Mayo 15, 2022
Ikalimang Domingo sa Pasko sa Pagkabanhaw (Tuig C)
Mga Pagbasa Karong Adlawa
Paminaw sa Iningles
Sa dihang mibiya na si Judas kanila, miingon si Jesus, “Karon gihimaya na ang Anak sa Tawo, ug ang Dios gihimaya diha kaniya.” Juan 13:31
Mahinungdanon nga mahibaloan nato ang kataposan sa sugilanon. Nahibalo si Jesus sa kataposan sa dihang gisulti Niya kining mga pulonga ngadto sa mga Apostoles sa Kataposang Panihapon, human gayod mobiya si Judas aron sa pagbudhi Kaniya. Mahinungdanon nga tan-awon nato kini nga kahimtang sumala sa pagsabot ni Jesus niini. Sa tawhanong panglantaw lamang, usa sa labing suod nga mga higala ni Jesus hapit nang mobudhi Kaniya tungod sa kuwarta. Alang sa kadaghanan kanato, makadugmok kini sa kasingkasing ug mahimong hinungdan sa kasuko ug kasakit. Apan tungod kay nahibalo si Jesus sa kataposan sa sugilanon, nakita Niya ang pagbudhi ni Judas isip paagi ngadto sa Iyang paghimaya, dili sa Iyang kapildihan. Gipunting Niya ang Iyang panan-aw ngadto sa Langit ug sa tanan nga Iyang matuman pinaagi sa Iyang pag-antos, imbes nga tutokan ang kasakit nga hapit na Niyang maagian.
Kini usa ka gamhanang pagtulon-an alang kanatong tanan. Una, mahinungdanon nga atong tan-awon ang paghimaya ni Jesus pinaagi sa pagbudhi Kaniya, sa Iyang pag-antos ug kamatayon. Apan kinahanglan usab kitang maningkamot nga makita ang mahimong bunga sa atong kaugalingong mga pag-antos kon iusa kini sa Manluluwas sa Kalibotan.
Unsa ang imong reaksiyon kon adunay makasala batok kanimo? Unsa kaha ang imong reaksiyon kon budhian ni Judas ang imong gugma? Lisod kaayo nga tubagon kini nga pangutana sa matinud-anon, ug mas lisod pa gayod nga sundogon sa kinabuhi ang tubag ni Jesus. Ang tinuod mao nga sa matag higayon nga daogdaogon kita sa uban, gihatagan kita og higayon sa paghimaya sa Dios ug pagpalapad sa Gingharian sa Langit pinaagi sa pagpasaylo, paghiusa sa atong pag-antos sa pag-antos ni Cristo, ug pagpakita og kaluoy. Mas sayon kining isulti kay sa buhaton.
Pamalandongi karon kini nga talan-awon sa Ebanghelyo. Tan-awa si Judas nga mibiya sa Kataposang Panihapon ug migawas ngadto sa kangitngit sa kagabhion aron sa pagbudhi sa atong Ginoo. Apan tan-awa kini sumala sa pagtan-aw ni Jesus niini. Tan-awa kini uban sa pagsabot nga mao kini ang paagi nga gipili sa Amahan aron dad-on ang kaluwasan ngadto sa kalibotan. Pamalandongi usab ang matag higayon nga gihatag kanimo aron buhaton ang gibuhat ni Jesus. Paningkamoti nga mahimong konkreto ug piho, ug tan-awa ang matag pag-antos nga imong maagian isip usa ka mahimayaong higayon sa pagpaambit sa kaluoy sa Dios. Bisan tuod lisod kini sa sinugdan, kining buhat sa gugma mao ang mohatag og dakong himaya sa Amahan sa Langit!
Minahal kong Ginoo, gibudhian Ka pinaagi sa halok sa usa sa Imong labing suod nga mga higala. Apan sa Imong hingpit nga kaalam, nakita Nimo kini nga pagbudhi isip hingpit nga higayon sa paghimaya sa Amahan pinaagi sa Imong kaluoy ug pagpasaylo. Ginoo, ako usab nakabudhi Kanimo sa dili maihap nga mga higayon. Tungod niini, nagbasol ako. Apan nagpasalamat ako Kanimo sa Imong paghigugma ug pagpasaylo kanako uban sa Imong Kasingkasing nga puno sa hingpit nga kaluoy. Tabangi ako sa pagdawat niana nga kaluoy ug sa pagpaambit niini ngadto sa uban nga nakasala batok kanako. Jesus, nagsalig ako Kanimo.
Dugang pang mga Video nga Pamalandong sa Ebanghelyo sa Domingo
Mga Pag-ampo sa Pasko sa Pagkabanhaw
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Santos/Kasaulogan Karong Adlawa
Mga Kapilian sa mga Basahon sa Misa
Pangunang Hulagway: Ang Kataposang Panihapon Ni Carl Bloch, pinaagi sa Wikimedia Commons
