Enero 23, 2023
Lunes sa Ikatulong Semana sa Kasagarang Panahon
Mga Pagbasa Karong Adlawa
San Vicente, Diyakono ug Martir—Opsyonal nga Handumanan
(Gisaulog sa Enero 23 sa USA)
Adlaw sa Pag-ampo alang sa Legal nga Panalipod sa mga Batang Wala Pa Matawo—Handumanan sa USA
(Ibalhin sa Enero 23 kon ang Enero 22 matunong sa Domingo)
Santa Marianne Cope, Birhen—Opsiyonal nga Handumanan sa USA
Paminaw sa Iningles
Ang mga eskriba nga miabot gikan sa Jerusalem miingon mahitungod kang Jesus, “Giyawaan Siya ni Beelzebul,” ug “Pinaagi sa pangulo sa mga demonyo, naghingilin Siya sa mga demonyo.” Marcos 3:22
Niining panahona, si Jesus hingpit nang nagbuhat sa Iyang publikong ministeryo. Giayo na Niya ang mga masakiton ug mga bakol, gihinginlan ang daghang demonyo, gitawag ang Napulog Duha ka Apostoles ug gihatagan sila og gahom ibabaw sa mga daotang espiritu, ug giwali ang Maayong Balita ngadto sa daghan. Sa wala pa kining bahin sa Ebanghelyo, gisaway Siya sa pipila sa Iyang kaugalingong mga paryente, nga nag-ingon nga si Jesus nawad-an na sa Iyang panghunahuna. Dayon misugod ang mga eskriba sa ilang dayag nga pagkondena sa atong Ginoo.
Ang mga eskriba nag-atubang og usa ka lisod nga suliran. Nakita nila si Jesus nga naghingilin sa mga demonyo gikan sa mga giyawaan, busa kinahanglan silang mangitag ikapatin-aw niini. Mihinapos sila nga si Jesus nakahimo sa paghingilin sa mga demonyo pinaagi sa gahom sa pangulo sa mga demonyo. Gitubag dayon ni Jesus ang pagsaway sa mga eskriba pinaagi sa pag-ila sa ilang pagkondena ingon nga sala batok sa Espiritu Santo. Gipasabot ni Jesus nga ang matag sala mahimong mapasaylo gawas sa sala batok sa Espiritu Santo. Miingon Siya nga “bisan kinsa nga mopasipala sa Espiritu Santo dili gayod mapasaylo, kondili sad-an sa usa ka walay kataposang sala.” Ngano man?
Niining kahimtanga, ang sala batok sa Espiritu Santo dili lamang ang bakak nga pagkondena nga gisulti sa mga eskriba batok kang Jesus. Una sa tanan, ang ilang sala mao ang pagmagahi sa ilang kasingkasing. Nagsulti sila og bakak mahitungod sa atong Ginoo, nga usa ka bug-at nga sala, apan ang mas grabe pa mao nga gibuhat nila kini nga hugot silang nagpabilin sa ilang sayop. Nagdumili sila sa pagpaubos sa ilang kaugalingon ug sa pagsusi pag-usab sa ilang sayop. Ug kining pagmagahi sa kasingkasing maoy hinungdan nga nagpabilin sila sa usa ka “walay kataposang sala.”
Tingali ang labing importanteng leksiyon nga atong makat-onan gikan niining bahina mao nga kinahanglan natong likayan ang pagmagahi ug pagpabilin sa atong garbo. Kinahanglan kanunay kitang magmapainubsanon ug andam ug kinabubut-ong mosusi pag-usab sa atong mga binuhatan. Ang pagkamapainubsanon motabang kanato nga kanunayng mahinumdom nga dali ra kitang mahisalaag sa kinabuhi. Ug bisan mahitabo kini matag karon ug unya sa nagkalainlaing paagi, kon magpabilin kitang mapainubsanon ug bukas sa pagbag-o, kanunay natong madawat ang kalooy sa Dios ug makaplagan ang kapasayloan. Apan kon mapahitas-on kita ug padayon nga magdumili sa pag-angkon sa atong mga sayop, nan mahimo usab kitang mahimong sad-an sa usa ka sala batok sa Espiritu Santo.
Pamalandongi karong adlawa ang bisan unsang kahilig nimo sa pagmagahi sa imong kaugalingon. Ang pagkamalig-on mahimong usa ka hiyas kon kini usa ka dili matarog nga pasalig ngadto sa Ebanghelyo ug sa kabubut-on sa Dios. Apan kinahanglan kanunay nimong tuyoon ang pagsusi pag-usab sa dalan nga imong gisubay aron makausab ka sa dihang kini nga dalan magsugod na sa pagtipas gikan sa Kamatuoran sa Dios. Ipaubos ang imong kaugalingon karong adlawa ug tugoti ang tingog sa Dios sa paggiya kanimo pabalik gikan sa bisan unsang mga sayop nga imong ginalisdan karon.
Akong maluluy-ong Jesus, makasala ako matag adlaw ug padayon akong mapakyas sa pagsunod Kanimo sa hingpit. Tungod niini, nagpasalamat ako Kanimo sa Imong madagayaong kalooy. Palihog tabangi ako nga kanunayng mahimong bukas nianang kalooya pinaagi sa kanunay nga pagsusi pag-usab sa akong mga desisyon sa kinabuhi. Hatagi ako og pagkamapainubsanon, hinigugmang Ginoo, aron kanunay akong maghinulsol ug mobalik Kanimo sa dihang mahisalaag ako. Jesus, nagsalig ako Kanimo.
Nobena nga 9 ka Adlaw alang sa Kinabuhi
Enero 19–27
Ikalimang adlaw: Enero 23
Dugang nga mga Pamalandong sa Ebanghelyo
Mga Pamalandong sa Diosnong Kalooy
Dugang nga Basahon –
San Vicente, Diyakono ug Martir
(Gisaulog sa Enero 23 sa USA)
Adlaw sa Pag-ampo alang sa Legal nga Panalipod sa mga Batang Wala Pa Matawo
(Ibalhin sa Enero 23 kon ang Enero 22 matunong sa Domingo)
Mga Kapilian sa mga Basahon sa Misa
_-_James_Tissot_-_overall.jpg){kind=link}