Nobyembre 25, 2022
Biyernes sa Ikakatloan ug Upat nga Semana sa Kasagarang Panahon
Mga Pagbasa Karong Adlawa
Santa Catalina sa Alexandria, Birhen ug Martir—Opsyonal nga Handumanan
Paminaw sa Iningles
“…hibaloi nga haduol na ang Gingharian sa Dios.” Lucas 21:31b
Ginaampo nato kini matag higayon nga mag-ampo kita sa “Amahan Namo.” Ginaampo nato nga “Moabot kanamo ang Imong Gingharian.” Kinasingkasing ba nimo kining ginaampo?
Niining bahin sa Ebanghelyo, gipahayag ni Jesus nga haduol na ang Gingharian sa Dios. Haduol kini, apan sa kasagaran layo usab kaayo. Haduol kini sa duha ka paagi. Una, haduol kini kay si Jesus mobalik uban sa tanan Niyang kahalangdon ug himaya ug bag-ohon Niya ang tanang butang. Sa ingon, matukod ang Iyang Gingharian nga molungtad sa kahangtoran.
Ikaduha, haduol ang Iyang Gingharian kay usa lamang ka pag-ampo ang gikinahanglan aron kini moabot. Nangandoy si Jesus nga moanhi aron tukoron ang Iyang Gingharian sulod sa atong mga kasingkasing, kon pasudlon lamang nato Siya. Ikasubo, kasagaran dili nato Siya pasudlon. Kanunay nato Siyang ipahilayo ug magduhaduha ang atong hunahuna ug kasingkasing kon bug-os ba kitang mosunod sa Iyang balaan ug hingpit nga kabubut-on o dili. Kanunay kitang magpanuko sa pagdawat Kaniya sa hingpit ug sa pagtugot nga matukod ang Iyang Gingharian sulod nato.
Nakaamgo ka ba kon unsa ka haduol ang Iyang Gingharian? Nakaamgo ka ba nga usa lamang ka pag-ampo ug usa ka buhat sa imong kabubut-on ang gikinahanglan aron kini moabot? Si Jesus makahimo sa pag-anhi kanato ug sa pagdumala sa atong kinabuhi kon tugotan lamang nato Siya. Siya ang Hari nga makagagahom sa tanan ug makahimo sa pagbag-o kanato aron mahimo kitang bag-ong binuhat. Makahatag Siya og hingpit nga kalinaw ug panag-uyon sa atong kalag. Makahimo Siya og dagko ug matahom nga mga butang sulod sa atong mga kasingkasing. Kinahanglan lamang nga moingon kita nga oo, ug kinasingkasing kining tuyo-on, ug moanhi Siya.
Pamalandongi karong adlawa ang tinguha sa kasingkasing ni Jesus nga moanhi kanimo ug tukoron ang Iyang Gingharian sa imong kinabuhi. Nangandoy Siya nga mahimong imong Magmamando ug Hari ug sa pagdumala sa imong kalag diha sa hingpit nga panag-uyon ug gugma. Tugoti Siya nga moanhi ug tukoron ang Iyang Gingharian sulod nimo.
Ginoo, gidapit Ko Ikaw nga moanhi ug panag-iyahon ang akong kalag. Gipili Ko Ikaw isip akong Ginoo ug akong Dios. Gitugyan ko ang pagdumala sa akong kinabuhi ug gawasnon kong gipili Ikaw isip akong Dios ug balaang Hari. Jesus, misalig ako Kanimo.
Tan-awa ang among mga kapanguhaan alang sa Adbiyento!
Mga Pamalandong sa Balaang Kasulatan
