Nobyembre 13, 2021
Sabado sa Ikakatloan ug Duha nga Semana sa Kasagarang Panahon
Mga Pagbasa Karong Adlawa
Santa Frances Xavier Cabrini, Birhen—Handumanan sa USA
Paminaw sa Iningles
Miingon ang Ginoo, “Paminawa ninyo ang giingon sa dili matarong nga maghuhukom. Dili ba diay panalipdan sa Dios ang mga katungod sa Iyang mga pinili nga nagtuaw ngadto Kaniya adlaw ug gabii? Maglangan ba Siya sa pagtubag kanila? Sultihan Ko kamo, sigurohon Niya nga mahatagan sila dayon og hustisya.” Lucas 18:6–8
Makapainteres nga gigamit ni Jesus ang pananglitan sa usa ka dili matarong nga maghuhukom aron ipakita ang kamahinungdanon sa pag-ampo sa Dios, sa pagtuaw ngadto Kaniya adlaw ug gabii alang sa hustisya. Sumala sa sambingay, kining maghuhukom halos walay pagtagad sa usa ka biyuda sa iyang lungsod nga balikbalik nga moduol kaniya aron mangayo og matarong nga hukom. Alang kaniya, kanunay lang siyang gisamok sa biyuda. Tungod kay mapadayonon kaayo kini, ang maghuhukom miingon sa iyang kaugalingon, “…tungod kay kining biyuda sige man og samok kanako, hatagan ko siya og matarong nga hukom aron dili siya sa kataposan moanhi ug mosumbag kanako.” Ang konklusyon ni Jesus gikan niining sambingaya gikutlo sa ibabaw.
Ang yano nga leksiyon nga angay natong makat-onan gikan niining sambingaya mao nga kinahanglan magmapadayonon kita sa pag-ampo. Kanunayng tubagon sa Dios ang atong mga pag-ampo, ug sigurohon Niya nga “mahatag ang hustisya” sa madali. Apan daghang tawo ang nag-ampo ug nag-ampo ug nag-ampo alang sa usa ka kahimtang, nag-ampo gani alang sa hustisya, apan daw wala tubaga sa Dios ang ilang pag-ampo. Busa, ang uban tingali magduhaduha sa saad ni Jesus nga ang mapadayonong pag-ampo kanunayng tubagon ug ang hustisya kanunayng ihatag.
Kon mao kini ang imong kasinatian, hinungdanon kaayo nga pahinumdoman nimo ang imong kaugalingon sa duha ka butang. Una, tinuod ang mga pulong ni Jesus. Kon magmalahutayon kita sa pag-ampo ug mosalig sa Dios, paminawon ug tubagon kita Niya. Mao kini ang dili matarog nga saad sa atong Ginoo. Apan ikaduha, ang “hustisya” nga ihatag sa Dios sagad mahimong lahi sa hustisya nga atong gipaabot. Tingali gusto nato nga may usa nga manubag sa sayop nga iyang gibuhat kanato, apan human sa mainitong pag-ampo, wala matuman sa atong Ginoo ang atong gipaabot. Tungod niini, hinungdanon kaayo nga masayran nato nga tubagon sa Dios ang matag pag-ampo nato, apan sumala sa Iyang hingpit nga kabubut-on ug kaalam. Busa, ang panglantaw sa Dios sa hustisya usahay mahimong lahi kaayo sa atoa. Usahay, ang Iyang hustisya matuman pinaagi sa Iyang pagdapit kanato nga magpakita og madagayaong kalooy. Ang tinuod nga kalooy kanunayng nagtuman sa hustisya.
Pananglitan, hunahunaa ang usa ka tawo nga bastos nga nakigsulti kanimo. Kon imong itugyan kana nga kahimtang sa atong Ginoo, mosulod Siya niini ug mohatag kanimo sa Iyang grasya aron maatubang nimo kini sumala sa Iyang kabubut-on. Tingali pahumokon Niya ang kasingkasing sa maong tawo aron mangayo kini og pasaylo, o tingali, kon dili kini mangayo og pasaylo ug dili mahumok ang iyang kasingkasing, ang tubag sa Diyos sa imong pag-ampo mao ang paghatag kanimo sa grasya sa pagkamapainubsanon aron makahimo ka sa paghigugma nianang tawhana bisan pa sa iyang dili paghinulsol. Bisan unsa pa ang paagi sa pagpangilabot sa atong Ginoo, ang kamatuoran nagpabilin nga mangilabot Siya ug hatagan ka Niya og katakos sa pagtuman sa Iyang hingpit nga kabubut-on. Apan kon ang imong pag-ampo mao nga papanubagon ug hukman nga sad-an ang maong tawo, nan gisulayan nimo pagsulti sa Diyos kon unsay Iyang buhaton, ug dili Niya tugotan ang imong hangyo. Sa kataposan, ang tanan natong pag-ampo kinahanglan magtinguha sa katumanan sa hingpit nga kabubut-on sa Diyos sumala sa Iyang kaalam.
Pamalandongi karon kon unsa ka hingpit ang imong pagsalig sa Diyos. Nahibalo ka ba, uban sa kasigurohan, nga tubagon Niya ang matag pag-ampo nga imong mainitong gihalad uban sa pagtuo sumala sa Iyang balaang kabubut-on? Ang pagtuo niini naghatag og kagawasan ug nagtugot kanimo sa pagpuyo nga mas hingpit nga nahiusa Kaniya. Kon aduna kay suliran nga ginaatubang karon, bisan pa og usa ka daw inhustisya, itugyan kini sa atong Ginoo, adlaw ug gabii nga walay paghunong, ug hibaloi nga ang Iyang grasya mogiya kanimo samtang motubag Siya kanimo sumala sa Iyang kabubut-on.
Ginoo ko nga labing maalamon, hingpit ang Imong kabubut-on sa tanang butang, ug kanunay Mong ihatag kanako ang Imong grasya kon mag-ampo ako nga walay paghunong. Palihog hatagi ako og kasingkasing nga masaligon, minahal nga Ginoo, aron dili gayod ako matarog sa akong paglaom nga kanunay Mong tubagon ang akong mga pag-ampo sumala sa Imong kabubut-on. Jesus, misalig ako Kanimo.
Nobena kang Kristo nga Hari
Nobyembre 12–20, 2021
Dugang nga mga Pamalandong sa Ebanghelyo
Mga Pamalandong sa Diosnong Kalooy
Santos sa Adlaw – Santa Frances Xavier Cabrini, Birhen
Mga Kapilian sa mga Basahon sa Misa
_3.jpg){kind=link}