Lunes, Oktubre 18, 2021
Pista ni San Lucas, Ebanghelista
Paminaw sa Iningles
Ang Ginoong Jesus mipili og kapitoan ug duha ka mga tinun-an ug mipadala kanila nga tagurha-urha una Kaniya ngadto sa matag lungsod ug dapit nga Iyang tuyo nga adtoon. Miingon Siya kanila, “Daghan ang alanihon apan diyutay ang mga mamumuo; busa pangayoa sa tag-iya sa alanihon nga magpadala og mga mamumuo alang sa iyang alanihon.” Lucas 10:1–2
Si San Lucas, nga atong gipasidunggan karong adlawa, usa ka tinuod nga ebanghelista. Isip ebanghelista, misunod siya sa inspirasyon gikan sa atong Ginoo ug gigamit aron madala ang makaluwas nga mensahe sa Diyos ngadto sa mga kinatumyan sa yuta. Ug halos walay pagduhaduha nga ang iyang ministeryo magpadayon sa pagbag-o sa kinabuhi sa daghang tawo hangtod sa kataposan sa kalibotan. Sumala sa Tradisyon, si San Lucas namatay nga martir pinaagi sa pagbitay kaniya sa usa ka kahoy nga olibo. Sa Bag-ong Tugon, giila siya nga usa ka mananambal ug tinun-an ni San Pablo. Gituohang siya ang nagsulat sa Ebanghelyo ni Lucas ug sa Mga Buhat sa mga Apostoles.
Si San Lucas sagad gihisgotan isip ebanghelista ngadto sa mga Hentil. Ang iyang Ebanghelyo gisulat sa paagi nga wala magdahom nga ang mga magbabasa adunay bug-os nga pagsabot sa pagtuo ug mga kostumbre sa mga Judio. Busa, gituohan nga kini gisulat ilabina alang sa mga dili Judio og kagikan. Sa ingon, ang kinabuhi ug misyon ni San Lucas kinahanglan magpahinumdom kanato nga ang Ebanghelyo kinahanglang ipaambit sa tanang tawo, ilabina niadtong walay lawom nga relasyon sa Diyos nga nagpalig-on kanila.
Sa Ebanghelyo karong adlawa gikan kang San Lucas, atong mabasa nga gipadala ni Jesus ang kapitoan ug duha ka mga tinun-an “ngadto sa matag lungsod ug dapit nga Iyang tuyo nga adtoon.” Si Lucas lamang ang naghisgot niining mas halapad nga pagpadala sa kapitoan ug duha ka mga tinun-an. Ang ubang mga Ebanghelyo naghisgot lamang sa pagpadala sa Napulog Duha. Bisan tuod daghan niining kapitoan ug duha ka mga tinun-an lagmit miadto sa mga dapit sa mga Judio, ang uban walay duhaduha miadto usab sa mga dapit sa mga dili Judio. Ang misyon niining kapitoan ug duha mao ang pag-andam sa tanan nilang masugat alang sa pagsangyaw ni Jesus ug sa pagtukod sa Gingharian sa Diyos.
Samtang atong gipasidunggan si San Lucas karong adlawa ug gibasa kining tudling gikan sa iyang Ebanghelyo, gipahinumdoman kita nga kitang tanan gipadala sa atong Ginoo. Gipadala kita ngadto sa mga kauban nato sa pagtuo, sama sa pamilya, mga higala ug mga isigkaparokyano. Gipadala kita aron higugmaon sila ug buhaton ang tanan natong mahimo aron matabangan sila nga mapalalom ang ilang pagtuo ug gugma sa Diyos. Apan gitawag usab kita sa pagpaambit sa Ebanghelyo ngadto niadtong wala pa makaila kang Jesus isip ilang Manluluwas. Daghan kaayo kitag masugat matag adlaw nga wala pa gayod makatagbo sa atong Ginoo. Aduna bay mga tawo sa imong kinabuhi nga gitawag ka sa Diyos sa pagduol? Kinsa sa imong mga kaila ang tingali gitawag ka sa Diyos nga paambitan sa Ebanghelyo?
Pamalandongi karong adlawa nga ang Ebanghelyo gituyo alang sa tanan. Pakigsulti sa atong Ginoo ug sultihi Siya nga andam ug kinabubut-on kang magpagamit Kaniya aron madala ang Iyang makaluwas nga mensahe ngadto sa uban. Sa pagbuhat nimo niini, paabota ang Ginoo, paminawa ang Iyang inspirasyon, ug tubaga Siya sa dihang motawag Siya. Kon adunay mosantop sa imong hunahuna nga imong gibati nga gitawag ka sa Diyos sa pagsangyaw sa Ebanghelyo ngadto kaniya, sugdi ang pag-ampo alang nianang tawhana. Iampo siya matag adlaw ug magmatngon sa bisan unsang inspirasyon nga ihatag sa Diyos kanimo aron mapaambit kaniya ang Iyang gugma ug makaluwas nga mensahe. Ayaw kahadlok nga mahimong ebanghelista sama ni San Lucas. Ang pagbuhat niini mahimong magdala og kausaban sa kinabuhi sa usa ka tawo nga adunay dayong sangpotanan.
Ginoo kong Manluluwas, Imong gipadala ang Imong mga tinun-an sa usa ka misyon aron ipaambit sa tanan ang Imong mensahe sa kaluwasan. Karong adlawa, ilabi kong gipasalamatan Ka tungod sa kinabuhi ug ministeryo ni San Lucas. Palihog gamita ako, minahal nga Ginoo, aron sundon ang iyang talagsaong panig-ingnan ug ipaambit sa uban ang Imong mahimayaong kinabuhi. Palihog giyahi ug dasiga ako aron ilabi kong maduolan kadtong Imong gibutang sa akong kinabuhi. Jesus, misalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Pista Karong Adlawa – San Lucas nga Ebanghelista
Mga Kapilian sa mga Basahon sa Misa
