Abril 29, 2022
Biyernes sa Ikaduhang Semana sa Pasko sa Pagkabanhaw
Mga Pagbasa Karong Adlawa
Santa Catalina sa Siena, Birhen ug Doktor sa Simbahan—Handumanan
Paminaw sa Iningles
Sa dihang miyahat si Jesus ug nakita Niya ang dakong panon sa katawhan nga nagpadulong Kaniya, miingon Siya kang Felipe, “Asa man kita makapalit ug igong pagkaon aron sila makakaon?” Gisulti Niya kini aron sulayan si Felipe, kay Siya mismo nahibalo na sa Iyang buhaton. John 6:5–6
Ang Dios kanunayng nahibalo sa Iyang buhaton. Kanunay Siyang adunay hingpit nga plano alang sa atong kinabuhi. Sa tanang higayon. Sa teksto sa ibabaw, atong mabasa ang usa ka mubo nga bahin sa milagro sa pagpadaghan sa mga tinapay ug isda. Nahibalo si Jesus nga Iyang padaghanon ang pipila ka tinapay ug isda nga anaa kanila ug pakan-on ang kapin sa lima ka libo ka tawo. Apan sa wala pa Niya kini buhata, gusto Niyang sulayan si Felipe, ug mao kana ang Iyang gibuhat. Nganong gisulayan man ni Jesus si Felipe, ug nganong sulayan man usab Niya kita usahay?
Dili tungod kay gustong mahibalo si Jesus kon unsay isulti ni Felipe. Ug dili usab tungod kay gidula-dulaan lang Niya si Felipe. Hinuon, gigamit Niya kini nga higayon aron ikapakita ni Felipe ang iyang pagtuo. Busa, sa pagkatinuod, kining “pagsulay” kang Felipe usa ka gasa alang kaniya kay naghatag kini kaniya ug higayon nga makapasar sa pagsulay.
Ang pagsulay mao ang paghatag kang Felipe ug higayon nga molihok pinasikad sa pagtuo imbes sa tawhanong pangatarongan lamang. Tinuod, maayo ang paggamit sa makataronganong panghunahuna. Apan kasagaran, ang kaalam sa Dios labaw pa sa tawhanong pangatarongan. Sa laing pagkasulti, gidala niini ang pangatarongan ngadto sa lahi gayod nga ang-ang. Gidala kini ngadto sa ang-ang diin giapil na ang pagtuo sa Dios sa paghunahuna.
Busa niadtong higayona, gitawag si Felipe sa pagtanyag ug solusyon nga nag-isip sa kamatuoran nga ang Anak sa Dios anaa uban kanila. Apan wala siya makapasar sa pagsulay. Iyang gipunting nga ang suhol sa duha ka gatos ka adlaw dili pa igo aron mapakaon ang panon. Apan daw misaklolo si Andres. Miingon si Andres nga adunay usa ka batang lalaki nga may pipila ka tinapay ug isda. Ikasubo, midugang siya, “apan unsa ra man kini alang sa ingon kadaghan nga tawo?”
Apan kining gamayng aligato sa pagtuo ni Andres igo na alang kang Jesus aron palingkoron ang mga panon ug buhaton ang milagro sa pagpadaghan sa pagkaon. Daw nasabtan ni Andres, bisan gamay lamang, nga angayng hisgotan kining pipila ka tinapay ug isda. Gidawat ni Jesus kining gipakita ni Andres, ug Siya na ang nag-atiman sa tanan pang nahibilin.
Pamalandongi karon ang bililhong gasa sa pagtuo, bisan gamay lamang kini. Kasagaran, maanaa kita sa lisod nga mga kahimtang diin wala kita mahibalo kon unsay buhaton. Kinahanglan kitang maningkamot nga adunay bisan gamayng pagtuo aron adunay magamit si Jesus sa Iyang pagbuhat. Oo, tingali dili nato hingpit nga makita ang tanan Niyang gustong buhaton, apan kinahanglan aduna kitay bisan gamayng pagsabot sa direksiyon nga gitultolan sa Dios. Kon ikapakita nato bisan kining gamayng pagtuo, kita usab makapasar sa pagsulay.
Ginoo, tabangi ako nga motuo sa Imong hingpit nga plano alang sa akong kinabuhi. Tabangi ako nga mahibalo nga Ikaw gihapon ang nagbuot sa tanan bisan kon daw wala nay makapugong sa mga panghitabo sa kinabuhi. Niadtong mga higayona, hinaot nga ang pagtuo nga akong ikapakita mahimong gasa alang Kanimo aron Imo kining magamit alang sa Imong himaya. Jesus, misalig ako Kanimo.
Mga Pag-ampo sa Pasko sa Pagkabanhaw
Dugang nga mga Pamalandong sa Ebanghelyo
Mga Pamalandong sa Diosnong Kalooy
Santos sa Adlaw – Santa Catalina sa Siena, Birhen ug Doktor sa Simbahan
Mga Kapilian sa mga Basahon sa Misa
