Hunyo 13, 2022
Lunes sa Ikanapulog Usa nga Semana sa Kasagarang Panahon
Mga Pagbasa Karong Adlawa
San Antonio sa Padua, Pari ug Doktor sa Simbahan—Handumanan
Paminaw sa Iningles
“Apan Ako nagaingon kaninyo, ayaw pagsukol sa tawong daotan. Kon adunay mosagpa kanimo sa imong tuong aping, itanyag usab kaniya ang pikas.” Matthew 5:39
Lisod dawaton kining pagtulonana!
Mao ba gayod kini ang gipasabot ni Jesus? Kasagaran, kon adunay makasala kanato o makapasakit kanato, dali kitang mangitag mga katarongan aron isalikway kining teksto sa Ebanghelyo ug maghunahuna nga dili kini magamit sa atong kahimtang. Oo, lisod tuohan kining pagtulonana ug mas lisod pa gayod kining isabuhay.
Unsay buot ipasabot sa “pagpatanyag sa pikas aping?” Una, kinahanglan natong tan-awon kini sa literal nga kahulogan niini. Tinuod gayod ang gipasabot ni Jesus sa Iyang gisulti. Siya ang hingpit nga panig-ingnan niini. Dili lamang kay gisagpa Siya sa aping, apan bangis usab Siyang gikulata ug gilansang sa krus. Ug ang Iyang tubag mao kini, “Amahan, pasayloa sila, kay wala sila mahibalo sa ilang gibuhat.” Busa, wala kita tawga ni Jesus sa pagbuhat sa bisan unsang butang nga Siya Mismo dili andam buhaton.
Ang pagpatanyag sa pikas aping wala magpasabot nga kinahanglan natong tabonan ang mapang-abusong mga buhat o mga pulong sa uban. Dili kita angay magpakaaron-ingnon nga wala silay nabuhat nga sayop. Si Jesus Mismo, sa Iyang pagpasaylo ug sa Iyang paghangyo sa Amahan nga pasayloon sila, miila sa grabeng inhustisya nga Iyang giantos sa mga kamot sa mga makasasala. Apan ang labing hinungdanon mao nga wala Niya tugoti ang Iyang kaugalingon nga madala sa ilang daotang tuyo.
Kasagaran, kon mobati kita nga daw gilabayag lapok sa uban, matintal kitang mobalos usab og labay. Matintal kitang makig-away ug mobatok sa nagdaogdaog kanato. Apan ang yawe sa pagbuntog sa daotang tuyo ug kabangis sa uban mao ang pagdumili nga madala kita ngadto sa maong lapok. Ang pagpatanyag sa pikas aping maoy usa ka paagi sa pag-ingon nga dili nato ipaubos ang atong kaugalingon ngadto sa walay hinungdang lalis o panagbingkil. Dili kita mopatol sa dili makataronganong panggawi kon makasugat kita niini. Hinuon, pilion nato nga tugotan ang uban sa pagpadayag sa ilang daotang tuyo ngadto sa ilang kaugalingon ug sa uban pinaagi sa malinawong pagdawat niini ug pagpasaylo.
Wala kini magpasabot nga gusto ni Jesus nga magpabilin kita hangtod sa hangtod sa mapang-abusong mga relasyon nga labaw na sa atong maarangan. Apan nagpasabot kini nga kitang tanan makasinati og inhustisya matag karon ug unya, ug kinahanglan natong atubangon kini uban sa kalooy ug dihadiha nga pagpasaylo, ug dili magpadala sa pagbalos og daotan batok sa daotan.
Pamalandongi karon ang bisan unsang relasyon nga lisod alang kanimo. Ilabi nang pamalandongi kon unsa ka kaandam sa pagpasaylo ug pagpatanyag sa pikas aping. Ang pagbuhat niini mahimong maghatag kanimo sa kalinaw ug kagawasan nga imong gipangita nianang relasyona.
Akong mapinasayloong Ginoo, tabangi ako sa pagsundog sa Imong dakong kalooy ug pagpasaylo. Tabangi ako sa pagpasaylo niadtong nakapasakit kanako ug tabangi ako nga dili magpadaog sa bisan unsang inhustisya nga akong masugatan. Jesus, ako misalig Kanimo.
Nobyena sa Balaang Kasingkasing
Mga petsa sa nobyena:Hunyo 15-23, 2022
Hunyo 24, 2022: Solemnidad sa Balaang Kasingkasing
Dugang nga mga Pamalandong sa Ebanghelyo
Mga Pamalandong sa Diosnong Kalooy
Santos sa Adlaw – San Antonio de Padua, Pari ug Doktor sa Simbahan
Mga Kapilian sa mga Basahon sa Misa
Hulagway nga gipakita sa ibabaw: Ang Pagkorona og mga Tunok ni Caravaggio, gikan sa Wikipedia
