Disyembre 2, 2022
Biyernes sa Unang Semana sa Adbiyento
Mga Pagbasa Karong Adlawa
Paminaw sa Iningles
Ug nabuka ang ilang mga mata. Hugot silang gipahimangnoan ni Jesus, “Siguroha nga walay bisan kinsa nga makahibalo niini.” Apan nanglakaw sila ug gipakaylap ang balita mahitungod Kaniya sa tibuok maong dapit. Mateo 9:30–31
Kinsa si Jesus? Mas sayon na kaayong tubagon kini nga pangutana karon kay sa panahon nga naglakaw pa si Jesus dinhi sa Yuta. Karon, gipanalanginan kita sa dili maihap nga mga santos nga nag-una kanato, nga pinaagi sa pag-ampo ug lawom nga pagsabot nagtudlo og daghan mahitungod sa persona ni Jesus. Nailhan nato Siya nga Dios, ang Ikaduhang Persona sa Balaang Trinidad, ang Manluluwas sa Kalibotan, ang gisaad nga Mesiyas, ang Kordero nga Gihalad, ug daghan pa.
Ang Ebanghelyo sa ibabaw gikuha gikan sa kataposan sa milagro diin giayo ni Jesus ang duha ka butang lalaki. Hilabihan ang ilang kalipay sa pagkaayo, ug nadala sila sa ilang pagbati. Gisugo sila ni Jesus, “Siguroha nga walay bisan kinsa nga makahibalo niini” nga milagrosong pagkaayo. Apan dili nila mapugngan ang ilang kalipay. Dili kay tinuyo nilang gisupak si Jesus; hinuon, wala silay laing nahibaloang paagi sa pagpahayag sa ilang kinasingkasing nga pagpasalamat gawas sa pagsugilon sa uban sa gibuhat ni Jesus.
Usa sa mga hinungdan nga gisultihan sila ni Jesus nga dili mosugilon sa uban mahitungod Kaniya mao nga nahibalo si Jesus nga wala pa nila masabti sa hingpit kon Kinsa Siya. Nahibalo Siya nga ang ilang pagpamatuod mahitungod Kaniya dili makapaila Kaniya sa labing matinud-anong paagi. Siya ang Kordero sa Dios. Ang Manluluwas. Ang Mesiyas. Ang Kordero nga Gihalad. Siya ang mianhi niining kalibotana aron sa pagtubos kanato pinaagi sa pag-ula sa Iyang dugo. Apan daghan sa mga tawo ang nangandoy og usa ka nasyonalistikong “mesiyas” o usa lamang ka tigbuhat og milagro. Gusto nila og usa nga magluwas kanila gikan sa politikanhong pagdaugdaog ug maghimo kanila nga usa ka gamhanang nasod dinhi sa yuta. Apan dili kini ang misyon ni Jesus.
Kasagaran, mahimo usab kitang mahulog sa lit-ag sa sayop nga pagsabot kon Kinsa si Jesus ug kon Kinsa ang Iyang buot nga mahimong alang kanato sa atong kinabuhi. Mahimong mangandoy kita og usa ka “dios” nga magluwas lamang kanato gikan sa atong adlaw-adlaw nga mga pakigbisog, mga inhustisya, ug mga kalisdanan niining kinabuhia. Mahimong mangandoy kita og usa ka “dios” nga molihok sumala sa atong kabubut-on, imbes nga kita ang mosunod sa Iyang kabubut-on. Gusto kita og usa ka “dios” nga moayo kanato ug mopalingkawas kanato sa tanang yutan-ong palas-anon. Apan tin-aw nga gitudlo ni Jesus sa tibuok Niyang kinabuhi nga Siya mag-antos ug mamatay. Gitudloan kita Niya nga kinahanglan natong pas-anon ang atong kaugalingong mga krus ug mosunod Kaniya. Ug gitudloan kita Niya nga kita kinahanglan mamatay, modawat sa pag-antos, magpakita og kaluoy, itunol ang pikas aping, ug makakaplag sa atong himaya diha sa dili gayod masabtan sa kalibotan.
Pamalandongi karon kon pahimangnoan ka ba ni Jesus bahin sa hilabihang pagsangyaw sa imong kaugalingong pagsabot kon Kinsa Siya. Nakigbisog ka ba sa pagpresentar og usa ka “dios” nga dili mao ang tinuod nga Dios? O nailhan na ba nimo ang mismong Persona ni Cristo nga atong Ginoo sa ingon kalawom nga makahimo ka nang magpamatuod mahitungod Kaniya nga namatay? Diha lamang ba sa Krus ang imong pagpasigarbo? Imo bang gisangyaw si Cristo nga gilansang sa krus ug gitudlo lamang ang labing lawom nga kaalam sa pagkamapainubsanon, kaluoy, ug sakripisyo? Itugyan pag-usab ang imong kaugalingon sa tinuod nga pagsangyaw kang Cristo, nga isalikway ang bisan unsa ug ang tanang sayop nga mga paghulagway sa atong Dios nga nagluwas kanato.
Akong tinuod nga Ginoo ug Manluluwas, itugyan ko ang akong kaugalingon Kanimo ug mangamuyo ako nga mailhan ug higugmaon ko Ikaw sumala sa Imong tinuod nga pagkamao. Hatagi ako sa mga mata nga gikinahanglan aron makita Ka ug sa hunahuna ug kasingkasing nga gikinahanglan aron mailhan ug higugmaon Ka. Kuhaa gikan kanako ang bisan unsang sayop nga pagtan-aw kon Kinsa Ka ug pulihi kini sa tinuod nga kahibalo mahitungod Kanimo, akong Ginoo. Samtang nagkadako ang akong pag-ila Kanimo, ihalad ko ang akong kaugalingon Kanimo aron magamit Mo ako sa pagsangyaw sa Imong pagkahalangdon ngadto sa tanan. Hesus, misalig ako Kanimo.
Nobena sa Imakulada Concepcion
Nobyembre 29-Disyembre 7
Tan-awa ang tanan namong mga Kapanguhaan alang sa Adbiyento
Nobena sa Pasko ni San Andres
Ang pag-ampo sa Nobena sa Pasko ni San Andres sa ubos naandang ampoan og 15 ka higayon matag adlaw gikan sa Nobyembre 30, ang Pista ni San Andres, hangtod sa Bisperas sa Pasko.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Adbiyento
Mga Santos/Kasaulogan Karong Adlawa
Mga Kapilian sa mga Basahon sa Misa
