Oktubre 14, 2021
Huwebes sa Ikakawhaan ug Walo nga Semana sa Kasagarang Panahon
Mga Pagbasa alang sa Karong Adlawa
San Calixto I, Papa ug Martir—Dili Obligadong Paghandom
Paminaw sa Iningles
Sa pagbiya ni Jesus, ang mga eskriba ug mga Pariseo misugod sa pagpakitag kasuko ngadto Kaniya ug sa pagsukitsukit Kaniya bahin sa daghang butang, kay naglaraw sila sa pagbitik Kaniya pinaagi sa bisan unsang Iyang ikasulti. Lucas 11:53–54
Sa miaging pipila ka adlaw, atong gibasa ang asoy ni San Lucas sa mga pagbadlong ni Jesus nga “Alaut kamo” ngadto sa mga eskriba, mga Pariseo ug mga batid sa balaod. Gitapos sa Ebanghelyo karong adlawa kining mga pagbadlong nga nagagikan sa gugma pinaagi sa pagpakita nga kining mga lider sa relihiyon wala magbag-o sa ilang kasingkasing. Hinuon, misugod sila sa paglaraw batok kang Jesus aron “mabitik Siya pinaagi sa bisan unsang Iyang ikasulti.” Mao kini ang mahitabo kon gamiton sa mga tawo ang balaang balaod sa Diyos ingong hinagiban sa pag-atake.
Kasagaran, nagakuha kita ug inspirasyon gikan sa Balaang Kasulatan sa positibong paagi, nga mao ang pagpamalandong sa mga pulong ug mga buhat ni Jesus ug paggamit niini sa atong kinabuhi. Apan, makakat-on usab kita gikan sa daotang gibuhat sa uban ug motugot nga ang ilang mga buhat mahimong pahimangno kanato aron malikayan ang ilang sala. Sa Ebanghelyo karong adlawa, gidapit kita sa pagpamalandong sa walay hunong nga paglaraw ug daotan niining mga lider sa relihiyon aron masusi nato kon nakasala ba usab kita sama kanila.
Una, timan-i nga sa kataposan sa mga pagbadlong ni Jesus, kining mga lider sa relihiyon “misugod sa pagpakitag kasuko” ngadto kang Jesus. Kasagaran, kon magpakita kita ug kasuko ngadto sa uban, ginabuhat nato kini uban sa pagtuo nga kita ang husto ug sila ang nakabuhat ug sayop. Gipakamatarong nato ang atong kasuko pinaagi sa pagtudlo sa ilang gituohan natong sala. Apan, angay sabton nga ang matag lihok nato nga puno sa kasuko usa ka tin-aw nga timailhan nga nagsugod na kita sa pagsubay sa dalan sa sala ug nga walay katarongan ang atong dili na mabuhian nga paghunahuna niini.
Timan-i usab nga gipadayag niining mga lider sa relihiyon ang ilang kasuko ngadto kang Jesus pinaagi sa pagsukitsukit Kaniya. Sa ato pa, tungod sa ilang kasuko, wala sila mohunong sa pagpangutana Kaniya aron makakaplag ug ikasaway Kaniya. Misulay sila sa paglimbong ug pagbitik Kaniya pinaagi sa ilang mga pulong, gamit ang Balaod mismo sa Diyos nga gitugyan pinaagi kang Moises ug sa mga propeta. Apan gituis nila kana nga Balaod aron ipakamatarong ang ilang kasuko ug, tungod sa garbo, bakak nga pasanginlan si Jesus.
Hinumdomi ang mga higayon sa imong kinabuhi nga daw dili na nimo mabuhian ang paghunahuna sa imong gihukman nga sala sa uban. Sa ingon niini nga kahimtang, ang pagdumot mahimong dili dayag: tingali magpakita ka ug pagkamabination sa gawas, apan sa sulod padayon kang naghunahuna kon unsaon nimo paghukom sa maong tawo. Kasagaran kon mahitabo kini, mobati kita nga makataronganon ang atong gibuhat kay gikombinsir nato ang atong kaugalingon nga kinahanglan ipatuman ang hustisya ug nga kita ang tigpatuman niana nga hustisya. Apan kon ang Diyos mao ang nagdumala sa atong kinabuhi, dili kita Niya tawgon sa walay hunong nga paglaraw ug daotan batok sa uban. Hinuon, kon nagsunod kita sa kabubut-on sa Diyos, mabati nato nga giaghat kita Niya sa paglihok nga walay paglangan, uban sa kalinaw, kalipay, pagkamabination, pagkamatinud-anon, ug kagawasan gikan sa tanang kasuko ug dili na mabuhian nga paghunahuna.
Pamalandongi karon ang bisan unsang paagi nga imong nakita kining sayop nga kahilig sa imong kaugalingong kinabuhi. Kon makahinumdom ka og higayon nga nakigbisog ka sa pagbati og pagdumot ngadto sa uban, tan-awa ang bunga niini. Nahimaya ba ang Diyos pinaagi sa imong mga buhat? Nagbilin ba kini kanimo og kalinaw o kasamok sa kasingkasing? Hingpit bang walay pagpihig ang imong panghunahuna? Tubaga kining mga pangutana sa matinud-anon, ug magsugod ka sa pagkadiskobre sa dalan paingon sa kagawasan gikan sa ingon niana nga dili mahunong nga paghunahuna. Buot sa Diyos nga magmalinawon ka. Kon adunay inhustisya, salig nga ang atong Ginoo maoy mohusay niini. Sa imong bahin, kinahanglan kang padayon nga maningkamot sa pagpasaylo, molihok uban sa gugma, ug ipunting ang imong pagtagad sa kabubut-on sa Diyos samtang kini hinayhinay nga gipadayag kanimo.
Mapailubon ug buotan kong Ginoo, daghan sa relihiyosong mga pangulo sa Imong panahon ang nagpasangil Kanimo og bakak ug nagkondenar Kanimo tungod kay Imong gisulti ang putli nga kamatuoran uban sa gugma, katin-aw ug kaisog. Kon magpakita ako og pagdumot ug kasuko ngadto sa uban, tabangi ako sa pagtalikod niining mga sala aron dili gayod ako magkondenar, dili gayod mohukom ug dili gayod magmanipula sa Imong balaang Balaod alang sa kaugalingon kong mga katuyoan. Pun-a ako sa Imong kalinaw ug gugma lamang, minahal kong Ginoo. Hesus, misalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Santos sa Adlaw – San Callistus I, Papa ug Martir
Mga Kapilian sa mga Basahon sa Misa
_-_WGA06802.jpg){kind=link}