Septiyembre 26, 2022
Lunes sa Ika-Kawhaag-unom nga Semana sa Ordinaryong Panahon
Mga Pagbasa Karong Adlawa
Santos Cosmas ug Damian, mga Martir—Opsiyonal nga Paghandom
Paminaw sa Iningles
Unya mitubag si Juan, “Magtutudlo, nakakita kami og usa ka tawo nga naghingilin og mga demonyo sa Imong ngalan, ug gisulayan namo siya pagpugong kay dili siya kauban sa among pundok.” Miingon si Jesus kaniya, “Ayaw siya pugngi, kay ang dili batok kaninyo dapig kaninyo.” Lucas 9:49-50
Nganong gisulayan man sa mga Apostoles pagpugong ang usa ka tawo sa paghingilin og demonyo sa ngalan ni Jesus? Wala kini gikabalak-an ni Jesus ug, gani, giingnan Niya sila nga dili siya pugngan. Busa nganong nabalaka man ang mga Apostoles? Lagmit tungod sa kasina.
Ang kasina nga atong makita sa mga Apostoles niining higayona mahimong mosulod usab usahay sa Simbahan. May kalabotan kini sa tinguha alang sa gahom ug pagkontrol. Nasuko ang mga Apostoles tungod kay ang tawo nga naghingilin og mga demonyo dili kauban sa ilang pundok. Sa laing pagkasulti, dili nila mapasunod kining tawhana sa ilang pagdumala.
Bisan og lisod tingali kining sabton, makatabang ang pagtan-aw niini sa kahimtang karon. Pananglitan, adunay usa ka tawo nga nagdumala sa usa ka ministeryo sa simbahan, ug adunay laing tawo o mga tawo nga nagsugod og bag-ong ministeryo. Malampuson kaayo ang bag-ong ministeryo ug, tungod niini, ang mga dugay nang nag-alagad sa mas karaan ug mas lig-on nang mga ministeryo mahimong masuko ug medyo masuya.
Dili kini makataronganon, apan tinuod usab kini nga mahitabo. Kanunay kining mahitabo, dili lamang sulod sa simbahan kondili usab sa atong adlaw-adlaw nga kinabuhi. Kon makakita kita og laing tawo nga nagbuhat og usa ka butang nga malampuson o naghatag og maayong bunga, mahimo kitang masuya o masinahon.
Niining kahimtanga sa mga Apostoles, masinabtanon ug maluluy-on kaayo si Jesus sa tibuok nga nahitabo. Apan tin-aw usab kaayo ang Iyang giingon: “Ayaw siya pugngi, kay ang dili batok kaninyo dapig kaninyo.” Ingon ba niini ang imong pagtan-aw sa mga butang sa kinabuhi? Kon magmalampuson ang usa ka tawo, malipay ka ba o negatibo ang imong pagtan-aw? Kon ang uban magbuhat og maayo sa ngalan ni Jesus, mapuno ba ang imong kasingkasing sa pagpasalamat kay gigamit sa Diyos kanang tawhana alang sa kaayohan, o masuya ka?
Pamalandongi karon ang daghang maayong butang nga nahitabo sa imong palibot. Ilabinang pamalandongi kadtong nagpalambo sa Gingharian sa Diyos. Ug pamalandongi kon unsay imong gibati mahitungod kanila. Pag-ampo nga makita nimo sila isip imong mga isigkamagbubuhat sa ubasan ni Cristo inay isip imong mga kaatbang.
Ginoo sa tinuod nga kaayo, nagpasalamat ako Kanimo sa daghang maayong butang nga nahitabo sulod sa Imong Simbahan ug sa katilingban. Tabangi ako nga magmaya sa tanan Mong gibuhat pinaagi sa uban. Tabangi ako nga makalingkawas sa bisan unsang pakigbisog nako batok sa kasina. Jesus, misalig ako Kanimo.
Ikalimang Adlaw: Nobena kang Santa Thérèse sa Lisieux – Ang Gamayng Bulak
Dugang nga mga Pamalandong sa Ebanghelyo
Mga Pamalandong sa Diosnong Kalooy
Santo sa Adlaw –Santos Cosmas ug Damian, mga Martir
Mga Kapilian sa mga Basahon sa Misa
