Nobyembre 22, 2021
Lunes sa Ikakatloan ug Ikaupat nga Semana sa Kasagarang Panahon
Mga Pagbasa alang Karong Adlawa
Santa Cecilia, Birhen ug Martir—Handumanan
Paminaw sa Iningles
“Sa pagkatinuod, sultihan ko kamo, kining kabos nga biyuda mihulog ug labaw pa kay sa tanan; kay ang uban naghalad gikan sa ilang sobrang bahandi, apan siya, bisan sa iyang kakabos, naghalad sa tanan niyang ikinabuhi.” Lucas 21:1–4
Kitang tanan kinahanglan makakita sa atong kaugalingon diha niining kabos nga biyuda pinaagi sa paghalad sa atong “tibuok panginabuhian” kang Kristo. Ang tanan natong nabatonan gasa gikan sa Dios, ug kinahanglan kining ihalad balik ngadto sa Dios, uban sa pagsakripisyo, isip atong gasa ngadto Kaniya. Ang materyal nga halad niining kabos nga biyuda mao ang duha ka gagmayng sensilyo nga gamay ra kaayog bili. Ang tinuod mao nga bisan pa kon ikaw ang labing adunahang tawo sa kalibotan ug imong ihatag ngadto sa Dios ang tanan nimong nabatonan, gamay ra gihapon kaayo kini kon itandi sa gasa nga gihatag kanato sa atong Ginoo. Kitang tanan kabos kon tan-awon sumala sa kahalapad sa grasya sa Dios ug sa Iyang Gingharian. Ang labing dako nga ikahalad ni bisan kinsa kanato gisimbolohan niining duha ka gagmayng sensilyo.
Sa imong pagtan-aw sa imong kaugalingong kinabuhi, unsa ka andam ang imong kasingkasing sa paghatag sa tanan nimong nabatonan ngadto sa atong Ginoo alang sa Iyang himaya ug sa pag-alagad Kaniya? Ang bugtong angay nga “halad” nga gitawag kitang ihatag ngadto sa atong Ginoo mao ang “sakripisyo” sa atong tibuok kinabuhi. Kining espirituhanong kamatuoran lisod kaayong dawaton alang niadtong adunahan kaayo sa mga butang niining kalibotana. Ang materyal nga bahandi nagpasayon sa pagpuyo nga komportable. Ang kuwarta makahatag sa tanang modernong kasayon, kalingawan, kalipay, kalibotanong kasigurohan ug daghan sa mga butang nga ikatanyag niining kalibotana. Apan ang kuwarta dili makapalit sa katagbawan sa kinabuhi. Dili kini makatagbaw kanato sa labing tinuod nga diwa. Mao kini ang hinungdan nga daghang tawo nga nagpuyo sa hilabihan nga kaharuhay dili tinuod nga malipayon.
Ang kalipay makaplagan diha sa pagsakripisyo. Sa piho, makaplagan kini diha sa gugmang andam mosakripisyo, diin atong ipahinungod ang atong tibuok pagkatawo ug ang tanan natong nabatonan ngadto sa bugtong tumong nga mahimaya ang Dios ug mapalambo ang Iyang Gingharian. Ikasubo, kon ang usa ka tawo adunahan sa mga butang niining kalibotana, sayon rang maghunahuna nga ang paghalad sa usa ka bahin sa iyang bahandi, sama sa ikapulo, nagpasabot nga mahimo niyang tipigan ug gamiton ang nahibilin sa bisan unsang paagi nga iyang gusto. Apan dili kana tinuod. Ang hingpit nga paghatag sa atong kaugalingon ngadto sa Dios ug sa pag-alagad Kaniya wala magpasabot nga kinahanglan natong ihatag ang tanan natong kuwarta ngadto sa Simbahan. Apan nagpasabot kini nga atong ihalad ang tanan ngadto sa Dios. Alang sa daghan, kon himoon kining hingpit nga paghalad matag adlaw, giyahan sila sa Dios sa paggamit sa ilang materyal nga mga kapanguhaan sa pagpadako sa ilang pamilya, sa pagtagana sa ilang sukaranang mga panginahanglan, ug, usahay, bisan sa pagpahimulos sa nagkalainlaing kaharuhay sa kinabuhi. Apan ang tinuod nga pangutana mao kon nagkinabuhi ka ba gayod nga giila nga ang tanan nimong nabatonan ug ang imong tibuok pagkatawo iya sa Dios ug kinahanglang gamiton alang sa Iyang himaya ug sa pagpatuman sa Iyang kabubut-on.
Pamalandongi karon kining kabos nga biyuda. Dako kaayong panalangin alang kaniya ang pagbaton ug diyutay ra. Tungod niini, mas sayon alang kaniya nga dili mahigot sa salapi ug sa ubang materyal nga bahandi. Ug niining iyang kagawasan gikan sa pagkahigot, iyang gihatag ang tanan ngadto sa Dios. Iyang gitugyan ang tanan ngadto Kaniya, ug namatikdan kini ni Jesus ug gidayeg siya. Pamalandongi ang tubag sa atong Ginoo kanimo ug sa imong paghalad sa imong kinabuhi ngadto Kaniya. Kon aduna ka pay gidumili sa paghatag ngadto sa atong Ginoo, tugoti nga ang pagpamatuod niining kabos nga biyuda modasig kanimo sa pagpahinungod sa tanan matag adlaw alang sa pag-alagad sa Dios sumala sa Iyang balaang kabubut-on.
Ginoo kong puno sa bahandi, ang Imong mga bahandi mao lamang ang tinuod nga mahinungdanon sa kinabuhi. Imong gihatag ang mga bahandi sa walay kataposang kaluwasan ug ang dili maihap nga ubang mga grasya ngadto sa mga mitugyan sa tanan Kanimo. Tinuod kong gitugyan ang akong kinabuhi Kanimo, hinigugma kong Ginoo. Akong gihatag ang tanan kong gipanag-iya ug ang tibuok kong pagkatawo. Palihog dawata ang halad sa akong kinabuhi ug gamita ako sumala sa Imong balaang kabubut-on. Jesus, misalig ako Kanimo.
Tan-awa ang among mga kapanguhaan alang sa Adbiyento!
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Santos sa Adlaw – Santa Cecilia, Birhen ug Martir
Mga Kapilian sa mga Basahon sa Misa
Gipiling hulagway sa ibabaw: Iyang Gihatag ang Tanan Niyang Nabatonan, pinaagi sa flickr
