Enero 31, 2023
Martes sa Ikaupat nga Semana sa Kasagarang Panahon
Mga Pagbasa Karong Adlawa
San Juan Bosco, Pari—Paghandum
Paminaw sa Iningles
Samtang nagsulti pa Siya, miabot ang mga tawo gikan sa balay sa pangulo sa sinagoga ug miingon, “Namatay na ang imong anak nga babaye; nganong samokon pa man nimo ang magtutudlo?” Wala tagda ni Jesus ang gisugilon nga balita, ug miingon Siya sa pangulo sa sinagoga, “Ayaw kahadlok; pagbaton lamang og pagtuo.” Marcos 5:35–36
Kining mubo nga mga pulong angay pamalandongan matag adlaw. “Ayaw kahadlok; pagbaton lamang og pagtuo.” Kini nga pahayag magamit sa daghang kahimtang nga atong masinati sa tibuok natong kinabuhi. Kini usa ka sugo sa gugma gikan sa atong Ginoo, ug usa ka sugo nga kinahanglan natong tanan madungog, ilabina kon moabot ang mga kalisdanan.
Una, angay hinumdoman nga grabe kaayo kini nga kahimtang, busa masabtan ra ang hilabihang pagbati ug ang mga pagtintal sa pagpadaog sa kahadlok. Ang amahan niini nga sugilanon adunay batang anak nga babaye nga himalatyon, ug miduol siya kang Jesus aron mangamuyo nga ayohon kini. Miuyon si Jesus. Apan samtang nagpadulong pa sila, si Jesus ug ang amahan nakadawat sa makapasubo kaayong balita nga bag-o lang namatay ang bata. Sama sa nahibaloan sa bisan kinsang ginikanan, hilabihan gayod kalisod ang pagpaminaw niining balitaa. Busa sugdi pinaagi sa pagsulay sa pagsabot sa kasubo nga gibati niining amahana. Ilabina, paningkamoti nga masabtan ang iyang kasubo niadtong higayona sa iyang pagkadungog niining makadugmok nga balita.
Samtang namalandong ka sa iyang kasubo, paningkamoti usab nga pamalandongan ang kasingkasing, panghunahuna, mga pagbati ug mga pulong ni Jesus. Walay kahadlok si Jesus. Nasayod Siya nga maayo kaayo ang sangpotanan niini. Apan tungod kay dako usab ang Iyang pakigbati ug gugma alang niining nagbangotang amahan, milingi si Jesus ngadto kaniya aron hatagan siyag paglaom. Lisod makakaplag og paglaom taliwala sa hilabihan kalisod ug kasakit nga kasinatian sa kinabuhi. Kon mag-atubang kita og kasubo, kusog kaayo ang pagtintal sa pagpadaog sa pagkawalay paglaom. Ang pagkawalay paglaom mao ang hingpit nga pagkawala sa paglaom. Nagpahilayo kini kanato gikan sa Dios ug naghukas kanato sa pagtuo. Apan kanunay natong malikayan ang pagkawalay paglaom kon sundon nato ang sugo sa gugma ni Jesus. “Ayaw kahadlok; pagbaton lamang og pagtuo.”
Unsa man ang nagtintal kanimo sa pagkahadlok sa kinabuhi? Unsa man ang nagtintal kanimo sa pagkawala sa imong paglaom? Tingali naglisod ka sa pag-atubang sa kamatayon sa usa ka minahal, ug bug-at kaayo kini alang kanimo. Tingali gagmay nga mga butang ang hinungdan sa imong kasubo ug dili pa kini kaayo bug-at karon. Ang tinuod mao nga kitang tanan makasinati matag adlaw og gagmay nga mga pagtintal sa pagkawala sa paglaom. Ug kadaghanan kanato makasinati usab og grabeng mga pagtintal sa usa ka higayon o sa lain. Tungod niini, kinahanglan kitang tanan kanunay nga mamati sa mga pulong ni Jesus ug maningkamot sa pagwagtang sa matag kahadlok sa kinabuhi, samtang naghangyo kita sa Dios nga itugyan kanato ang gasa sa paglaom nga nagagikan sa dili matarog nga pagtuo sa Iyang plano alang sa atong kinabuhi.
Pamalandongi karon ang bisan unsang pakigbisog nimo batok sa pagkawalay paglaom, kahadlok o kabalaka sa kinabuhi. Samtang ginabuhat nimo kini, hinumdomi nga ang tanang butang mahimo kon modangop ka sa Dios uban sa pagtuo. Ang pagtuo dili kanunay magwagtang sa mga kalisdanan sa kinabuhi; aduna kiniy ginabuhat nga labaw pang maayo. Giusab niini ang mga kalisdanan aron makaagwanta ka niini uban sa grasya, kalipay ug labaw-sa-kinaiyahan nga paglaom. Kon mahitabo kini, ang tanang butang sa kinabuhi mahimong gamiton sa Dios alang sa atong kaayohan. Ang kinahanglan lamang natong buhaton mao ang padayon nga pagsalikway sa kahadlok ug ang “pagbaton lamang og pagtuo.”
Akong maluloy-ong Ginoo, Imong gihupay kining nagbangotang amahan ug gipatisok diha kaniya ang mga gasa sa pagtuo ug paglaom. Palihog isulti usab kanako ang Imong sugo sa gugma, nga nagtawag kanako sa pagsalig Kanimo bisan unsa pa ang akong mga pakigbisog sa kinabuhi. Hinaot nga kanunay akong adunay pagtuo Kanimo ug dili gayod mahulog sa pagkawalay paglaom o kahadlok. Jesus, nagsalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Santos sa Adlaw – San Juan Bosco, Pari
Mga Kapilian sa mga Basahon sa Misa
.jpg){kind=link}