Domingo, Enero 8, 2023
Epipanya sa Ginoo—Dakong Kapistahan
Enero 6, o ang unang Domingo human sa Enero 1
Depende sa naandang pagsaulog sa inyong lokal nga diyosesis o teritoryo
Paminaw sa Iningles
Sa dihang natawo si Jesus sa Betlehem sa Judea, sa panahon ni Haring Herodes, miabot sa Jerusalem ang mga mago gikan sa silangan, nga nangutana, “Hain ang bag-ong natawo nga hari sa mga Judio? Nakita namo ang iyang bituon sa pagsubang niini ug mianhi kami aron sa pagsimba kaniya.” Mateo 2:1–2
Lagmit gikan sa Persia, nga karon mao ang Iran, ang mga Mago. Mga tawo sila nga kanunayng nagtuon sa mga bituon. Dili sila mga Judio apan lagmit nasayod sila sa kaylap nga pagtuo sa katawhang Judio nga adunay matawo nga hari nga moluwas kanila.
Gitawag sa Diyos kining mga Mago aron makatagbo sa Manluluwas sa Kalibotan. Makapainteres nga gigamit sa Diyos ang usa ka butang nga pamilyar kaayo kanila isip instrumento sa pagtawag kanila: ang mga bituon. Kabahin sa ilang pagtuo nga kon adunay matawo nga usa ka tawo nga dako kaayog kahinungdanon, duyogan kini sa pagpakita sa usa ka bag-ong bituon. Busa sa dihang nakita nila kining bag-o, mahayag ug masanag nga bituon, napuno sila sa tinguha sa pagsusi ug sa paglaom. Usa sa labing mahinungdanong bahin niining sugilana mao nga mitubag sila. Gitawag sila sa Diyos pinaagi sa usa ka bituon, ug gipili nilang sundon kining timailhana, nga nagsugod sa usa ka taas ug malisod nga panaw.
Kasagarang gamiton sa Diyos ang mga butang nga labing pamilyar kanato ug kabahin sa atong adlaw-adlaw nga kinabuhi aron ipahibalo ang Iyang tawag. Hinumdomi, pananglitan, nga daghan sa mga Apostoles mga mangingisda, ug gigamit ni Jesus ang ilang panginabuhian aron tawgon sila, nga gihimo silang “mga mangingisda og mga tawo.” Ilabinang gigamit Niya ang milagrosong pagdakop og daghang isda aron tin-awng ipakita kanila nga aduna silay bag-ong tawag.
Sa atong kaugalingong kinabuhi, kanunay kitang gitawag sa Diyos sa pagpangita Kaniya ug pagsimba Kaniya. Kasagaran Niyang gamiton ang pipila sa labing ordinaryong bahin sa atong kinabuhi aron ipahibalo kana nga tawag. Giunsa ka Niya pagtawag? Sa unsang paagi Siya nagpadala kanimo og usa ka bituon nga imong sundon? Sa daghang higayon nga mosulti ang Diyos, dili nato tagdon ang Iyang tingog. Kinahanglan kitang makat-on gikan niining mga Mago ug matinud-anong motubag kon Siya motawag. Dili kita angay magduhaduha ug kinahanglan kitang maningkamot nga matag adlaw magmatngon sa mga paagi nga gidapit kita sa Diyos ngadto sa mas lawom nga pagsalig, pagtugyan sa kaugalingon ug pagsimba.
Pamalandongi karon ang tawag sa Diyos sa imong kinabuhi. Nagpaminaw ka ba? Nagtubag ka ba? Andam ka ba ug kinabubut-on nga biyaan ang tanan sa imong kinabuhi aron tumanon ang Iyang balaang kabubut-on? Pangitaa Siya, paabota Siya ug tubaga Siya. Ang pagbuhat niini mao ang labing maayong desisyon nga imong mahimo sa tibuok nimong kinabuhi.
Ginoo, gihigugma ko Ikaw ug nag-ampo ako nga bukas unta ako sa Imong paggiya sa akong kinabuhi. Hinaot nga kanunay akong magmatngon sa dili maihap nga mga paagi sa Imong pagtawag kanako matag adlaw. Ug hinaot nga kanunay akong motubag Kanimo sa tibuok kong kasingkasing. Jesus, nagsalig ako Kanimo.
Dugang pang mga Pamalandong sa Video alang sa Domingo
Mga Pamalandong sa Balaang Kasulatan
Dugang nga mga Pamalandong sa Ebanghelyo
Mga Pamalandong sa Diosnong Kalooy
Santo sa Adlaw – Epipanya sa Ginoo—Solemnidad
Mga Kapilian sa mga Basahon sa Misa
Gipasiugdang hulagway sa ibabaw: gikan sa flickr
