Mayo 27, 2023
Sabado sa Ikapitong Semana sa Pasko sa Pagkabanhaw
Mga Pagbasa Karong Adlawa
Santo Agustin sa Canterbury, Obispo—Opsiyonal nga Handumanan
Paminaw sa Iningles
Mao kini ang tinun-an nga nagpamatuod niining mga butanga ug nagsulat niini, ug nasayod kita nga tinuod ang iyang pagpamatuod. Aduna pay daghang ubang butang nga gibuhat ni Jesus, apan kon isulat kini sa tagsatagsa, sa akong hunahuna dili maigo sa tibuok kalibotan ang mga basahon nga masulat. Juan 21:24–25
Sa atong pagtapos sa panahon sa Pasko sa Pagkabanhaw, gihatag kanato ang kataposang bahin sa Ebanghelyo ni San Juan aron pamalandongan. Hinumdomi nga ang Ebanghelyo ni Juan maoy usa sa mga pangunang gitutokan sa tibuok Panahon sa Pasko sa Pagkabanhaw. Busa, kon mabinantayon ug mainampoon nimong gibasa ang Ebanghelyo alang sa Misa matag adlaw sa miaging pipila ka semana, nan tinuod nga naunlod ka na niining balaang Ebanghelyo.
Lahi kaayo ang Ebanghelyo ni San Juan kon itandi sa laing tulo ka Sinoptikong Ebanghelyo. Mistiko ug simboliko ang pinulongan ni Juan. Gipresentar ni Juan ang pito ka milagro isip pito ka “timaan” nga nagpadayag sa pagka-Diyos ni Jesus. Gipaila si Jesus isip AKO MAO AKO, ang Anak sa Amahan, ang Punoan sa Ubas, ang Tinapay sa Kinabuhi, ang Kahayag sa Kalibotan, ang Walay Kataposang Pulong, ug uban pa. Gipunting ni Juan ang Paglansang sa Krus isip takna sa himaya ni Jesus, diin molingkod Siya sa Iyang trono nga mao ang Krus alang sa kaluwasan sa kalibotan. Ug lalom gayod ang pagtulon-an ni Juan mahitungod sa Eukaristiya.
Gipahayag ni Juan nga ang hinungdan sa iyang pagsulat sa iyang Ebanghelyo mao “aron motuo kamo nga si Jesus mao ang Mesiyas, ang Anak sa Diyos, ug aron pinaagi niining pagtuo makabaton kamo og kinabuhi diha sa iyang ngalan” (Juan 20:31). Klaro nga gihigugma ni Juan ang atong Ginoo ug nakasabot siya Kaniya, dili lamang pinaagi sa iyang personal nga mga kasinatian samtang buhi pa si Jesus dinhi sa yuta, kondili usab pinaagi sa lawom nga kinabuhi sa pag-ampo sa ulahing mga tuig sa iyang kinabuhi. Ug kining kalalom sa pagsabot ug mistikong kahibalo gipahayag sa paagi nga ang magbabasa dali nga madani ngadto sa mainampoong pagsabot ni Juan.
Sa pagtapos ni Juan sa iyang pagpamatuod mahitungod kang Jesus, aduna siyay gipahayag nga angay pamalandongan. Miingon siya nga daghan kaayong gibuhat si Jesus nga wala niya o sa uban masulat, nga kon isulat pa kining tanan, dili maigo sa tibuok kalibotan ang mga basahon nga masulat. Una sa tanan, ang tanang nasulat mahimong tinubdan sa mainampoong pagtuon sulod sa tibuok kinabuhi. Bisan ang Ebanghelyo lamang ni Juan, dili gayod mahurot ug tukib ang kahulogan niini. Apan karon, palandonga kining kataposang pahayag sa Ebanghelyo ni Juan ug sulayi sa makadiyot ang pagsabot niini sa literal nga paagi. Kon literal nga tinuod kana nga pahayag—nga dili maigo sa tibuok kalibotan ang mga basahon nga magrekord sa tanang gibuhat ni Jesus—nan kini nga kamatuoran angayng mopuno kanato sa balaang pagkahingangha. Sa pagkatinuod, ang hinungdan nga kini tinuod gayod mao nga ang gibuhat ni Jesus sulod sa matag hunahuna ug kasingkasing nga Iyang natandog dili gayod mahulagway sa mga pulong. Bisan pa og daghan kaayong tomo ang isulat, dili gihapon kini hingpit nga mahulagway. Ang Iyang diosnong buhat sa pagluwas sa mga kalag, pagpahigawas sa mga tawo gikan sa sala ug kamatayon, ug pagtultol kanila ngadto sa kinabuhing dayon labaw pa sa hingpit nga masabtan sa atong huyang nga mga hunahuna.
Pamalandongi karon ang balaang Ebanghelyo ni San Juan. Samtang atong gitapos kining Panahon sa Pasko sa Pagkabanhaw ug ang atong pagbasa sa Ebanghelyo ni Juan, tugoti ang imong kaugalingon nga magpabilin sa balaang pagkahingangha sa walay kinutobang paglihok sa atong diosnong Ginoo diha sa kinabuhi sa mga midangop Kaniya. Hunahunaa ang matag paglihok sa grasya diha sa ilang kinabuhi nga gipatuman sa atong Ginoo uban sa dakong pag-atiman ug gugma. Pamalandongi nga hangtod sa kahangtoran imong pagamalandongan ang Pulong nga Walay Kataposan nga Nahimong Unod, ang Mesiyas, ang Dakong AKO MAO AKO, ang Anak sa Amahan ug ang tanang ubang ngalan nga gihatag Kaniya nga atong Dios ug Hari. Gihigugma ni San Juan ang atong Ginoo ug nasabtan niya Siya pag-ayo tungod kay iyang gigahin ang iyang kinabuhi sa mainampuong pagpamalandong sa tanan nga gibuhat ni Jesus. Padayona ang imong pagtugyan sa kaugalingon niining balaang pagpamalandong aron madani ka sa mas lawom nga pagkontemplar uban sa balaang pagkahingangha.
Jesus, Mesiyas, ang Imong katahom, himaya ug pagkabalaan labaw gayod sa among masabtan. Ikaw ang Dios gikan sa Dios ug Kahayag gikan sa Kahayag. Ikaw ang Dakong AKO MAO AKO, ug ang tanang basahon sa kalibotan dili igo aron tukmang mahulagway ang kalawom sa Imong pagkahalangdon. Pun-a ang akong hunahuna ug kasingkasing sa gasa sa lawom nga espirituhanong pagsabot aron ako, sama kang San Juan nga Ebanghelista, padayong madani ngadto sa balaang pagkahingangha Kanimo. Jesus, misalig ako Kanimo.
Nobena sa Espiritu Santo
Giampo isip pagpangandam alang sa Pentekostes
Ikasiyam nga Adlaw – Sabado, Mayo 27
Mga Pag-ampo sa Pasko sa Pagkabanhaw
Dugang nga mga Pamalandong sa Ebanghelyo
Mga Pamalandong sa Diosnong Kalooy
Santos sa Adlaw – San Agustin sa Canterbury, Obispo
Mga Kapilian sa mga Basahon sa Misa
