Miyerkules, Enero 25, 2023
Kapistahan sa Pagkakabig ni San Pablo, Apostol
“Saulo, igsoon ko, gipadala ako sa Ginoo, si Jesus nga nagpakita kanimo sa dalan nga imong giagian, aron makakita ka pag-usab ug mapuno sa Espiritu Santo.” Acts 9:17
Si San Pablo (nga sa Hebreohanon nailhan nga Saulo nga taga-Tarso) usa ka debotong Hudiyong Pariseo nga mainitong nanalipod sa balaod. Human sa Pagsaka ni Jesus sa Langit, ang bag-ong Kristohanong pagtuo misugod sa paspas nga pagkaylap. Tungod niini, si Saulo nga taga-Tarso naningkamot pag-ayo sa pagwagtang niining bag-ong relihiyon nga iyang giisip nga sayop. Nagpanaw siya sa pagpangita sa mga sumusunod ni Jesus aron dakpon ug prisohon. Miuyon pa gani si Saulo sa pagbato hangtod sa kamatayon sa diyakono nga si San Esteban, ang unang martir. Apan, sa usa sa iyang mga panaw, si Saulo nakakita og panan-awon sa nabanhaw nga Kristo nga malumong misulti kaniya, “Saulo, Saulo, nganong gilutos mo Ako?” (Acts 9:4). Nianang maong panagtagbo, si Saulo nabutaan sulod sa tulo ka adlaw.
Ang gikutlo sa ibabaw mao ang mga pulong ni Ananias, usa ka debotong tinun-an ni Jesus. Si Ananias nakadawat usab og panan-awon gikan kang Jesus nga nagsugo kaniya sa pag-adto kang Saulo nga taga-Tarso ug sa pagpandong sa iyang mga kamot kaniya aron mamaayo siya. Gisultihan usab si Ananias nga si Saulo usa ka “piniling galamiton” nga pinaagi kaniya ang Ebanghelyo isangyaw ngadto sa “mga Hentil, mga hari, ug mga anak sa Israel.”
Bisan daghan ang makapadani nga mga bahin sa sugilanon ni San Pablo ug sa iyang pagkakabig, makapadasig usab ang pagpamalandong sa paagi nga unang gikabig siya sa Diyos. Wala magmapintas si Jesus kang Saulo. Wala Niya siya hukmi sa silot. Hinuon, nakita Niya ang kaayo ug kadasig ni Saulo ug nasayod Siya nga motubag kini kon hatagan og higayon. Bisan gigamit ni Jesus ang gamhanang buhat sa pagbuta kaniya, gibuhat Niya kini tungod kay nakita Niya ang dakong katakos ni Saulo sa pagbuhat og maayo.
Kining maong kamatuoran magamit usab sa atong kinabuhi. Ang matag usa kanato adunay talagsaong katakos sa pagbuhat og maayo, ug nakita gayod kini sa Diyos. Nasayod ang Diyos sa tanan Niyang mahimo pinaagi kanato ug nagtinguha Siya sa pagdani kanato ngadto sa Iyang misyon sa pagpaambit sa Ebanghelyo ngadto sa mga nanginahanglan. Ang angay pamalandongan mao kon mitubag ka ba sa mga paagi nga ang Diyos nakigsulti kanimo ug nagdapit kanimo sa pag-alagad Kaniya pinaagi sa imong kinabuhi. Ang panagtagbo ni Saulo ug ni Jesus gamhanan ug nakapausab sa iyang kinabuhi dili lamang tungod kay nabutaan siya niining panan-awona—gamhanan ug makapausab kini, labaw sa tanan, tungod kay gusto ni Saulo nga mag-alagad sa Diyos apan sayop ang iyang paagi sa pagbuhat niini. Ug sa dihang natul-id kadtong sayopa, mitubag dayon si Saulo sa hingpit. Tungod niini, si Saulo nahimong usa sa labing bantog nga mga ebanghelisador sa kasaysayan sa Simbahan.
Pamalandongi karon ang tinguha sa kasingkasing ni Jesus sa pagdapit kanimo ngadto sa Iyang misyon. Bisan tingali wala ka masayod sa daghang paagi nga magamit ka sa Diyos, si Jesus hingpit nga nasayod niini. Nakita Niya ang tanan mong mga gasa ug nasayod Siya kon kinsa ang gusto Niyang danihon ngadto sa Iyang kaugalingon pinaagi kanimo. Isulti ang imong “Oo” Kaniya karong adlawa ug buhata kini sa tibuok mong kalag. Sa pagbuhat niini, tugotan nimo ang Diyos sa pagbuhat og dagkong mga butang pinaagi kanimo.
Ginoo, gihigugma Ko gayod Ikaw ug nagtinguha ako nga magamit Mo sa paagi nga Imong pilion. Tabangi ako nga mas hingpit nga makabig ang akong kasingkasing ngadto Kanimo aron magiyahan ako sa Imong malumo ug gamhanang kamot. Gidawat ko ang bisan unsang misyon nga Imong ihatag kanako ug nagaampo ako nga ang akong kinabuhi makahatag Kanimo og tinuod nga himaya ug makapauswag sa Imong mahimayaong Gingharian dinhi sa yuta. Jesus, nagsalig ako Kanimo.
9 ka Adlaw nga Novena alang sa Kinabuhi
Enero 19–27
Ikapitong adlaw: Enero 25
Dugang nga mga Pamalandong sa Ebanghelyo
Mga Pamalandong sa Diosnong Kalooy
Kapistahan Karong Adlawa – Ang Pagkakabig ni San Pablo, Apostol
Mga Kapilian sa mga Basahon sa Misa
