Abril 27, 2022
Miyerkules sa Ikaduhang Semana sa Pasko sa Pagkabanhaw
Mga Pagbasa Karong Adlawa
Paminaw sa Iningles
Ug mao kini ang hukom: miabot ang kahayag sa kalibotan, apan gipalabi sa mga tawo ang kangitngit kay sa kahayag, tungod kay daotan ang ilang mga buhat. John 3:19
Pagkatingalahang butanga nga tinuod gayod kini. Gipadala sa Dios nga Amahan ang Anak nganhi sa kalibotan aron mahimong Kahayag alang kanatong tanan. Siya ang Kahayag nga nagwagtang sa tanang kangitngit. Apan, sumala sa Ebanghelyo sa ibabaw, “gipalabi sa mga tawo ang kangitngit kay sa kahayag.” Gipalabi nila ang ilang kaugalingong mga sala kay sa kagawasan gikan sa sala. Ngano man?
Isip pananglitan niining kamatuoran, igo lang kitang motan-aw sa balita o mobasa sa pamantalaan. Daw 90% sa gitaho sa mga tigbalita mao ang pagpasiugda sa kangitngit sa paagi nga makapukaw og hilabihang interes. Makadungog kita og sunodsunod nga mga pagpatay o sunodsunod nga mga eskandalo. Nganong mao man kini ang gitutokan pag-ayo sa midya? Kay mao man kini ang halinon. Ug nganong halinon man kini? Kay kasagaran mas madani kita sa kangitngit kay sa kahayag.
Siyempre, dili ingon niini ang tanan. Daghan ang wala gayoy interes sa kangitngit sa kalibotan ug sa mga sala sa atong palibot nga gipasiugda aron makapukaw og hilabihang interes. Apan ang kamatuoran nga ang kangitngit sa daotan maoy kanunayng gipasiugda ug gitutokan angay magsilbing pahimangno kanato mahitungod sa atong tawhanong kinaiya nga nahulog sa sala. Hilig kitang madani ngadto sa lapok, ug kasagaran malipayon pa kaayo kitang magpabilin didto.
Ang Pasko sa Pagkabanhaw usa ka panahon sa pagsusi kon unsa ang nakadani kanimo. Gitugotan ba nimo ang imong kaugalingon nga madani ngadto sa Kahayag? Nadani ka ba sa mga butang nga naghatag og kahayag sa imong adlaw? Nadani ka ba sa daghang paagi nga ang Dios anaa ug naglihok sa kalibotan sa imong palibot? Hinaot nga mao kana. Apan lagmit aduna gihapoy pipila ka pagdani ngadto sa kagubot, sala ug kangitngit. Mahimong adunay panagbangi sa sulod nga masinati sa matag usa. Maayo nga maamgohan kini, mailhan kini isip kabahin sa atong tawhanong kahiligang nahulog sa sala, ug maningkamot nga iwagtang ang tanang interes sa kagubot ug kadaotan sa atong palibot.
Isip mga sumusunod ni Kristo, gitawag kita sa pagtutok sa atong mga mata ngadto Kaniya ug Kaniya lamang. Gitawag kita sa paglusot sa kangitngit pinaagi sa atong pagtuo ug sa pagtugot nga ang atong tibuok pagkatawo madani ug mapaduol kang Kristo Jesus. Ang kahingpitan nagpasabot nga bisan ang atong mga pagbati ug mga tinguha sa kataposan madani ngadto kang Kristo isip Kahayag sa atong kinabuhi.
Pamalandongi karon kon unsa ang labing nakadani kanimo. Itugyan ang imong kaugalingon ngadto sa Kahayag niining Panahon sa Pasko sa Pagkabanhaw. Ipalayo ang imong mga mata gikan sa tentasyon nga madani ug mahumaling sa kadaotan sa atong palibot, ug itutok kini sa malipayong panan-aw sa atong Nabanhaw nga Ginoo nga buhi ug naglihok sa atong palibot. Tugoti kining Kahayag nga mogiya sa imong adlaw-adlaw nga kinabuhi.
Ginoo sa Kahayag, tabangi ako nga magkinabuhi diha sa Imong kahayag. Tabangi ako nga magpabiling malig-on ang pagtutok sa akong mga mata sa himaya sa Imong Pagkabanhaw. Hinaot nga ang kalipay nianang pagtutok makapahilayo kanako gikan sa dili maihap nga mga pagbalda sa kadaotan sa akong palibot. Jesus, misalig ako Kanimo.
Mga Pag-ampo sa Pasko sa Pagkabanhaw
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Santos/Kasaulogan Karong Adlawa
Mga Kapilian sa mga Basahon sa Misa
