Skrupulosidad 

Setyembre 3, 2022
Sabado sa Ika-kawhaan ug Duha nga Semana sa Kasagarang Panahon
Mga Pagbasa alang Karong Adlawa

San Gregorio nga Bantogan, Papa ug Doktor sa Simbahan—Handumanan

Bidyo

Usa ka adlaw nga Igpapahulay, samtang si Jesus nag-agi sa usa ka umahan sa trigo, ang Iyang mga tinun-an nangutlo og mga uhay, gikuskos kini sa ilang mga kamot, ug gikaon ang mga lugas.  Miingon ang pipila ka Pariseo, “Nganong gibuhat man ninyo ang gidili sa Adlaw nga Igpapahulay?”  Lucas 6:1-2

Pagkagamayg utok!  Gigutom ang mga tinun-an; lagmit dugay-dugay na silang naglakaw uban kang Jesus sa dihang nakaagi sila og trigo ug nangutlo aron kaonon samtang naglakaw.  Ug tungod niining ordinaryo kaayong buhat, gihukman sila sa mga Pariseo.  Nakalapas ba gayod sila sa balaod ug nakapasakit sa Dios pinaagi sa pagpangutlo ug pagkaon niining mga lugas?

Gipatin-aw sa tubag ni Jesus nga nasayop gayod ang pagsabot sa mga Pariseo ug walay sayop nga gibuhat ang mga tinun-an.  Apan kini nga teksto naghatag kanato og higayon sa pagpamalandong sa usa ka espirituhanong peligro nga usahay mahulog ang pipila ka tawo.  Kini mao ang peligro sa skrupulosidad.  

Wala kita mahibalo kon mao ba kini ang nahitabo, apan kon usa o daghan sa mga tinun-an nakigbisog sa skrupulosidad ug unya nakadungog sa mga Pariseo nga naghukom kanila tungod sa pagkaon sa mga lugas, tingali diha-diha silang gibati og pagbasol ug pagkasad-an sa ilang gibuhat.  Tingali nagsugod sila sa pagkahadlok nga nakalapas sila sa sugo sa Dios nga balaanon ang Adlaw nga Igpapahulay.  Apan kinahanglan nilang makita ang ilang skrupulosidad sumala sa tinuod nga kinaiya niini, ug kinahanglan nilang mailhan ang hinungdan nga nagtintal kanila ngadto sa skrupulosidad.

Ang “hinungdan” nga nagtintal kanila mao ang sobra ug sayop nga pagtan-aw sa balaod sa Dios nga gipresentar sa mga Pariseo.  Oo, hingpit ang balaod sa Dios ug kinahanglang sundon kanunay hangtod sa kataposang letra niini.  Apan alang niadtong nakigbisog sa skrupulosidad, ang ilang pagsabot sa balaod sa Dios daling mahimong hiwi ug mapasobrahan.  Ang tawhanong mga balaod ug ang sayop nga pagpresentar sa mga tawo sa balaod sa Dios makapahinabog kalibog.  Ug sa teksto sa Kasulatan sa ibabaw, ang hinungdan mao ang pagkamapahitas-on ug kabangis sa mga Pariseo.  Wala gayod mapasakiti ang Dios sa pagpangutlo ug pagkaon sa mga tinun-an og mga lugas sa Adlaw nga Igpapahulay.  Busa, gisulayan sa mga Pariseo nga pas-anon ang mga tinun-an og palas-anon nga dili gikan sa Dios.

Kita usab mahimong matintal sa pagtan-aw sa balaod ug kabubut-on sa Dios sa paaging skrupuloso.  Bisan tuod daghang tawo ang nagbuhat sa sukwahi (sobra ka mapatuyangon), adunay uban nga nakigbisog sa kabalaka nga basin mapasakitan nila ang Dios bisan wala gayod Siya mapasakiti.

Pamalandongi karon ang imong kaugalingong pakigbisog sa skrupulosidad.  Kon ingon niini ang imong kahimtang, hibaloi nga gusto sa Dios nga gawason ka gikan niining mga palas-anon.

Ginoo, tabangi ako nga makita ang Imong balaod ug kabubut-on diha sa kahayag sa kamatuoran.  Tabangi ako nga biyaan ang tanang sayop nga pagsabot ug sayop nga paghulagway sa Imong balaod ug dawaton hinuon ang mga kamatuoran sa Imong hingpit nga gugma ug kalooy.  Hinaot nga mokupot ako nianang kalooy ug gugma sa tanang butang ug labaw sa tanang butang.  Jesus, misalig ako Kanimo.

Dugang nga mga Pamalandong sa Ebanghelyo

Mga Pamalandong sa Diosnong Kalooy

Tanang Santos/Mga Kapistahan

Santos sa Adlaw – San Gregorio nga Bantogan, Papa ug Doktor sa Simbahan

Mga Kapilian sa mga Basahon sa Misa

Hulagway: Ang panorama sa Bibliya, o Ang Balaang Kasulatan sa mga hulagway ug sugilanon, pinaagi sa Wikimedia Commons