Septiyembre 24, 2021
Biyernes sa Ika-25 nga Semana sa Kasagarang Panahon
Mga Pagbasa Karong Adlawa
Paminaw sa Iningles
Usa ka higayon, samtang nag-ampo si Jesus nga nag-inusara ug kauban Niya ang mga tinun-an, nangutana Siya kanila, “Sumala sa mga panon sa katawhan, kinsa man Ako?” Luke 9:18
Makapainteres nga si Jesus “nag-ampo nga nag-inusara” apan “kauban Niya ang mga tinun-an.” Gipasabot ni San Beda kining daw nagkasumpaki nga mga pahayag pinaagi sa pag-ingon nga “ang Anak lamang ang makahimo sa pagsulod sa dili matugkad nga mga tinago sa kabubut-on sa Amahan.” Busa, ang atong Ginoo kanunayng nag-inusarang nakig-uban sa Amahan sa diwa nga si Jesus lamang ang hingpit ug suod nga nakaila sa Amahan. Kini tungod kay Siya ang Ikaduhang Persona sa Labing Balaang Trinidad, ang Walay Kataposang Anak sa Amahan.
Sa dihang tin-aw na natong nasabtan kining kamatuorana, importante usab nga masabtan nga sa pag-ampo ni Jesus ngadto sa Amahan sumala sa Iyang tawhanong kinaiya, adunay bag-ong nahitabo. Bisan tuod si Jesus kauban na sa Amahan sukad sa walay sinugdanan, ang Iyang tawhanong kinaiya wala makauban sa Amahan sukad sa walay sinugdanan. Busa, samtang ang Walay Kataposang Anak sa Diyos nakig-ambit sa Walay Kataposang Amahan samtang nagkinabuhi diha sa tawhanong unod, ang tawhanong kinaiya kalit nga gibayaw ngadto sa usa ka kahitas-an nga wala pa gayod niini maabot kaniadto. Dili lamang nga ang Walay Kataposang Anak nagkinabuhi diha sa hingpit nga panaghiusa uban sa Amahan, kondili karon ang Walay Kataposang Anak, nga hingpit nga tawo, nagdala sa Iyang tawhanong kinaiya ngadto niining panaghiusa.
Bisan og daw medyo pilosopikal kini alang sa uban, nagtudlo kini sa usa ka mahinungdanong kamatuoran nga may kalabotan kanatong tanan. Pinaagi sa pag-ampo sa atong Ginoo ngadto sa Amahan ingon nga tawo, kitang tanan gidapit sa paghiusa kang Jesus ug sa pag-ambit niining diosnong panaghiusa. Ang Anak sa Diyos, ingon nga tawo, naghimo nga posible alang kanato nga mga tawo ang pag-ambit sa pagbayaw sa atong kaugalingong kinabuhi ngadto sa panaghiusa uban sa Diyos Amahan. Ug bisan tuod ang Anak sa Diyos magpabilin kanunay sa usa ka talagsaong panaghiusa uban sa Amahan, kita gidapit gihapon sa pag-ambit sa Ilang kinabuhi pinaagi sa atong pakig-ambit.
Busa, nganong importante man kini? Usa sa mga hinungdan mao nga walay mas hingpit nga katagbawan nga atong makab-ot isip tawo kay sa pag-ambit sa pag-ampo sa Anak ngadto sa Amahan. Sa tibuok natong kinabuhi, kanunay kitang nangita og katagbawan sa nagkalainlaing paagi. Gusto kitang magmalipayon. Gusto kitang makatagamtam sa kinabuhi. Aduna kitay kinaiyanhong tinguha alang sa kalipay nga kanunay natong gitinguhang matagbaw. Ang importanteng masabtan mao nga ang labing dakong kalipay naggikan sa pag-ambit sa lawom nga pag-ampo sa Anak ngadto sa Amahan ingon nga tawo. Ang pag-ampo, ang tinuod nga pag-ampo, mao ang tubag sa atong kinalawomang tinguha.
Pamalandongi karong adlawa kon kanunay ka bang mosulod sa lawom nga pag-ampo. Makahinumdom ka ba og mga higayon nga ikaw, sama sa atong Ginoo, nag-inusarang nakig-uban sa Diyos, nakig-ambit Kaniya diha sa kahiladman sa imong tawhanong kalag, ug nadani ngadto Kaniya pinaagi sa pag-ampo? Adunay daghang ang-ang sa pag-ampo, sumala sa gipamatud-an sa daghang mga santos. Pilia ang pagpalawom sa imong pag-ampo. Duol sa atong Ginoo karong adlawa ug ibubo Kaniya ang sulod sa imong kasingkasing, nga mangayo Kaniya nga dad-on ka ngadto sa balaang pag-inusara sa Iyang pag-ampo ngadto sa Amahan. Ang pagbuhat niini magpatungha diha kanimo sa kinalawomang katagbawan nga mahimong masinati sa tawo niining kinabuhia.
Akong Ginoo nga nagaampo, samtang naggahin Ka og panahon nga nag-inusara uban sa Amahan, gihiusa Nimo ang Imong tawhanong kinaiya uban Kaniya, ug sa ingon gibayaw Mo ang atong kinaiya ngadto sa usa ka mahimayaong ang-ang. Palihog kabiga ako ngadto Kanimo, minahal nga Ginoo, aron makaila ako Kanimo ug sa Amahan pinaagi sa tinuod, lawom ug makapalig-on nga pag-ampo. Hinaot nga kining pakighiusa Kanimo mao ang hinungdan sa akong labing lawom nga katagbawan sa kinabuhi. Jesus, misalig ako Kanimo.
Nobena kang Santa Teresita, ang Gamayng Bulak
Septiyembre 22-30
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Mga Santos/Kasaulogan Karong Adlawa
Mga Kapilian sa mga Basahon sa Misa
_-_James_Tissot.jpg){kind=link}