Mayo 30, 2023
Martes sa Ikawalong Semana sa Ordinaryong Panahon
Mga Pagbasa Karong Adlawa
Paminaw sa Iningles
Miingon si Jesus, “Amen, sultihan ko kamo, walay bisan kinsa nga mibiya sa balay o mga igsoong lalaki o mga igsoong babaye o inahan o amahan o mga anak o kayutaan tungod Kanako ug tungod sa Ebanghelyo nga dili makadawat og usa ka gatos ka pilo pa…” Marcos 10:29–30
Ang mga pulong ni Jesus sa ibabaw maoy tubag kang Pedro nga miingon Kaniya, “Gibiyaan namo ang tanan ug misunod Kanimo.” Daw gidayeg ni Pedro ang iyang kaugalingon, nga naningkamot sa pagpasiugda kon unsa kadako ang iyang gisakripisyo ug sa ubang mga tinun-an aron mosunod kang Jesus. Ug tinuod kini, gibiyaan gayod nila ang tanan sa ilang kanhing kinabuhi. Gibiyaan nila ang ilang panimalay, panginabuhi, mga relasyon ug ang tanan nga kabahin sa ilang naandang inadlaw-adlaw nga kinabuhi isip tubag sa tawag ni Jesus. Bug-os gayod ang ilang pagtugyan.
Sa pagkadungog ni Jesus niining mga pulonga ni Pedro, wala Siya mohatag sa gipaabot nga tubag. Wala Siya moingon kang Pedro, “Oo, tinuod kana, makadayeg gayod kana, Pedro. Maayo kaayo ang imong gibuhat ug salamat!” Hinunoa, gipasabot dayon ni Jesus kang Pedro nga takos gayod ang sakripisyong gihimo niya ug sa uban. Ang ilang dili matarog nga pasalig sa pagsunod kang Jesus pagabalosan og mga gasa nga labaw pa sa ilang mahanduraw. Busa, gisulti ni Jesus nga ang mga gasa nga Iyang ihatag kanila labaw pa gayod ka dako kay sa tanang sakripisyo nga ilang gihimo.
Dili kini pagpakagamay sa pagsakripisyo ni Pedro sa iyang kaugalingon; hinunoa, usa kini ka paagi ni Jesus sa pagdasig kaniya. Gidasig Niya si Pedro ug ang ubang mga tinun-an nga mosalig sa hingpit sa ilang desisyon sa pagsunod Kaniya. Ang ilang sakripisyo magbunga og usa ka gatos ka pilo nga balos. Maayo gayod kana nga pagpamuhunan.
Usahay, kitang tanan mahimong matental sa pagbati nga sobra ra ang gipangayo sa Dios kanato. Tinuod nga dako ang gipangayo sa Dios kanato. Gipangayo Niya ang tanan gikan kanato. Gipangayo Niya nga bug-os ug hingpit natong ihalad ang atong kinabuhi ngadto Kaniya. Gitawag kita Niya sa pagbiya sa tanang pagkahakog ug sa pagpahinungod sa atong kaugalingon sa Iyang balaang kabubut-on nga walay eksepsiyon. Apan kon masabtan nato ang ganti sa paghalad sa atong kaugalingon, ang mga sakripisyo nga atong gihimo mahimong gamay ra kaayo kon itandi sa ganti.
Pamalandongi karong adlawa kon makasulti ba ikaw niini nga mga pulong uban sa Apostol nga si San Pedro: “Ginoo, gibiyaan ko ang tanan aron mosunod Kanimo.” Gihatag mo na ba gayod ang imong kinabuhi sa hingpit ngadto kang Cristo Jesus? Aduna pa bay mga butang nga imong gihuptan, nga dili nimo gustong “isakripisyo” alang sa atong Ginoo? Pamalandongi kadtong mga pulong ni Pedro ug tugoti ang imong kaugalingon nga makita ang mga bahin sa imong kinabuhi nga kinahanglan mo pang itugyan kang Jesus. Ug samtang imo kining ginabuhat, tugoti nga ang ganti nga gisaad sa atong Ginoo magdasig kanimo hangtod nga wala ka nay ipabilin alang sa imong kaugalingon ug tinuod nang gibiyaan nimo ang tanan aron mosunod sa Iyang balaang kabubut-on.
Akong manggihatagong Ginoo, gipangayo Mo ang tanan gikan kanako. Gipangayo Mo kanako nga biyaan ko ang tanan sa akong pagtinguha sa Imong hingpit nga kabubut-on. Hatagi ako sa grasya nga akong gikinahanglan aron motubag sa Imong tawag ug magkinabuhi nga puno sa sakripisyo alang Kanimo nga walay pag-ihap sa kantidad niini. Ang Imong pagkamanggihatagon dili mahulagway sa mga pulong, minahal nga Ginoo, ug misalig ako nga ang pagsunod Kanimo maghatag og dagayang maayong bunga. Jesus, misalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Mga Santos/Kasaulogan Karong Adlawa
Mga Kapilian sa mga Basahon sa Misa
Pangunang hulagway sa ibabaw: Gitugyan ni Jesus ang Iyang Panon kang San Pedro sa flickr
