Pebrero 27, 2023
Lunes sa Unang Semana sa Kwaresma
Mga Pagbasa Karong Adlawa
San Gregorio sa Narek, Abad ug Doktor sa Simbahan—Opsiyonal nga Handumanan
Paminaw sa Iningles
Miingon si Jesus sa Iyang mga tinun-an: “Inig-abot sa Anak sa Tawo diha sa Iyang himaya, uban sa tanang mga anghel, molingkod Siya sa Iyang mahimayaong trono, ug ang tanang mga nasod pagatigomon sa Iyang atubangan. Ug Iyang pagalainon ang mga tawo gikan sa usag usa, sama sa usa ka magbalantay nga maglain sa mga karnero gikan sa mga kanding.” Matthew 25:31–32
Pagkatalagsaong talan-awon nga angay pamalandongan! Sulayi paghanduraw kini nga talan-awon. Sa usa ka gitakdang higayon sa umaabot, ang Ikaduhang Persona sa Labing Balaang Trinidad, nga karon anaa usab sa tawhanong dagway isip “Anak sa Tawo,” mobalik sa yuta sa himaya, gilibotan sa tanang anghel sa Langit, ug molingkod sa Iyang bag-o ug mahimayaong trono. Atubangan nianang trono, pagatigomon ang matag tawo gikan sa matag nasod nga sukad naglungtad, ug ang matag usa pagahukman sumala sa iyang mga buhat. Kadtong mialagad sa atong Ginoo ug mitagad sa labing gagmay sa Iyang mga igsoong lalaki ug babaye uban sa kalooy ug pagmalasakit makadungog kang Jesus nga moingon, “Umari kamo, kamong gipanalanginan sa akong Amahan. Panunda ang gingharian nga giandam alang kaninyo sukad sa pagkatukod sa kalibotan.” Kadtong wala moalagad kang Kristo ug wala motagad sa labing gagmay uban sa kalooy ipadala ngadto sa walay kataposang silot samtang si Jesus moingon kanila, “Pahawa kamo gikan kanako, kamong mga tinunglo, ngadto sa kalayong walay kataposan nga giandam alang sa Yawa ug sa iyang mga anghel.” Nianang adlawa, usa lamang ka butang ang mahinungdanon, kay ang dangatan sa matag usa sa kahangtoran hukman na nga dili na mausab. Ang bugtong mahinungdanon mao kon ibutang ka ba sa tuo sa atong Ginoo aron makapanunod sa kinabuhing dayon, o sa Iyang wala ug ipadala ngadto sa kalayong walay kataposan.
Usahay, sa atong panaw sa kinabuhi, makalimot kita niining mahimayaong adlaw. Kon maghunahuna kita sa Dios ug sa Langit, sayon rang mahulog sa mapasipalahong pagsalig nga garantiya na alang kanato ang Langit. Ang Dios maayo ug maluloy-on, ug gihigugma Niya kita. Busa, magtuo kita nga sigurado na ang Langit ug ang labing daotan lamang nga mga tawo ang mahiadto sa impiyerno. Apan dili ingon niini ang paghulagway ni Jesus sa Adlaw sa Paghukom.
Gipasabot ni Jesus nga sa panahon sa paghukom, ang mga matarong mahibulong nga ang pag-atiman sa mga gigutom, giuhaw, dumuloong, hubo, masakiton, o binilanggo sama ra diay sa pagpakita og gugma sa Dios. Sa samang paagi, kadtong nagpasagad niining mga tawhana mahibulong nga napakyas diay sila sa paghigugma sa Dios tungod kay wala nila higugmaa ang labing gagmay sa mga igsoong lalaki ug babaye ni Jesus. Ayaw pakagamaya kining pagtulon-an. Si Jesus wala maglikaylikay sa Iyang mga pulong. Tin-aw kaayo ug tino ang Iyang gisulti.
Sa imong kinabuhi, kinsa man kining “labing gagmay” nga gihisgotan ni Jesus? Ang mga gigutom ug giuhaw dili lamang kadtong adunay pisikal nga mga panginahanglan kondili usab kadtong adunay espirituhanong mga pangandoy nga kinahanglang matagbaw. Sila kadtong nangawala o naglibog sa kinabuhi nga kinahanglang hatagan og direksiyon. Ang dumuloong mahimong si bisan kinsa nga nag-inusara ug dali rang mapasagdan. Ang hubo mahimong kadtong dili makaatiman sa ilang kaugalingong mga panginahanglan. Ang masakiton mahimong kadtong mga tigulang o nag-antos sa nagkalainlaing paagi. Ug ang mga binilanggo mahimong maglakip niadtong gigapos sa sala nga nagkinahanglan og tabang aron makalingkawas. Ayaw kalimot sa pagpangita sa atong Ginoo nga anaa sa mga tawo sa imong palibot.
Pamalandongi karong adlawa kadtong mga tawo sa imong kinabuhi nga daw labing nahisalaag ug labing nagkinahanglan sa imong pagmalasakit. Kadtong dili nato gustong duolon ug tabangan mao kasagaran ang labing nagkinahanglan sa atong pagmalasakit ug kalooy. Ang “labing gagmay” kasagaran mao kadtong atong gihukman, gikondenar, o gipasagdan. Hinumdomi ang tawo nga daw labing dili takos sa imong gugma ug hibaloi nga si Jesus nagpuyo diha kaniya, naghulat nga higugmaon nimo Siya pinaagi sa paghigugma nianang tawhana.
Labing maluluy-ong Ginoo, dako ang Imong kaluoy ug tinuod ang Imong paghukom. Tabangi ako nga kanunayng ipunting ang akong hunahuna nianang kataposan ug mahimayaong adlaw nga mobalik Ka uban sa tanan Mong kahalangdon ug himaya aron paghukom sa mga buhi ug sa mga minatay. Hinaot nga tinuod kong sundon ang Imong mga pulong ug mangandam alang nianang adlawa pinaagi sa paghigugma Kanimo diha sa tanang tawo, ilabina niadtong labing nanginahanglan. Hesus, misalig ako Kanimo.
40 ka Adlaw sa Tiilan sa Krus:
Usa ka Pagtutok sa Gugma Gikan sa Kasingkasing sa Atong Mahal nga Inahan
Pamalandong Tulo – Ang mga Hunahuna sa Inahan sa Dios
(Lunes sa Unang Semana sa Kwaresma)
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Kapanguhaan alang sa Kwaresma
Mga Pamalandong sa Balaang Kasulatan alang sa Kwaresma
Santos sa Adlaw – San Gregorio sa Narek, Abad ug Doktor sa Simbahan
Mga Kapilian sa mga Basahon sa Misa
Duha ka maayong libro alang sa Kwaresma:
