Septiyembre 28, 2021
Martes sa Ika-26 nga Semana sa Kasagarang Panahon
Mga Pagbasa Karong Adlawa
San Wenceslao, Martir—Opsiyonal nga Handumanan
San Lorenzo Ruiz ug mga Kauban, mga Martir—Opsiyonal nga Handumanan
Paminaw sa Iningles
Sa dihang miabot na ang mga adlaw nga si Jesus pagabayawon ngadto sa langit, lig-on Niyang gituyo ang pagpanaw ngadto sa Jerusalem, ug nagpadala Siya og mga mensahero nga mag-una Kaniya. Lucas 9:51–52
Wala madugay human mosulti si Jesus sa Iyang mga tinun-an mahitungod sa Iyang umaabot nga pag-antos, kamatayon ug pagkabanhaw, mabasa nato nga si Jesus “lig-on Niyang gituyo ang pagpanaw ngadto sa Jerusalem.” Daghan kitag mapamalandongan niining mubo nga pahayag.
Una sa tanan, didto sa Jerusalem nahimutang ang Templo diin gihimo ang mga paghalad og mga mananap sa Daang Tugon isip pasiuna nga hulagway sa usa ug kataposang halad nga moabot. Si Jesus mianhi niining kalibotana isip Kordero sa Diyos, ang Biktima nga Ihalad nga mamatay alang sa atong mga sala. Nasayod Siya sa kataposang tumong sa Iyang kinabuhi dinhi sa kalibotan, ug nasayod Siya nga kini manginahanglan og dakong pag-antos. Kining Iyang pagkahibalo sa Iyang umaabot nga pag-antos mao ang sukaranang konteksto niining teksto karon.
Samtang nagkaduol ang pag-antos ug kamatayon ni Jesus, nagkalig-on ang Iyang determinasyon diha sa Iyang tawhanong kabubut-on sa pagtuman sa kabubut-on sa Amahan pinaagi sa paghalad sa Iyang kinabuhi. Siyempre, kanunayng gituman ni Jesus ang kabubut-on sa Amahan, apan sa hinayhinay nahimong mas dayag sa Iyang pagkatawo ang kalig-on sa Iyang determinasyon. Ang piho nga hiyas nga hinayhinayng napadayag sa Iyang pagkatawo mao ang kaisog. Ang espirituhanong kaisog mao ang labaw sa kinaiyahang katakos sa pagdawat sa kabubut-on sa Amahan kon ang Iyang kabubut-on motultol sa usa ka tawo ngadto sa kinabuhi sa pagsakripisyo. Tungod sa atong tawhanong kinaiya nga nahulog sa sala, may kahilig kita sa paglikay sa pagsakripisyo. Kasagaran maningkamot kita sa paglikay sa panagbangi ug pag-antos ug sa pagpili sa sayon nga dalan sa kinabuhi. Busa, ang pag-atubang sa umaabot nga pag-antos makapukaw sa tentasyon nga mahadlok—ug aron mabuntog kana nga kahadlok, gikinahanglan ang kaisog. Samtang nagkaduol ang Iyang pag-antos, nagkakusog ang tentasyon nga mahadlok ug, tungod niini, mas napadayag ang Iyang hingpit nga hiyas sa kaisog. Timan-i nga si Jesus wala lamang modesisyon nga moadto sa Jerusalem aron ihalad ang Iyang kinabuhi isip sakripisyo; “lig-on Niyang gituyo” ang pagbuhat niini. Walay pagduhaduha, walay pagduda sa kabubut-on sa Amahan, walay pagpanuko, walay kahadlok. Ang Iyang hingpit nga gugma nga andam mosakripisyo hinayhinayng napadayag aron makita sa tanan.
Laing hinungdan nga milig-on ang determinasyon ni Jesus sa pagpanaw ngadto sa Jerusalem mao ang pagpakita sa Iyang gugma ngadto sa Iyang mga tinun-an. Sila usab nagkinahanglan og kaisog. Busa, samtang naminaw sila kang Jesus nga nagsulti mahitungod sa mahitabo sa Jerusalem ug samtang ilang nasaksihan ang Iyang dili matarog nga determinasyon, nadasig usab sila ug nalig-on aron mabuntog ang mga tentasyon nga mahadlok. Siyempre, sa ulahi pa sa ilang kinabuhi nila nahingpit kana nga hiyas, sa dihang misunod usab sila sa mga tunob sa atong Ginoo, nga naghalad sa ilang kaugalingong kinabuhi isip mga martir.
Pamalandongi karon kon unsay hinungdan sa kahadlok ug kabalaka sa imong kaugalingong kinabuhi. Kon kana nga pag-antos resulta sa imong kaugalingong binuhatan, paningkamoti nga matul-id kini. Apan kon kana nga pag-antos usa ka krus nga gitawag ka sa atong Ginoo sa pagdawat uban sa gugma, dawata kini uban sa pagsakripisyo ug dakong determinasyon. Ayaw pagpadaug sa kabug-at sa krus nga gihatag kanimo sa kinabuhi. Ang mga krus nga gitawag kita sa pagdawat kanunayng mahimong mausab ngadto sa grasya. Tugoti nga motubo ang kaisog sulod kanimo ug tugoti nga ang pagpamatuod sa atong Ginoo modasig kanimo samtang naningkamot ka sa pagsundog sa Iyang gugma nga andam mosakripisyo.
Akong maisogong Ginoo, Imong giatubang ang Imong pag-antos uban sa dakong kaisog, kalig-on, pagtugyan ug paglaom. Imong nakita ang bili sa Imong kinabubut-ong pagdawat sa Imong pag-antos ug gipili Mo kini sa tibuok kusog sa Imong kalag. Hatagi ako sa grasya nga akong gikinahanglan, hinigugmang Ginoo, aron ako usab lig-ong mohukom sa pagpanaw padulong sa krus nga gitawag ako sa pagdawat sa akong kinabuhi, aron ang akong kinabubut-ong pagdawat sa akong krus maghiusa kanako nga mas hingpit diha Kanimo. Hesus, misalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Mga Santos Karong Adlawa – San Wenceslaus, Martir—Dili Obligadong Handumanan
San Lawrence Ruiz ug mga Kauban, mga Martir—Dili Obligadong Handumanan
Mga Kapilian sa mga Basahon sa Misa
