Hulyo 30, 2022
Sabado sa Ikanapulog-pito nga Semana sa Ordinaryong Panahon
Mga Pagbasa Karong Adlawa
San Pedro Crisologo, Obispo ug Doktor sa Simbahan—Opsiyonal nga Handumanan
Paminaw sa Iningles
“Ihatag kanako dinhi sa usa ka bandehado ang ulo ni Juan Bautista.” Mateo 14:8
Makapasubo gayod kadto nga adlaw, ug kulang pa gani kana nga paghulagway. Gipunggotan sa ulo si San Juan Bautista tungod sa hangyo ni Salome, ang anak ni Herodias. Nabilanggo si Juan tungod sa iyang pagsulti sa kamatuoran ngadto kang Herodes bahin sa kaminyoon niini, ug napuno si Herodias sa pagdumot kang Juan. Busa gipasayaw ni Herodias ang iyang anak atubangan ni Herodes ug sa mga bisita niini. Nalipay pag-ayo si Herodes ug misaad kang Salome nga ihatag kaniya bisan pa ang katunga sa iyang gingharian. Apan hinuon, ang iyang gipangayo mao ang ulo ni Juan Bautista.
Bisan sa unang pagtan-aw, talagsaon ug makapakurat kini nga hangyo. Gisaad kang Salome bisan pa ang katunga sa gingharian apan, hinuon, iyang gipangayo ang kamatayon sa usa ka maayo ug balaang tawo. Sa pagkatinuod, miingon si Jesus bahin kang Juan nga walay natawo sa babaye nga labaw pa kaniya. Busa nganong dako man kaayo ang pagdumot ni Herodias ug sa iyang anak?
Kining makapasubong hitabo nagpakita sa gahom sa kasuko sa labing grabeng porma niini. Kon ang kasuko magpundo ug magkadako, makamugna kini og hilabihang kusog nga pagbati, hangtod nga mosalipod kini sa panghunahuna ug pangatarongan sa usa ka tawo. Ang pagdumot ug pagpanimalos mahimong mopatigbabaw sa usa ka tawo ug modala kaniya ngadto sa hingpit nga kabuangan.
Dinhi, si Herodes nagpakita usab og hilabihang kakulang sa maayong pangatarongan. Napugos siya sa pagbuhat sa dili niya gustong buhaton tungod kay nahadlok siyang mobuhat sa husto. Nadaog siya sa pagdumot nga anaa sa kasingkasing ni Herodias ug, tungod niini, miuyon siya sa pagpatay kang Juan, nga sa pagkatinuod daw iyang nagustohan ug gikahimut-an nga paminawon.
Kasagaran, mangita kita og inspirasyon gikan sa maayong panig-ingnan sa uban. Apan, niining kahimtanga, makita nato nga mahimo kitang “madasig” sa laing paagi. Ang nahitabo sa pagpatay kang Juan angay natong himuong higayon sa pagsusi sa atong mga pakigbisog batok sa kasuko, kasuko nga gitipigan sa dughan, ug ilabina sa pagdumot. Ang pagdumot usa ka mangil-ad nga pagbati nga mahimong hinayhinayng mosulod ug makapahinabog dakong kadaot sa atong kinabuhi ug sa kinabuhi sa uban. Bisan ang unang mga timailhan niining dili hustong pagbati angay nang ikompisal ug buntogon.
Pamalandongi karon kon aduna ka bay nakitang pagdumot sa imong kasingkasing. Aduna ka bay gitipigang kalagot o kapait sa buot nga wala gihapoy mawala? Nagkadako ba kana nga pagbati ug nakadaot sa imong kinabuhi ug sa kinabuhi sa uban? Kon mao, paghukom nga buhian kini ug magpasaylo. Mao kana ang hustong buhaton.
Ginoo kong naghatag og kagawasan, hatagi ako sa grasya nga akong gikinahanglan aron masusi ko ang akong kasingkasing ug makita ang bisan unsang kahilig sa kasuko, pagtipig og kalagot, ug pagdumot. Palihog putlia ako gikan niini ug hatagi ako og kagawasan. Jesus, misalig ako Kanimo.
Sugod sa Domingo, Hulyo 31:
Ordinaryong Panahon: Mga Semana 18-34
Dugang nga mga Pamalandong sa Ebanghelyo
Mga Pamalandong sa Diosnong Kalooy
Santos sa Adlaw: San Pedro Crisologo
Mga Kapilian sa mga Pagbasa sa Misa
Pangunang Hulagway: Caravaggio, Publikong dominyo, pinaagi sa Wikimedia Commons
