Septiyembre 5, 2022
Lunes sa Ika-Kawhaag-tulong Semana sa Ordinaryong Panahon
Mga Pagbasa Karong Adlawa
Santa Madre Teresa sa Calcutta—Handumanan
Paminaw sa Iningles
“Ituy-od ang imong kamot.” Gituy-od niya kini ug naayo ang iyang kamot. Apan nangasuko sila pag-ayo ug nagsabot kon unsay ilang buhaton kang Jesus. Lucas 6:10-11
Makapabalaka gayod kining maong teksto. Balikbalik natong makita nga ang mga eskriba ug mga Pariseo milihok uban sa dakong pagkamadinauton nga tinuyo ug giplanohan pag-ayo. Dinhi, nangita sila og bisan unsang ilang ikapasangil kang Jesus. Ug unsa man ang ilang nakita nga ikapasangil Kaniya? Nasaksihan nila Siya nga naghimo og milagro sa adlaw nga Igpapahulay. Ug milihok sila nga daw sala kini ni Jesus. Tinuod ba gayod?
Makapabalaka kaayo kining maong teksto kay kadtong mga pangulo sa relihiyon niadtong panahona klarong ilang kaugalingon lamang ang giatiman, ug si Jesus nahimong babag sa ilang pagtan-aw sa ilang kaugalingon nga labaw ka mahinungdanon. Mas nailhan ug gitahod na Siya kay sa mga eskriba ug mga Pariseo, ug napuno sila sa kasina.
Usa ka mahinungdanong leksiyon nga atong makat-onan gikan niining teksto mao nga ang sala sa kasina modala kanato ngadto sa dili makataronganong panghunahuna ug kabuang. Kini nga sala nagbuta kanato ug nagdala kanato sa paghunahuna ug pagsulti og mga butang nga walay buot. Mao kini ang gibuhat sa mga eskriba ug mga Pariseo. Kinsa man nga anaa sa hustong panghunahuna ang “mopasangil” kang Jesus tungod sa pagbuhat og butang nga maayo kaayo sama sa pag-ayo sa adlaw nga Igpapahulay? Kadtong mga nabutaan lamang sa kasina.
Bisan tuod makapabalaka kining maong teksto, hinaot nga ang maong kabalaka makatabang kanato. Angay kining mahimong higayon alang sa matag usa kanato sa pagsusi sa atong kaugalingong kinabuhi ug sa atong mga relasyon. Nakita ba nimo ang kasina sa bisan hain niining mga relasyon? Namatikdan ba nimo nga usahay dili makataronganon ang imong paglihok ug paghunahuna bahin niini o niadtong tawhana?
Pamalandongi karon ang bisan unsang hilig nimo nga mahimong sama sa mga eskriba ug mga Pariseo. Sabta nga ang ilang mga binuhatan gilakip sa Kasulatan aron tudloan kita mahitungod niining mangil-ad nga sala nga usahay atong ginapakigbisogan. Tugoti nga ang makapabalakang bahin niini magdasig kanimo sa pagpaningkamot nga mahigawas sa kasina sa imong kinabuhi.
Akong Ginoo nga nagbuhat og mga milagro, gusto ko gayod nga mahigawas sa mga sala sa garbo, kasina ug pangabugho. Tabangi ako nga makita kini sa akong kinabuhi, maghinulsol niini ug pulihan kini sa Imong kalooy ug gugma. Jesus, misalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Santos sa Adlaw – Santa Madre Teresa sa Calcutta
Mga Kapilian sa mga Basahon sa Misa
Mga hulagway nga gipasiugda sa ibabaw: Giayo ni Kristo ang lalaki, pinaagi sa Wikimedia Commons
