Septiyembre 27, 2021
Lunes sa Ika-26 nga Semana sa Kasagarang Panahon
Mga Pagbasa Karong Adlawa
San Vicente de Paul, Pari—Handumanan
Paminaw sa Iningles
Mitungha ang panaglalis taliwala sa mga tinun-an kon kinsa kanila ang labing dako. Nasayran ni Jesus ang tuyo sa ilang mga kasingkasing, ug mikuha Siya og usa ka bata, gipabarog kini sa Iyang tupad, ug miingon kanila, “Si bisan kinsa nga modawat niining bataa tungod sa akong ngalan nagdawat kanako, ug si bisan kinsa nga modawat kanako nagdawat sa nagpadala kanako. Kay ang labing ubos kaninyong tanan mao ang labing dako.” Luke 9:48
Kining panag-istoryahanay tali ni Jesus ug sa Iyang mga tinun-an nahitabo wala madugay human sa tulo ka panghitabo. Una, nahitabo kini human mibalik ang mga tinun-an gikan sa unang misyon diin gipadala sila ni Jesus. Ikaduha, human kini nagpahayag si Pedro sa iyang pagtuo nga si Jesus mao “Ang Mesiyas sa Dios.” Ikatulo, nahitabo kini human sa Pagkausab sa Dagway ni Jesus, diin gidala Niya si Pedro, Santiago ug Juan ngadto sa bukid aron ipadayag ang Iyang himaya. Human niining tulo ka panghitabo, daw nagsugod sa pagpakita ang usa ka panag-indigay taliwala sa mga tinun-an. Tingali adunay kasina tungod sa pagpahayag ni Pedro sa iyang pagtuo, o tingali ang mga tinun-an nga wala madala ngadto sa bukid sa Pagkausab sa Dagway medyo nasina. Apan bisan unsa pa ang hinungdan, gitubag ni Jesus ang nagsugod nga tinguha alang sa walay pulos nga pagpasigarbo taliwala sa mga tinun-an.
Sa iyang komentaryo bahin niining tekstoha, giingon ni San Cirilo sa Alexandria nga sa espirituhanong pakigbisog, ang unang taktika sa yawa mao ang pagpukaw sa mga tinguha sa unod sulod sa atong mga kalag aron magpabilin kitang gapos sa pangandoy alang nianang mga kalipayan. Apan kon ang usa ka tawo makalingkawas niining mas ubos ug unodnong mga tinguha, pukawon dayon sa yawa ang usa ka espirituhanong sala; nga mao ang pagkahakog ug walay pulos nga pagpasigarbo. Mao kining tinguha alang sa walay pulos nga pagpasigarbo, ang tinguha nga isipon nga labing dako, ang gipakigbisogan sa mga tinun-an.
Gitambagan sa atong Ginoo ang mga tinun-an human Niya “nasayran ang tuyo sa ilang mga kasingkasing.” Mahinungdanon kaayo kining mga pulonga. Sa lintunganay, namatikdan ni Jesus nga nagsugod pa lamang ang tinguha alang sa walay pulos nga pagpasigarbo. Ingon nga pagtandi, kon ang sagbot nagsugod pa lang sa pagtubo, sayon ra kining ibton uban sa mga gamot. Apan kon pasagdan kini nga motubo sa makadiyot, mas lisod na ang pag-ibot sa mga gamot, ug ang pagbuhat niini kasagarang makaapekto sa ubang mga tanom ug sa yuta palibot sa sagbot. Ingon usab niana ang sala. Pinaagi sa malumong pagdala og usa ka bata sa ilang taliwala ug pag-ingon nga “ang labing ubos kaninyo mao ang labing dako,” gitabangan sila ni Jesus sa pag-ibot niining “sagbot” sa sala sa walay pulos nga pagpasigarbo sa dili pa kini makagamot og lawom sa ilang mga kinabuhi. Samtang gipadayon ni Jesus ang Iyang panag-istoryahanay uban sa mga tinun-an, nagpadayon usab Siya sa paglihok uban sa kalumo, nga nagtul-id sa gamay nilang sayop sa ilang pangatarongan.
Mahinungdanon kining sabton, kay ang atong Ginoo kanunayng nagtinguha sa pagtul-id sa atong sala sa mismong higayon nga kini magsugod. Kon bukas kita sa Iyang malumong mga pag-aghat sa grasya, nga hinayhinayng nagtul-id sa atong mga lihok sa dihang magsugod kitag pagsimang, nan ang atong pagtagad sa Iyang mahigugmaong pagbadlong makatabang kanato nga dili mogamot og mas lawom sa atong sayop, bisan unsa pa kini. Dako kaayog ikatabang niini ang pag-ugmad sa batasan sa makanunayong pagsusi sa kaugalingon. Ang pag-ugmad niini nga batasan nagpasabot nga dili nato tan-awon ang atong Ginoo isip usa ka mapintas ug mapanghimantayong Maghuhukom; hinuon, makita nato Siya sa Iyang kalumo ug pag-atiman. Kining hulagway ni Jesus nga malumong nagdala og usa ka bata atubangan sa mga tinun-an aron tudloan sila bahin sa tinuod nga pagkadako angayng makatabang kanato sa pagkaamgo nga dili gayod kita angay mahadlok niining malumong mga pag-aghat sa grasya.
Pamalandongi karon ang atong Ginoo nga nagpakita sa imong atubangan, nga malumong naghisgot kanimo bahin sa gagmayng mga sala nga imong gipakigbisogan. Siyempre, kinahanglan unang atubangon sa lig-on nga paagi ang tanang grabeng sala. Apan sa dihang maibot na gikan sa imong kinabuhi ang tanang grabeng sala, pagmatngon sa malumo ug maluluy-ong mga pag-aghat sa grasya nga pinaagi niini buot ni Jesus nga ibton ang matag gamayng sala sa pagsugod pa lamang niini, ug bisan ang matag espirituhanong pagkadili-hingpit. Ang pagmatngon niining mga grasya mao ang labing seguradong paagi aron motubo sa pagkabalaan ug tugotan ang atong Ginoo nga mogiya kanimo ngadto sa Iyang mahimayaong kabubut-on, aron mahimo kang tinuod nga halangdon sulod sa Iyang Gingharian.
Akong labing maluluy-on ug malumo nga Jesus, nagpasalamat ako Kanimo sa daghang paagi sa Imong pagduol kanako, nga nagpadayag sa Imong gugma ug grasya. Palihog tabangi ako nga makita sa tin-aw ang mga bahin sa akong kinabuhi nga kinahanglan kong usbon, aron bisan ang sinugdanan sa labing gamay nga sala sa akong kinabuhi maluka. Gihigugma ko Ikaw, akong Ginoo. Tabangi ako nga higugmaon Ka sa tibuok kong kasingkasing. Jesus, misalig ako Kanimo.
Nobena kang Santa Teresita, ang Gamayng Bulak
Septiyembre 22-30
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Santos sa Adlaw – San Vicente de Paul, Pari
Mga Kapilian sa mga Basahon sa Misa
