kita, patin-awon ang atong panghunahuna, wagtangon ang tanang bakak nga babag sa dalan padulong sa pagkabalaan ug pinaagi sa pagdawat sa madagayaong mga paghupay nga gihatag sa Dios isip tabang sa panaw.
Pamalandongi karong adlawa ang kamatuoran nga ang atong Ginoo buot moalagad kanimo niining tulo ka paagi. Kon maningkamot ka sa pagbuntog sa mga babag nga gibutang niining mga demonyo sa imong dalan, nan anaa ka sa maayong kahimtang sa pag-ambit sa laing duha ka misyon nga gihatag sa mga Apostoles. Makasinati ka og kaayohan sa imong panghunahuna, pagbati ug espirituhanong kinabuhi, ug matugotan nimo nga motubo nga malig-on ug gamhanan ang Gingharian sa Dios sulod sa imong kaugalingong kalag. Gikan niana, ipadala ka sa atong Ginoo sa usa ka misyon aron dad-on kining mga grasya ngadto sa uban nga nanginahanglan.
Akong Ginoong makagagahom sa tanan, Aduna Kay awtoridad ibabaw sa daotan, gahom sa pag-ayo ug sa paghatag sa tanang gasa sa walay kataposang kaluwasan. Tabangi ako nga mahimong bukas sa mga paagi nga buot Nimong gamiton sa pag-anhi kanako. Palihog, gawasa ako gikan sa mga pag-atake sa Yawa, hatagi ako og kaayohan ug paglaom, ug ipatungha ang kadagaya sa Imong mahimayaong Gingharian sa akong kinabuhi. Jesus, nagsalig ako Kanimo.
Nobena kang Santa Teresita, ang Gamayng Bulak
Septiyembre 22-30
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Mga Santos/Kasaulogan Karong Adlawa
Mga Kapilian sa mga Basahon sa Misa
