Septiyembre 1, 2022
Huwebes sa Ikakawhaag-Duhang Semana sa Ordinaryong Panahon
Mga Pagbasa Karong Adlawa
Paminaw sa Iningles
Sa dihang nahuman na Siya sa pagsulti, miingon Siya kang Simon, “Palawod ngadto sa lawom ug itaktak ang inyong mga pukot aron manakop.” Mitubag si Simon, “Magtutudlo, tibuok gabii kaming naghago apan wala gayod kamiy nakuha, apan tungod sa Imong sugo itaktak ko ang mga pukot.” Sa dihang gihimo nila kini, daghan kaayo silag nadakop nga isda ug hapit na magisi ang ilang mga pukot. Lucas 5:4-6
“Palawod ngadto sa lawom…” Dako kaayog kahulogan kining mubo nga mga pulong.
Una sa tanan, mahinungdanong hinumdoman nga ang mga Apostoles nangisda sa tibuok gabii apan wala gayoy nakuha. Lagmit nasagmuyo sila kay wala silay nakuha nga isda ug dili na kaayo sila andam nga mangisda pag-usab. Apan gisugo ni Jesus si Simon nga buhaton kini, ug mituman siya. Ingong resulta, mas daghan pa ang ilang nadakop nga isda kay sa ilang gihunahuna nga ilang makaya.
Apan ang usa ka simbolikong kahulogan nga dili nato angay palabyon mao nga gisultihan ni Jesus si Simon nga mopalawod ngadto sa “lawom.” Unsay buot ipasabot niini?
Kini nga teksto dili lamang mahitungod sa pisikal nga milagro sa pagdakop ug isda; labaw pa niini, mahitungod kini sa misyon sa pag-ebanghelyo sa mga kalag ug sa pagtuman sa misyon sa Dios. Ug ang simbolismo sa pagpalawod ngadto sa lawom nagsulti kanato nga kinahanglan natong ihatag ang atong tibuok kaugalingon ug hingpit nga ipahinungod kini kon buot natong mag-ebanghelyo ug ipakaylap ang Pulong sa Dios sumala sa pagtawag kanato.
Kon maminaw kita sa Dios ug molihok sumala sa Iyang pulong, nga hingpit ug lawom natong ipahinungod ang atong kaugalingon sa Iyang kabubut-on, maghatag Siya ug dagayang kuha sa mga kalag. Kining “kuha” moabot sa wala damhang paagi ug sa wala damhang panahon, ug klaro gayod nga kini buhat sa Dios.
Apan hunahunaa kon unsay mahitabo unta kon mikatawa si Simon ug miingon kang Jesus, “Pasayloa ko, Ginoo, nahuman na kog pangisda karong adlawa. Tingali ugma na lang.” Kon ingon niini pa ang gibuhat ni Simon, dili gayod unta siya mapanalanginan niining dagayang kuha. Mao usab kini alang kanato. Kon dili kita maminaw sa tingog sa Dios sa atong kinabuhi, ug dili motuman sa Iyang mga sugo nga nangayo sa hingpit natong pagtugyan, dili kita mahimong Iyang galamiton sa paagi nga Iyang gitinguha.
Pamalandongi karon ang imong kaandam sa paglihok sumala sa tingog sa Manluluwas. Andam ka bang moingon ug “Oo” Kaniya sa tanang butang? Andam ka bang mosunod sa hingpit sa giya nga Iyang gihatag? Kon mao, mahingangha ka usab sa Iyang buhaton sa imong kinabuhi.
Ginoo, nagtinguha akong mopalawod ngadto sa lawom ug mag-ebanghelyo sa hingpit sumala sa paagi nga Imong gitawag kanako. Tabangi akong moingon ug “Oo” Kanimo sa tanang butang. Jesus, misalig ako Kanimo.
Apil sa among sunod nga nobena, sugod sa Septiyembre 7:
Nobena sa Birhen sa mga Kasakit
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Santos/Kasaulogan Karong Adlawa
Mga Kapilian sa mga Basahon sa Misa
