Nobyembre 26, 2022
Sabado sa Ika-34 nga Semana sa Ordinaryong Panahon
Mga Pagbasa alang sa Karong Adlawa
Paminaw sa Iningles
“Pagbantay kamo nga ang inyong mga kasingkasing dili dukaon tungod sa pagpatuyang sa hudyaka ug paghubog ug sa mga kabalaka sa adlaw-adlaw nga kinabuhi, ug kalit lang nga moabot kaninyo kadtong adlawa sama sa usa ka lit-ag.” Lucas 21:34-35a
Kini ang kataposang adlaw sa atong liturhikanhong tuig! Ug niining adlawa, ang Ebanghelyo nagpahinumdom kanato kon unsa kadali kitang mahimong tapolan sa atong kinabuhi sa pagtuo. Nagpahinumdom kini kanato nga ang atong mga kasingkasing mahimong dukaon tungod sa “pagpatuyang sa hudyaka ug paghubog ug sa mga kabalaka sa adlaw-adlaw nga kinabuhi.” Atong tan-awon kining mga tintasyon.
Una, gipasidan-an kita batok sa pagpatuyang sa hudyaka ug paghubog. Tinuod nga magamit kini sa literal nga pagsabot, nga nagpasabot nga kinahanglan gyod natong likayan ang pag-abuso sa droga ug alkohol. Apan magamit usab kini sa daghan pang paagi nga kita mahimong “dukaon” tungod sa kakulang sa pagpugong sa kaugalingon. Ang pag-abuso sa alkohol usa lamang ka paagi sa pag-ikyas gikan sa mga palas-anon sa kinabuhi, apan daghan pang paagi nga mahimo nato kini. Sa matag higayon nga magpatuyang kita sa bisan unsang butang, gisugdan nato ang pagtugot nga dukaon ang atong mga kasingkasing sa espirituhanong bahin. Sa matag higayon nga mangita kitag lumalabay nga kaikyasan gikan sa kinabuhi nga wala modangop sa Diyos, gitugotan nato ang atong kaugalingon nga dukaon sa espirituhanong bahin.
Ikaduha, kining maong teksto nagtudlo sa “mga kabalaka sa adlaw-adlaw nga kinabuhi” isip hinungdan sa pagkaduka. Kanunay gyod kitang nag-atubang og kabalaka sa kinabuhi. Mahimo kitang mobati nga daw dili na nato makaya ang kabug-at sa usa ka butang o sa lain. Kon mabug-atan kita sa kinabuhi, kasagarang mangita kitag kaikyasan. Ug sa kasagaran kaayo, ang maong “kaikyasan” usa ka butang nga makapaduka kanato sa espirituhanong bahin.
Gisulti ni Jesus kining Ebanghelyo aron hagiton kita nga magpabiling nagmata ug mabinantayon sa atong kinabuhi sa pagtuo. Mahitabo kini kon tipigan nato ang kamatuoran sa atong mga hunahuna ug kasingkasing ug ipunting ang atong mga mata sa kabubut-on sa Diyos. Sa higayon nga ibalhin nato ang atong pagtan-aw ngadto sa mga palas-anon sa kinabuhi ug dili na nato makita ang Diyos taliwala sa tanang butang, maduka kita sa espirituhanong bahin ug magsugod, sa usa ka pagsabot, sa pagkatulog.
Karong adlawa, samtang naghinapos ang liturhikanhong tuig, pamalandongi ang kamatuoran nga gitawag ka sa Diyos nga hingpit nga magmata. Gusto Niya ang imong bug-os nga pagtagad ug gusto Niya nga magpabilin kang hingpit nga ligdong sa imong kinabuhi sa pagtuo. Ipunting ang imong mga mata Kaniya ug tugoti Siya nga magpabilin kanimong andam kanunay alang sa Iyang nagkaduol nga pagbalik.
Ginoo, tinuod nga gihigugma ko Ikaw ug nagtinguha ako nga higugmaon Ka pa gayod. Tabangi ako nga magpabiling hingpit nga nagmata sa akong kinabuhi sa pagtuo. Tabangi ako nga ipunting kanunay ang akong mga mata Kanimo sa tanang kahimtang aron andam ako kanunay alang Kanimo sa dihang moduol Ka kanako. Jesus, misalig ako Kanimo.
Tan-awa ang among mga kapanguhaan alang sa Adbiyento!
Mga Pamalandong sa Balaang Kasulatan
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Santos/Kasaulogan Karong Adlawa
Mga Kapilian sa mga Basahon sa Misa
