Septiyembre 20, 2022
Martes sa Ikakawhaag-limang Semana sa Kasagarang Panahon
Mga Pagbasa alang sa Karon
Mga Santos Andrew Kim Tae-gŏn, Pari, ug Paul Chŏng Ha-sang, ug mga Kauban, mga Martir—Handumanan
Paminaw sa Iningles
“Ang Akong inahan ug ang Akong mga igsoon mao kadtong namati sa pulong sa Dios ug nagtuman niini.” Lucas 8:21
Tingali nakahunahuna ka na kon unsa kaha ang bation kon aduna kay gamhanan ug inila nga sakop sa pamilya. Unsa kaha kon ang imong igsoon o usa sa imong mga ginikanan mao ang Presidente sa Estados Unidos? O usa ka inilang atleta? O laing inilang tawo? Tingali makahatag kini og kalipay ug garbo sa maayong diwa.
Sa panahon nga si Jesus naglakaw dinhi sa yuta, nahimo Siyang “inila,” kon mao kana ang atong ikasulti. Gidayeg Siya, gihigugma ug gisunod sa daghan. Ug samtang nagsulti Siya, miabot sa gawas ang Iyang inahan ug mga igsoon (nga lagmit mga ig-agaw Niya). Sa walay duhaduha, gitan-aw sila sa mga tawo uban sa pagtahod ug pagdayeg ug tingali bisan gamayng kasina. Pagkanindot kaha nga mahimong tinuod nga paryente ni Jesus.
Nahibalo gayod si Jesus sa panalangin sa pagkahimong Iyang kaugalingong paryente, kabahin sa Iyang kaugalingong pamilya. Mao nga gisulti Niya kini aron dapiton ang tanan nga didto sa pagtan-aw sa ilang kaugalingon isip suod nga sakop sa Iyang pamilya. Siyempre, ang atong Mahal nga Inahan magpabilin kanunay sa iyang talagsaong relasyon uban ni Jesus, apan gusto ni Jesus nga dapiton ang tanang tawo sa pag-ambit sa Iyang bugkos sa pamilya.
Sa unsang paagi kini mahitabo? Mahitabo kini kon kita “mamati sa Pulong sa Dios ug motuman niini.” Yano ra gayod kini. Gidapit ka nga mahimong kabahin sa pamilya ni Jesus sa usa ka lawom ug personal nga paagi kon maminaw ka lamang sa tanan nga gisulti sa Dios ug unya motuman niini.
Bisan tuod yano kini sa usa ka bahin, tinuod usab nga kini usa ka lakang nga nagkinahanglan og dakong kausaban. Dako kini nga kausaban kay nagkinahanglan kini og hingpit nga pagtugyan sa kabubut-on sa Dios. Tungod kini kay kon mosulti ang Dios, ang Iyang mga pulong gamhanan ug makapausab. Ug ang pagtuman sa Iyang mga pulong makapausab sa atong kinabuhi.
Pamalandongi karon ang pagdapit ni Jesus nga mahimong sakop sa Iyang suod nga pamilya. Paminawa kana nga pagdapit ug tubaga kini og “Oo.” Ug samtang moingon ka og “Oo” niini nga pagdapit, pangandam ug kinabubut-ong tugoti ang Iyang tingog ug ang Iyang balaang kabubut-on nga mousab sa imong kinabuhi.
Ginoo, gidawat ko ang Imong pagdapit nga mahimong sakop sa Imong suod nga pamilya. Hinaot nga madungog ko ang Imong tingog nga nagsulti ug matuman ko ang tanan nga Imong gisulti. Jesus, misalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Santos sa Adlaw – Santos Andrew Kim Tae-gŏn, Pari, ug Paul Chŏng Ha-sang, ug mga Kauban, mga Martir
Mga Kapilian sa mga Basahon sa Misa
