Biyernes, Disyembre 31, 2021
Ikapitong Adlaw sa Oktaba sa Pasko
Mga Pagbasa alang sa Karong Adlawa
San Silvestre I, Papa—Opsiyonal nga Handumanan
Paminaw sa Iningles
Sa sinugdan mao na ang Pulong, ug ang Pulong kauban sa Dios, ug ang Pulong Dios. Siya sa sinugdan kauban na sa Dios. Ang tanang butang nabuhat pinaagi Kaniya, ug kon wala Siya, walay bisan unsa nga nabuhat. Ang nabuhat pinaagi Kaniya mao ang kinabuhi, ug kining kinabuhia mao ang kahayag sa katawhan; ang kahayag nagdan-ag sa kangitngit, ug ang kangitngit wala makabuntog niini. John 1:1–5
Niining ikapitong adlaw sa Oktaba sa Pasko, gihatagan kita og usa ka misteryo. Ang misteryo sa “Pulong.” Kini nga pinulongan daw gitabonan apan sa samang higayon nagpadayag usab. Gipaila niini si Jesus kanato isip ang “Pulong.” Siya ang Pulong nga misul-ob og unod ug walay kataposan, nga “sa sinugdan kauban na sa Dios.” Nagpadayon ang teksto sa pag-ingon nga ang Pulong Dios ug nga ang Pulong nahimong unod ug mipuyo uban kanato.
Ang tawag nga “Pulong,” nga gihatag kang Jesus niining tekstoha, hubad sa Gregong pulong nga “Logos.” Ang Logos nagpasabot og “laraw,” “rason,” “lohika.” Masabtan usab kini isip pulong nga gilitok. Niining tekstoha, ilabina nga gipadayag kanato nga sukad sa kahangtoran “gilitok” sa Dios ang Iyang hingpit nga laraw sa kaluwasan ug kining kaalam nga gilitok usa ka Persona. Kini nga Persona mao ang Diosnong Anak sa Dios. Busa, sa dihang ang Anak “mosulti” ug sa dihang Siya “gilitok” sa Amahan, ang tanang butang mitungha.
Tingali makalibog gayod kana. Sa pagkatinuod, kabahin kini sa gustong ipasabot. Ang buot ipasabot mao nga kining sinugdanan sa Ebanghelyo ni Juan nagpadayag kanato nga ang buhat sa Dios sa paglalang sa tanang butang ug sa kataposan sa pagtuman sa Iyang kaalam pinaagi sa Pagpakatawo, ang Anak nga nahimong unod, usa ka misteryosong laraw nga labaw pa gayod sa atong masabtan o matugkad. Angay natong tan-awon kining misteryosong pinulongan isip usa ka pahayag sa iyang kaugalingon. Mao kini ang pahayag: Paningkamoti nga masabtan ang misteryo, apan hibaloi nga ang misteryo sa Pasko ug sa Paglalang lapas sa imong katakos sa pagsabot. Bisan pa niana, padayon sa pagpaningkamot nga masabtan ug matugkad kini.
Ang Pasko angay nga panahon sa dakong kalipay ug pagsaulog. Angay kining panahon sa pagpamalandong sa pagkatawo ni Kristo nga Ginoo. Angay natong basahon ang sugilanon, maminaw sa mga awit sa Pasko ug dili isalikway kining tanan hangtod matapos ang panahon sa Pasko. Apan samtang ginabuhat nato kining tanan, angay natong hinumdoman kanunay nga ang Pasko usa ka dakong misteryo sa pagtuo.
Pamalandongi karong adlawa kining mga pulong ni San Juan. “Sa sinugdan mao na ang Pulong…” “Ang Pulong Dios…” “Ang Pulong nahimong unod…” Ilha karong adlawa nga wala nimo masabti sa hingpit kining misteryo, ug sa imong pag-atubang niining kamatuoran, tugoti ang Walay Kataposang Pulong nga modani kanimo ngadto sa usa pa ka lakang nga mas lawom sulod niini samtang nagpadayon kita sa pagsaulog sa mahimayaong Oktaba sa Adlaw sa Pasko.
Ginoong Jesus, Walay Kataposang Pulong sa Amahan, nagpasalamat ako Kanimo sa Imong pag-anhi aron makig-uban kanamo ug sa paghimo sa Imong walay kataposang puluy-anan nga ania sa among taliwala. Salamat sa dakong misteryo sa Pasko. Tabangi ako nga kanunay nga magsaulog niining panahona uban sa dakong kalipay ug pagpasalamat, ug uban usab sa pagbati sa misteryo. Hinaot nga kanunay kong maamgohan nga ang misteryo sa Pasko dili gayod masabtan sa hingpit. Hinaot nga kining misteryo modani kanako nga mas maduol Kanimo matag adlaw aron mas molalom pa ang akong gugma Kanimo, akong walay kataposang Dios. Jesus, misalig ako Kanimo.
Tan-awa ang among mga kapanguhaan alang sa Pasko!
Mga Pamalandong sa Balaang Kasulatan
Dugang nga mga Pamalandong sa Ebanghelyo
Mga Pamalandong sa Diosnong Kalooy
Santos sa Adlaw – San Silvestre I, Papa
Mga Kapilian sa mga Basahon sa Misa
