Disyembre 3, 2022
Sabado sa Unang Semana sa Adbiyento
Mga Pagbasa Karong Adlawa
San Francisco Javier, Pari—Handumanan
Paminaw sa Iningles
“Daghan ang anihon apan diyutay ra ang mga mamumuo; busa pangayoa sa tag-iya sa anihon nga magpadala siyag mga mamumuo alang sa iyang anihon.” Mateo 9:37–38
Unsa may gusto sa Diyos nga imong buhaton? Unsa ang imong misyon? Ang pipila ka madasigong Kristohanon tingali nagdamgo nga mahimong inilang magwawali sa Ebanghelyo. Ang uban tingali nagdamgo sa paghimo og bayanihong mga buhat sa gugmang putli nga dayegon sa tanan. Ug ang uban tingali nangandoy nga magkinabuhi sa pagtuo nga hilom kaayo ug tago sa mata sa kadaghanan, duol sa pamilya ug mga higala. Apan unsa may gusto sa Diyos nga IMONG buhaton?
Sa kinutlo sa ibabaw, giawhag ni Jesus ang Iyang mga tinun-an sa pag-ampo alang sa “mga mamumuo alang sa iyang anihon.” Makasiguro ka nga usa ka sa mga “mamumuo” nga gihisgotan sa atong Ginoo. Sayon ra hunahunaon nga kini nga misyon alang sa uban, sama sa mga pari, mga relihiyoso ug relihiyosa, ug mga laykong nagpahinungod sa tibuok nilang panahon sa pagsangyaw sa Ebanghelyo. Sayon alang sa daghan ang paghunahuna nga gamay ra ang ilang ikatampo. Apan wala nay mas layo pa sa kamatuoran kay niini.
Buot sa Diyos nga gamiton ka sa talagsaong mahimayaong mga paagi. Oo, “talagsaong mahimayaon!” Siyempre, wala kini magpasabot nga ikaw na ang sunod nga labing inilang magwawali sa Ebanghelyo sa YouTube o nga mahimong sentro ka sa pagtagad sa kadaghanan sama ni Santa Madre Teresa. Apan ang buluhaton nga gusto sa Diyos nga imong buhaton sama ra katinuod ug sama ra kaimportante sa buluhaton ni bisan kinsa sa labing bantogang mga santos kaniadto o sa mga buhi karon.
Ang pagkabalaan sa kinabuhi makaplagan diha sa pag-ampo apan diha usab sa buhat. Samtang nag-ampo ka matag adlaw ug nagkaduol kang Kristo, awhagon ka Niya nga “Ayoha ang mga masakiton, banhawa ang mga patay, hinloi ang mga sanlahon, hinginli ang mga demonyo” (Mateo 10:8), sumala sa gipadayon nga gisulti sa Ebanghelyo karong adlawa. Apan tawgon ka Niya sa pagbuhat niini sa talagsaong paagi sulod sa imong kaugalingong bokasyon. Dili angay pasagdan ang imong inadlaw-adlaw nga katungdanan. Busa, sa mga tawo nga imong masugatan matag adlaw, kinsa man ang mga masakiton, mga patay, mga sanlahon ug mga giyawaan? Lagmit anaa ra sila sa imong palibot, sa nagkalainlaing kahimtang. Tagda, pananglitan, kadtong mga “sanlahon.” Mao kini kadtong mga “sinalikway” sa katilingban. Ang atong kalibotan mahimong mapintas ug walay kaluoy, ug ang uban mahimong mobati nga nawala sila sa ilang dalan ug nag-inusara. Kinsa ang imong nailhan nga tingali anaa niining kahimtanga? Kinsa ang nagkinahanglan og gamayng pagdasig, pagsabot ug kalooy? Gihatagan ka sa Diyos og inadlaw-adlaw nga katungdanan nga wala Niya ihatag sa lain, ug tungod niini, adunay mga tawo nga nagkinahanglan sa imong gugma. Pangitaa sila, duola sila, ipaambit kanila si Kristo, ug anaa kanunay alang kanila.
Pamalandongi karong adlawa kining talagsaong mahimayaong tawag nga gihatag kanimo aron mahimong Kristo ngadto sa uban. Dawata kining katungdanan sa gugma. Ilha ang imong kaugalingon isip usa nga gitawag nga mahimong mamumuo alang kang Kristo ug ipahinungod ang imong kaugalingon sa hingpit ug mahimayaong pagtuman niining misyon, bisan unsa pa ang paagi sa pagkinabuhi niini sa imong kinabuhi.
Minahal kong Ginoo, gipahinungod ko ang akong kaugalingon sa Imong balaang misyon. Gipili ko Ikaw ug ang Imong balaang kabubut-on alang sa akong kinabuhi. Ipadala ako, minahal nga Ginoo, ngadto sa labing nagkinahanglan sa Imong gugma ug kalooy. Tabangi ako nga masayran kon unsaon nako pagdala nianang gugma ug kalooy ngadto sa mga gitugyan Kanimo sa akong pag-atiman aron masinati nila sa ilang kinabuhi ang Imong mahimayaon ug makaluwas nga grasya. Jesus, ako misalig Kanimo.
Nobena sa Imakulada Concepcion
Nobyembre 29-Disyembre 7
Tan-awa ang tanan namong mga Kapanguhaan alang sa Adbiyento
Nobena sa Pasko ni San Andres
Ang pag-ampo sa Nobena sa Pasko ni San Andres sa ubos naandang ampoan og 15 ka higayon matag adlaw gikan sa Nobyembre 30, ang Pista ni San Andres, hangtod sa Bisperas sa Pasko.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Adbiyento
Santos sa Adlaw – San Francisco Javier, Pari
Mga Kapilian sa mga Basahon sa Misa
