Mayo 15, 2023
Lunes sa Ikaunom nga Semana sa Pasko sa Pagkabanhaw
Mga Pagbasa alang sa Karon
San Isidro—Opsiyonal nga Paghandum sa USA
Paminaw sa Iningles
Miingon si Jesus sa Iyang mga tinun-an: “Sa pag-abot sa Manlalaban nga Akong ipadala kaninyo gikan sa Amahan, ang Espiritu sa kamatuoran nga nagagikan sa Amahan, Siya magpamatuod mahitungod Kanako. Ug kamo usab magpamatuod, kay uban na kamo Kanako sukad pa sa sinugdan.” John 15:26–27
Gipahibalo ni Jesus ang Iyang mga tinun-an nga moabot ang “Espiritu sa kamatuoran” ug nga ang Espiritu, ingon man ang mga tinun-an, “magpamatuod” mahitungod Kaniya. Sa unang pagsulti ni Jesus niini nga mga pulong ngadto sa Iyang mga tinun-an, wala pa sila makasabot sa Iyang gipasabot. Tungod kay matagnaon kini nga mga pulong, gipamulong kini aron matuman sa umaabot, ug sa dihang matuman na, masabtan na usab kini. Busa unsa man ang gipasabot ni Jesus?
Kon atong tan-awon ang Mga Buhat sa mga Apostoles ug basahon ang mahitungod sa unang Simbahan, klaro nga adunay talagsaong kausaban nga nahitabo human mikayab si Jesus sa Langit. Sa wala pa kadtong panahona, ang mga tinun-an ug ang ubang mga sumusunod ni Jesus may pagtuo, apan nahadlok usab sila. Nakig-uban sila sa uban nga nagtuo, apan gihimo nila kini sa tago ug uban sa kahadlok. Apan sa pag-abot sa Pentekostes ug sa pagkunsad kanila sa Espiritu Santo, ang Manlalaban, ang Espiritu sa Kamatuoran, gisugdan sa Dios ang paggamit sa mga Apostoles aron maisogong imantala ang Ebanghelyo nga walay kahadlok ug adunay dakong epekto sa daghang tawo. Kining kasinatian sa mga tinun-an sa atong Ginoo, nga napuno sila sa Espiritu Santo, mao ang gipasabot ni Jesus.
Human mamatay si Jesus, ug tingali labaw pa gayod human Siya mikayab sa Langit, lagmit adunay pipila sa Iyang mga tinun-an nga dihadiha mihukom nga natapos na ang bag-ong kalihokan nga gisugdan ni Jesus. Dili gayod nila mahunahuna nga ang gisugdan ni Jesus nagsugod pa lamang diay. Dili gayod nila mahunahuna nga sa dili madugay makaambit sila sa pagsugod sa Simbahan, magmantala sa Ebanghelyo uban sa kaisog ug gahom, makakita sa pagkakabig sa dili maihap nga mga kinabuhi, makasaksi sa padayon nga pagpasaylo sa mga sala, ug sa kataposan ihalad ang ilang kinabuhi sa pagsundog sa atong Ginoo. Wala gayod masayod kining mga tinun-an kon unsa ang naghulat kanila sa pag-abot sa Manlalaban, ang Espiritu sa Kamatuoran. Ang naghulat kanila mao ang ilang pag-ambit sa katakos sa “pagpamatuod” mahitungod kang Jesus pinaagi sa gahom sa Espiritu Santo. Sa wala madugay, ilang naamgohan nga si Jesus sa pagkatinuod mas buhi pa gayod kay sa kaniadto ug nga karon nagpadayon Siya sa pagkabig sa mga kalag pinaagi sa gahom sa Espiritu Santo ug sa paggamit sa tanan Niyang bag-ong mga tinun-an isip Iyang mga galamiton.
Mao usab kini ang tinuod sa atong kinabuhi karon. Komon kaayo sa mga Kristohanon nga motuo lamang kang Jesus sa personal, apan dili dayon makahatag ug kinasingkasing nga pagpamatuod mahitungod Kaniya pinaagi sa makapausab nga gahom sa Espiritu Santo. Komon kaayo sa mga sumusunod ni Cristo nga molihok nga mas susama sa mga tinun-an sa wala pa moabot ang Espiritu Santo. Kasagaran kaayo, gitipigan lamang sa mga Kristohanon ang Ebanghelyo alang sa ilang kaugalingon, kay nahadlok silang magpamatuod pinaagi sa gahom sa Espiritu Santo.
Pamalandongi karong adlawa kining matagnaong mga pulong ni Jesus. Bisan tuod kining mga pulonga unang gisulti ngadto sa Napulog Duha, gisulti usab kini ni Jesus kanimo karon. Buot Niya nga ikaw usab mahimong saksi Kaniya, nga magpamatuod ngadto sa uban aron motuo sila. Pamalandongi kon unsa ka maayo nimo pagtuman kining matagnaong tawag. Sa mga bahin diin ikaw kulang, pag-ampo nga ibubo ang Espiritu Santo sa imong kinabuhi aron maabot sa Dios ang daghang kasingkasing pinaagi kanimo.
Labing mahimayaong Jesus, misaad Ka nga ipadala ang Espiritu Santo, ang Manlalaban ug Espiritu sa Kamatuoran, ngadto sa Imong mga tinun-an ug kanako usab. Espiritu Santo, gidawat Ko Ikaw sa akong kinabuhi ug gitugyan ko ang akong kaugalingon Kanimo sa walay pagpanagana aron gamiton sa pagpamatuod sa Kamatuoran. Palihog gamita gayod ako, akong Dios, ug tandoga ang kinabuhi sa daghang tawo pinaagi kanako. Jesus, nagsalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pag-ampo sa Panahon sa Pasko sa Pagkabanhaw
Mga Pamalandong sa Balaang Kasulatan alang sa Panahon sa Pasko sa Pagkabanhaw
Mga Santos sa Adlaw – San Isidro
Mga Kapilian sa mga Basahon sa Misa
