Pebrero 3, 2023
Biyernes sa Ikaupat nga Semana sa Kasagarang Panahon
Mga Pagbasa Karong Adlawa
San Blase, Obispo ug Martir—Dili Obligadong Paghandum
San Ansgar, Obispo—Dili Obligadong Paghandum
Paminaw sa Iningles
Nahadlok si Herodes kang Juan, kay nahibalo siya nga matarong ug balaan kini nga tawo, ug gibantayan niya kini sa bilanggoan. Sa dihang madungog niya siyang mosulti, malibog siya pag-ayo, apan ganahan gihapon siyang maminaw kaniya. Marcos 6:20
Sa labing maayong kahimtang, kon ang Ebanghelyo iwali ug dawaton sa usa ka tawo, mapuno ang nagdawat niini sa kalipay, kahupayan ug tinguha sa pagbag-o. Makapausab ang Ebanghelyo sa mga tawo nga tinuod nga maminaw ug bukas-palad nga motubag. Apan komosta man kadtong dili bukas-palad nga motubag? Unsay epekto sa Ebanghelyo kanila? Ang atong Ebanghelyo karong adlawa naghatag kanato sa tubag.
Ang teksto sa ibabaw gikuha gikan sa asoy sa pagpugot sa ulo ni San Juan Bautista. Ang mga nagbuhat ug daotan niini nga asoy mao si Herodes, ang iyang dili lehitimong asawa nga si Herodias, ug ang anak nga babaye ni Herodias (nga sa tradisyon ginganlag Salome). Gipabilanggo ni Herodes si Juan tungod kay giingnan siya ni Juan, “Dili subay sa balaod nga maimo ang asawa sa imong igsoon.” Apan ang labing makapainteres niini nga asoy mao nga, bisan diha sa bilanggoan, mamati gihapon si Herodes sa pagwali ni Juan. Apan imbis nga magdala kini kang Herodes ngadto sa pagkakabig, “nalibog” hinuon siya sa giwali ni Juan.
Ang “pagkalibog” dili mao lamang ang tubag sa pagwali ni Juan. Ang tubag ni Herodias mao ang pagdumot. Daw natusok ang iyang kasingkasing sa pagkondenar ni Juan sa iyang “kaminyoon” kang Herodes, ug siya gayod ang nagplano ug nagpahigayon sa pagpugot sa ulo ni Juan.
Busa, kini nga Ebanghelyo nagtudlo kanato sa duha pa ka kasagarang mga tubag sa Kamatuoran sa balaang Ebanghelyo kon kini iwali. Ang usa mao ang pagdumot ug ang lain mao ang kalibog (ang pagkahimong nalibog). Tin-aw nga ang pagdumot mas daotan kaayo kay sa pagkalibog lamang. Apan walay usa niini nga hustong tubag sa mga pulong sa Kamatuoran.
Unsa ang imong tubag sa tibuok Ebanghelyo kon kini iwali? Aduna bay mga bahin sa Ebanghelyo nga makapabalaka kanimo? Aduna bay mga pagtulon-an sa atong Ginoo nga makapalibog kanimo o makapasuko kanimo? Susihon una ang imong kaugalingong kasingkasing aron masuta kon naglisod ka ba tungod kay susama sa tubag ni Herodes ug ni Herodias ang imong tubag. Ug dayon palandonga kon giunsa sa kalibotan pagtubag sa Kamatuoran sa Ebanghelyo. Dili gayod kita angay mahibulong nga daghan kitag makaplagang mga Herodes ug mga Herodias nga buhi karon.
Palandonga karong adlawa ang bisan unsang paagi nga imong nakita nga gisalikway ang Ebanghelyo sa usa o laing ang-ang. Kon mabati nimo kini sulod sa imong kaugalingong kasingkasing, paghinulsol uban sa tibuok mong kusog. Kon makita nimo kini sa ubang dapit, ayaw tugoti nga ang maong pagsupak makauyog o makapabalaka kanimo. Ipunting ang imong hunahuna ug kasingkasing sa Kamatuoran ug pagpabiling lig-on bisan unsa pa ang tubag nga imong masugatan.
Akong Ginoo sa tanang Kamatuoran, ang Imong Pulong ug ang Imong Pulong lamang ang nagdala ug grasya ug kaluwasan. Palihog hatagi ako sa grasya nga akong gikinahanglan aron kanunay kong paminawon ang Imong Pulong ug bukas-palad nga motubag uban sa tibuok kong kasingkasing. Hinaot nga maghinulsol ako kon ipaila kanako sa Imong Pulong ang akong sala, ug hinaot nga mobalik ako Kanimo sa tibuok kong kasingkasing. Hatagi ako ug kaisog kon isalikway sa uban ang Imong Kamatuoran ug kaalam aron mahibalo ako unsaon pagpaambit nianang Pulonga uban sa gugma. Hesus, misalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Santos sa Adlaw –
San Blase, Obispo ug Martir—Dili Obligadong Paghandum
San Ansgar, Obispo—Dili Obligadong Paghandum
Mga Kapilian sa mga Basahon sa Misa
