Septiyembre 10, 2022
Sabado sa Ikakawhaag Tulo nga Semana sa Ordinaryong Panahon
Mga Pagbasa Karong Adlawa
Paminaw sa Iningles
“Ipakita Ko kaninyo kon unsay sama sa tawo nga moduol Kanako, maminaw sa Akong mga pulong, ug motuman niini. Sama siya sa usa ka tawo nga nagtukod ug balay, nga nagkalot ug lawom ug nagbutang sa pundasyon ibabaw sa bato; sa pag-abot sa baha, mibundak ang suba nianang balaya apan wala kini matarog kay lig-on man ang pagkatukod niini.” Lucas 6:47-48
Unsa man ang pundasyon sa imong kinabuhi? Lig-on ba kini nga bato? O balas ba kini? Kining teksto sa Ebanghelyo nagpadayag sa kahinungdanon sa lig-ong pundasyon sa kinabuhi.
Kasagaran dili nato mahunahunaan o kabalak-an ang pundasyon gawas kon kini malumpag. Mahinungdanon nga pamalandongan kini. Kon lig-on ang pundasyon, kasagaran dili kini mamatikdan ug gamay ra ang kabalaka bisan kanus-a moabot ang mga bagyo.
Mao usab kini sa atong espirituwal nga pundasyon. Gitawag kita nga makabaton ug espirituwal nga pundasyon sa lawom nga pagtuo nga nakagamot sa pag-ampo. Ang atong pundasyon mao ang atong adlaw-adlaw nga pagpakigsulti kang Kristo. Niana nga pag-ampo, si Jesus Mismo mahimong pundasyon sa atong kinabuhi. Ug kon Siya ang pundasyon sa atong kinabuhi, walay bisan unsa nga makadaot kanato ug walay makapugong kanato sa pagtuman sa atong misyon sa kinabuhi.
Itandi kini sa usa ka huyang nga pundasyon. Huyang ang pundasyon nga nagsalig sa kaugalingon isip tinubdan sa kalig-on ug kusog panahon sa kalisdanan. Apan ang tinuod mao nga walay bisan kinsa kanato nga igo ang kalig-on aron mahimong pundasyon sa iyang kaugalingon. Kadtong mosulay niining paagiha mga buang nga makakat-on lamang pinaagi sa mapait nga kasinatian nga dili nila maantos ang bisan unsang bagyo nga moabot sa ilang kinabuhi.
Pamalandongi karong adlawa kon unsa kalig-on ang pagkatukod sa pundasyon sa imong kinabuhi. Kon lig-on kini, mahatag nimo ang imong pagtagad sa daghan pang bahin sa imong kinabuhi. Kon huyang kini, kanunay ka na lang maningkamot sa pagpugong sa dugang kadaot samtang naningkamot ka nga dili mabungkag ang imong kinabuhi. Itugyan pag-usab ang imong kaugalingon sa usa ka kinabuhi sa lawom nga pag-ampo aron si Kristo Jesus mahimong lig-ong pundasyon nga bato sa imong kinabuhi.
Ginoo, Ikaw ang akong bato ug ang akong kusog. Ikaw lamang ang nagsuporta kanako sa tanang butang sa kinabuhi. Tabangi ako nga mas mosalig pa Kanimo, aron adlaw-adlaw matuman ko ang tanan nga Imong gitawag kanako nga buhaton. Jesus, ako misalig Kanimo.
Nobena sa Mahal nga Birhen sa mga Kasakit
Naandang ampoon sa Septiyembre 7–15
Ikaupat nga Adlaw—Septiyembre 10
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Santos/Kasaulogan Karong Adlawa
Mga Kapilian sa mga Basahon sa Misa
Hulagway: Si Jesus mitungas sa bukid nga nag-inusara ni William Hole, pinaagi sa Wikimedia Commons
