Lunes, Disyembre 27, 2021
San Juan nga Apostol ug Ebanghelista—Kapistahan
Ikatulong Adlaw sa Oktaba sa Pasko
Mga Pagbasa Karong Adlawa
Paminaw sa Iningles
Mga hinigugma: Ang diha na sukad sa sinugdan, ang among nadungog, ang among nakita sa among mga mata, ang among gitutokan ug nahikap sa among mga kamot mahitungod sa Pulong sa kinabuhi—kay ang kinabuhi gipadayag; nakita namo kini ug among gipamatud-an ug gimantala kaninyo ang kinabuhing walay kataposan nga diha uban sa Amahan ug gipadayag kanamo—ang among nakita ug nadungog amo karong gimantala kaninyo, aron kamo usab makapakig-ambit kanamo; kay ang among pagpakig-ambit anaa sa Amahan ug sa Iyang Anak, si Jesu-Kristo. Gisulat namo kini aron mahingpit ang among kalipay. 1 Juan 1:1–4
Kining ikatulong adlaw sa Oktaba sa Pasko gipahinungod kang San Juan. Ilabinang angay pasidunggan si San Juan sa panahon sa Pasko tungod kay daghan kaayo sa atong nahibaloan mahitungod sa atong Diyosnong Ginoo nagagikan kaniya. Dili lamang kay gisulat niya ang usa sa upat ka Ebanghelyo, gisulat usab niya ang nagkalainlaing mga sulat nga napreserbar hangtod karon. Ang sulat sa ibabaw gikuha gikan sa unang pagbasa sa Misa karong adlawa.
Niining sulata, gipalanog ni Juan ang iyang gisulat sa unang kapitulo sa iyang Ebanghelyo sa dihang naghisgot siya bahin sa Walay Kataposang Pulong, nga diha na sukad sa sinugdan, nga nahimong unod. Dinhi, iyang gipalanog nga “Ang diha na sukad sa sinugdan…gipadayag kanamo.” Sa ato pa, ang Walay Kataposang Anak sa Amahan nahimong unod aron atong makita. Si Juan usa ka saksi niini.
Sa atong pagpasidungog kang San Juan, maayo nga sulayan nato pagtan-aw ang Pasko gikan sa iyang panglantaw. Sa tibuok niyang kinabuhi, nakapamalandong gayod siya sa dakong misteryo sa Pagpakatawo sa Diyos. Gipamalandongan gayod niya ang kamatuoran nga kining tawhana nga iyang nailhan sa personal ug suod nga paagi diha na sa wala pa ang panahon ug usa sa mga Persona sa Labing Balaang Trinidad. Alang kang Juan, ang Pagpakatawo ilabina gayong tinuod ug makapahingangha, sa paaging personal ug makapausab sa kinabuhi.
Sulayi pagtan-aw si Jesus gikan sa panglantaw ni Juan. Apan ilabina, tan-awa ang Pagpakatawo gikan sa panglantaw ni Juan human mikayab si Jesus sa Langit ug nagpadala sa Espiritu Santo. Sulod sa mga dekada human niadto, gipahinungod ni Juan ang iyang kinabuhi sa pagsangyaw sa Maayong Balita. Gipahinungod niya ang iyang kinabuhi sa pagpamalandong sa dakong misteryo, nga nagtugot sa iyang kaugalingon nga mas tin-aw pang makakita nga ang tawong iyang gikauban sa paglakaw ug pagpakigsulti mao ang Diyos ug tawo. Dili gayod niya matugkad sa hingpit kining dakong misteryo ug padayon gayod siyang nahingangha sa iyang nasinati.
Dugang pa, nabulahan gayod si Juan sa pagpadayon sa “paghikap” sa presensya sa Diyos-Tawo matag higayon nga nagsaulog siya sa Balaang Eukaristiya. Sa hinayhinay, nasabtan gayod niya nga si Jesus hingpit nga anaa uban kaniya pinaagi niining gasa.
Pamalandongi karong adlawa kining dakong Apostol. Paghalad og pag-ampo sa pagpasalamat tungod sa iyang mga sinulat nga puno sa lawom nga pagsabot, ug paningkamoti nga masabtan ang iyang hunahuna ug kasingkasing samtang mapag-ampoon niyang gipamalandongan si Jesus sa tibuok niyang kinabuhi. Usa siya ka gasa sa Simbahan nga atong gipasalamatan karong adlawa.
Ginoo, mahimayaon Ka ug labaw sa akong masabtan. Ang Imong balaang presensya niining kalibotana tinuod nga misteryoso ug makapahingangha. Salamat sa Imong pag-anhi taliwala kanamo ug salamat sa Imong pagpadayag sa Imong Kaugalingon kanamo pinaagi sa mga sinulat ni San Juan nga Apostol. Hinaot nga mas mailhan Ko Ikaw sa lawom nga paagi pinaagi sa tanan niyang gisulat ug hinaot nga kanunay kong sundogon ang iyang panig-ingnan isip usa ka hinigugmang tinun-an. San Juan, iampo mo kami. Jesus, nagsalig ako Kanimo.
Tan-awa ang among mga kapanguhaan alang sa Pasko!
Mga Pamalandong sa Balaang Kasulatan
Dugang nga mga Pamalandong sa Ebanghelyo
Mga Pamalandong sa Diosnong Kalooy
Santos sa Adlaw – San Juan nga Apostol ug Ebanghelista
Mga Kapilian sa mga Basahon sa Misa
Gipiling hulagway sa ibabaw: San Juan nga Ebanghelista ni Domenichino, pinaagi sa Wikimedia Commons
