Enero 31, 2022
Lunes sa Ikaupat nga Semana sa Ordinaryong Panahon
Mga Pagbasa Karong Adlawa
San Juan Bosco, Pari—Paghandum
Paminaw sa Iningles
Sa ilang pagduol kang Jesus, nakita nila ang tawo nga giyawaan kaniadto sa Lehiyon, nga naglingkod didto, nagsul-ob na ug sinina ug maayo na ang pangisip. Ug gilibotan sila sa kahadlok. Marcos 5:15
Kining mubo nga kinutlo nagsunod sa usa ka makapahinganghang asoy. Usa ka batan-ong lalaki, nga nagpuyo taliwala sa mga lubnganan, hingpit nga gigamhan sa daghang mga demonyo. Ang mga demonyo nagpaila sa ilang kaugalingon ingong “Lehiyon,” kay daghan sila. Klaro sa asoy nga kining tawhana mabangis, wala sa hustong pangisip, ug hingpit nga ubos sa gahom niining mga demonyo.
Sa pagpadayon sa asoy, nakigsulti si Jesus sa mga demonyo, gibadlong sila, ug giabog sila pagawas, ug gipabalhin ngadto sa usa ka panon sa mga baboy. Ang mga baboy midagan paubos sa bakilid ug nangalumos sa lanaw. Human niadto, hingpit nang nausab ang tawo samtang naglingkod siya didto nga nakig-estorya sa uban.
Usa ka makapainteres nga angayng matikdan niining asoya mao nga, sa pag-abot sa mga lungsoranon ug sa pagkakita nila niining tawhana nga naglingkod didto nga “maayo na ang pangisip,” nakurat sila ug “gilibotan sa kahadlok.” Wala sila mahibalo kon unsay ilang hunahunaon bahin niining kahimtanga. Ngano man?
Tingali adunay daghang mga hinungdan. Atong tan-awon ang usa niini. Kining batan-ong lalaki dili na gayod makahimo sa pagpuyo sa normal nga paagi tungod kay gigamhan siya sa usa ka lehiyon sa mga demonyo, mao nga giisip na siya sa mga lungsoranon nga wala nay paglaom. Miundang na sila sa paglaom alang kaniya ug lagmit dili na gustong makiglabot kaniya. Nahadlok sila kaniya. Apan sa pagkakita nila niining tawhana nga hingpit nang nausab, naglingkod didto nga daw normal na ug makataronganon, wala mahibalo ang mga tawo kon unsay ilang hunahunaon. Nakurat sila. Ug ang ilang pagkakurat nahimong kahadlok tungod kay nahadlok sila sa wala nila masabti.
Kini nagpadayag kanato og usa ka makapainteres nga kamatuoran. Nagpadayag kini nga, kon dili nato masabtan ang gahom sa Dios, mahadlok hinuon kita sa Iyang gahom kon atong masaksihan kini. Ang mga lungsoranon unta napuno sa dakong kalipay ug kahinam sa hingpit nga pagbag-o niining tawhana. Apan, imbes nga dakong kalipay ug kahinam, kahadlok ang ilang gibati. Nahadlok sila tungod kay wala nila masabti ang labing gamhanang gahom sa Dios.
Pamalandongi karon ang gahom ug himaya sa Dios. Nagtinguha Siya sa pagbuhat og dagkong mga butang ug sa pagdala og hingpit nga pagbag-o sa imong kinabuhi. Nagtinguha Siya sa pag-abog sa daotan nga nagtago dinhi sa atong kalibotan, ug sa pagdala hinuon sa Iyang kalooy ug kalinaw. Samtang namalandong ka sa gahom sa Dios, tugoti ang imong kaugalingon nga mas tin-aw Siyang masabtan. Kon masabtan nimo Siya, mas andam ka sa pagmaya sa Iyang maayong mga buhat.
Labing gamhanan ug mahimayaong Dios, nagmaya ako sa Imong walay kinutobang gahom. Nagmaya ako sa Imong pagkahalangdon ug himaya. Tabangi ako nga makita ang daghang mga paagi sa Imong paglihok dinhi sa among kalibotan ug sa kinabuhi sa mga tawo sa akong palibot. Samtang makita nako ang Imong gahom nga naglihok aron sa pagbag-o, pun-a ang akong kasingkasing sa pagpasalamat alang sa tanan Mong gibuhat. Jesus, misalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Santos sa Adlaw – San Juan Bosco, Pari
Mga Kapilian sa mga Basahon sa Misa
_-_James_Tissot.jpg){kind=link}