Mayo 22, 2023
Lunes sa Ikapitong Semana sa Pasko sa Pagkabanhaw
Mga Pagbasa Karong Adlawa
Santa Rita sa Cascia—Opsyonal nga Handumanan
Paminaw sa Iningles
“Gisulti Ko kini kaninyo aron makabaton kamo og kalinaw diha Kanako. Dinhi sa kalibotan makasinati kamo og kasakitan, apan pagmaisogon kamo, gidaog Ko na ang kalibotan.” Juan 16:33
Unsa man ang gisulti ni Jesus sa Iyang mga tinun-an nga nakahatag sa “kalinaw” nga Iyang gihisgotan? Ilabi Niyang gipasabot ang tibuok Niyang Pakigpulong sa Kataposang Panihapon nga atong gibasa niining mga adlawa. Ang mga pulong nga Iyang gisulti sa tibuok pakigpulong gituyo aron hatagan ang mga tinun-an, ug kita usab, og “kaisog” ug katakos sa pagbuntog sa kasakitan nga gipahamtang kanato sa kalibotan.
Sa tibuok pakigpulong ni Jesus, ilabi Niyang gipunting ang Iyang panaghiusa uban sa Iyang Amahan ug ang kamatuoran nga kon magpabilin kitang nahiusa kang Jesus, mahiusa usab kita sa Amahan. Miingon Siya nga Siya ang punoan sa paras ug kita ang mga sanga nga kinahanglang magpabiling hugot nga nakakabit Kaniya. Miingon Siya nga mahimo lamang kini pinaagi sa umaabot nga gahom sa Espiritu Santo nga Iyang ipadala. Ug gihisgotan Niya ang pagdumot sa kalibotan ngadto sa tanan nga magpabiling lig-ong nakagamot sa Kamatuoran. Busa, kon ikaw usa nga naningkamot nga magpabiling lawom nga nakagamot kang Cristo, napuno sa Espiritu Santo ug nahimulag gikan sa mga pagpanglimbong sa sekular ug dili Kristohanong kalibotan, nan klaro nga si Jesus nakigsulti kanimo.
Sa teksto sa ibabaw, gipaila ni Jesus ang usa ka gasa nga makatabang kanato niining panaw. Kini nga gasa mao ang Iyang kalinaw. Ang kalinaw mao ang katakos sa pagpabiling malinawon ug nakapokus taliwala sa bisan unsa ug sa tanang “kasakitan” nga atong masugatan. Ang kasakitan nga ilabina atubangon sa mga Kristohanon mao ang nagkalainlaing pagpanggukod sa kalibotan kon magkinabuhi kita subay sa Kamatuoran. Ug bisan tuod daghan ang moral nga mga kamatuoran nga klarong gitudlo sa atong pagtuo nga gisulong sa kalibotan, aduna usab ubang matang sa mga kalisdanan nga atong masugatan sa kalibotan karon.
Usa sa labing dayag nga mga kalisdanan nga gipahamtang sa kalibotan sa daghang tawo mao ang walay hunong nga pagpukaw sa atong panan-aw, pandungog ug hunahuna. Saba ang atong kalibotan. Ang modernong mga elektronikong kahimanan, ang mass media, mga anunsiyo, radyo, Internet, social media ug daghan pang ubang bahin sa atong adlaw-adlaw nga kinabuhi adunay maliputon nga epekto sa pagbalda sa atong pagtagad, pagpukaw kanato ug pag-agaw sa kalinaw ni Cristo.
Hunahunaa, pananglitan, ang pagsulod sa kahilom sa usa ka espirituwal nga rekoleksiyon sulod sa usa o duha ka adlaw, o mas dugay pa. Unsaon nimo pag-atubang ang pagpalong sa imong smartphone, tablet, kompyuter, telebisyon ug radyo sulod sa taas-taas nga panahon? Makasinati ka kaha og matang sa kalisod tungod sa paghunong sa imong naandan? Daghan karon ang tinuod nga maglisod niini. Ug ang hinungdan niini mao nga ang “kalinaw” nga gihisgotan ni Jesus hinayhinay nang nagkagamay sa kinabuhi sa daghang tawo. Imbes nga kalinaw sa Diyos, napuno kita sa walay hunong nga kasaba, kagubot ug kalihokan. Mao kini ang “kalibotan” nga nagsulong kanato ug nag-agaw sa kalinaw nga buot ihatag sa Diyos.
Pamalandongi karon kining hilabihan ka mahinungdanong kamatuoran—nga buot ni Jesus nga masinati nimo ang Iyang kalinaw sa imong kasingkasing. Ug buot Niya nga kining kalinawa maoy magpalig-on kanimo. Pamalandongi ang panagsangka nga mahimong nagakahitabo sa imong sulod tali sa kalibotan ug sa kalinaw ni Cristo. Kinsa man ang nagmadaogon niining panagsangka alang sa imong kalag? Ang kalibotan ba ang mas naghari sa imong sulod, o ang kalinaw ni Cristo? Pangitaa ang kalinaw nga si Jesus lamang ang makahatag, ug samtang imong madiskobrehan ang Iyang kalinaw, madiskobrehan usab nimo ang tinubdan nianang kalinawa: si Jesus Mismo.
Ginoo sa tanang kalinaw, gitawag Mo kami gikan sa kalibotan aron ang Imong kalinaw magpabilin sulod kanamo, magpalig-on kanamo, ug maghatag kanamo og kaisog, kaalam ug kusog. Giablihan ko ang akong kinabuhi Kanimo, minahal nga Ginoo, ug nag-ampo ako nga ang daghang mga makabalda ug mga kagubot nga gipahamtang kanako sa kalibotan magsugod na sa paghunong. Hinaot nga kanunay kong madungog ang Imong malumo nga tingog ug mosunod Kanimo ngadto sa dapit sa hilom nga pagpahulay nga makaplagan lamang diha Kanimo. Jesus, misalig ako Kanimo.
Nobena sa Espiritu Santo
Iampo isip pagpangandam alang sa Pentekostes
Ikaupat nga Adlaw – Lunes, Mayo 22
Mga Pag-ampo sa Pasko sa Pagkabanhaw
Dugang nga mga Pamalandong sa Ebanghelyo
Mga Pamalandong sa Diosnong Kalooy
Santos sa Adlaw – Santa Rita sa Cascia
Mga Kapilian sa mga Basahon sa Misa
