Sabado, Hunyo 17, 2023
Paghandum sa Imakuladong Kasingkasing ni Maria
Sabado human sa ikaduhang Domingo human sa Pentekostes
Paminaw sa Iningles
Mikanaog Siya uban kanila ug miadto sa Nazaret, ug nagmasinugtanon kanila; ug gitipigan sa Iyang inahan kining tanang butanga sa iyang kasingkasing. Lucas 2:51
Balikbalik nga gipadayag kanato sa Kasulatan nga ang Bulahang Birhen Maria “mitipig niining tanang butanga sa iyang kasingkasing.” Unsang mga butanga? Padayon niyang gipamalandongan ang dakong misteryo sa kinabuhi sa iyang Anak samtang ang Iyang sagradong kinabuhi anam-anam nga nabuksan atubangan sa iyang mga mata.
Gamhanan ang gugma sa usa ka inahan. Kasagaran, mas nahibalo ang usa ka inahan sa mga detalye sa kinabuhi sa iyang anak kay sa anak mismo. Mapinanggaon siya, mahupayon, kanunay anaa, malumo ug mahigugmaon. Ingon niini si Maria ngadto sa iyang diosnong Anak, si Jesus.
Si Inahang Maria wala makabaton sa hingpit nga kahibalo sa matag diosnong kamatuoran. Wala niya makita sa iyang mga mata ang Labing Balaang Trinidad samtang nagkinabuhi siya dinhi sa yuta. Wala niya mahibaloi sa hingpit ang laraw sa Amahan. Apan nagkinabuhi siya uban sa hingpit nga pagtuo. Nahibalo usab siya sa daghang kamatuoran sa Langit ug sa yuta pinaagi sa iyang Imakuladong Kasingkasing. Ang iyang kasingkasing napuno sa tanang hiyas. Nahigugma siya sa gugmang dili mahubit. Ug ang labi niyang gipamalandongan sulod sa iyang Imakuladong Kasingkasing, balikbalik sa tibuok niyang kinabuhi, mao ang putli ug hingpit nga gugma nga iyang gibati alang sa iyang Anak. Kining gugmaha nakapahingangha kaniya. Kanunay siyang napuno sa balaang kahingangha samtang nakig-uban siya sa iyang Anak, nagtutok sa Iyang sagradong kinabuhi, ug nagtan-aw Kaniya nga nagtubo sa “kaalam ug pangidaron ug sa kahimuot sa Dios ug sa mga tawo” (Juan 2:52). Ang gugma sulod sa iyang kasingkasing nahimong leksiyon alang kaniya mismo. Padayon nga milalom ang iyang kahibalo sa Dios pinaagi sa pagpamalandong sa hingpit nga gugma nga gibutang sa iyang Dios sulod sa iyang kasingkasing. Ug kining Dios, ang iyang Manluluwas, mao ang iyang Anak.
Gisaulog nato karon ang Paghandum sa Imakuladong Kasingkasing ni Maria. Bisan pa nga adunay daghang kapistahan sulod sa tuig diin gipasidunggan nato kining balaang anak sa Dios, kining pagsaulog usa ka higayon alang kanatong tanan sa pagpamalandong sa iyang mapamalandongong kasingkasing.
Ang kasingkasing sa tawo dili lamang pisikal, espirituhanon usab kini. Kini ang espirituhanong tuboran sa atong gugma alang sa Dios ug sa uban. Gikan sa atong kasingkasing modagayday ang hiyas o bisyo, gugma o pagdumot, pagkamanggihatagon o pagkahakog. Samtang gipasidunggan nato karon ang Imakuladong Kasingkasing, gitawag kita sa pagtan-aw sa hingpit nga sulondan sa angay mopuyo sulod sa atong kaugalingong mga kasingkasing ug sa angay modagayday gikan niini. Ang kahingpitan sa tanang hiyas mao gayod unta ang modagayday gikan sa matag kasingkasing sa tawo sa tanang panahon. Ug ang kasingkasing sa atong Bulahang Inahan maoy motudlo kanato kon unsaon pagsilsil niining mga hiyas sa atong kaugalingon aron mahimong himan sa gugma sa Dios ngadto sa uban.
Pamalandongi karon ang espirituhanong kahingpitan sa Imakuladong Kasingkasing ni Maria. Lisod sabton ang kahingpitan sa atong kahimtang nga nahulog sa sala. Apan samtang mas motan-aw kita sa hingpit nga sulondan, mas pangandoyon nato kini. Ug samtang mas pangandoyon nato kini, mas makab-ot nato kini. Tugoti ang imong kaugalingon karon sa pagpamalandong sa hingpit nga kasingkasing nga anaa sa Inahan sa Dios, ug hangyoa siya nga mangamuyo alang kanimo aron mas hingpit nimo siyang masundog.
Labing Putli nga Kasingkasing ni Inahang Maria, imong gipadayag kanamo ang hingpit nga paagi sa paghigugma sa imong Anak ug sa paghalad sa among kaugalingon ngadto Kaniya. Pinaagi sa imong pagpangamuyo alang kanako, pun-a ako sa gugma nga imong gihuptan alang sa imong Anak. Salamat sa imong pagpamatuod kanamong tanan, ug tabangi kami sa pagsundog sa dili maihap nga mga hiyas nga midagayday gikan sa imong kasingkasing. Putli nga Kasingkasing ni Maria, ig-ampo mo kami. Hesus, nagsalig ako Kanimo.
Mga Pag-ampo sa atong Mahal nga Inahan
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Dugang nga Basahon – Imakuladong Kasingkasing ni Maria
Mga Kapilian sa mga Basahon sa Misa
Mga hulagway nga gipakita sa ibabaw: Flickr
