Agosto 10, 2023
Pista ni San Lorenzo, Diyakono ug Martir
Paminaw sa Iningles
Ang nahigugma sa iyang kinabuhi mawad-an niini, ug ang nagdumot sa iyang kinabuhi niining kalibotana magtipig niini alang sa kinabuhing dayon. John 12:25
Usa kini sa daghang gamhanan ug makapakurat pa gani nga mga pahayag ni Jesus. Ang susamang pahayag ni Jesus makita sa tanang upat ka Ebanghelyo. Niining bersiyon ni Juan, gigamit ang mga pulong nga “gugma” ug “dumot.” Kon higugmaon nato ang atong kinabuhi, mawala kini kanato, apan kon dumtan nato ang atong kinabuhi, matipigan nato kini. Sa unang pagbasa, tingali maghunahuna kita nga nasayop lang ug kabali ang mga pulong nga “gugma” ug “dumot.” Tingali moingon kita nga ang buot ipasabot ni Jesus mao kini: “Ang nagdumot sa iyang kinabuhi mawad-an niini” ug “ang nahigugma sa iyang kinabuhi magtipig niini.” Apan dili kana ang Iyang gisulti. Ang Iyang gisulti mao gayod ang sukwahi.
Kinahanglang sabton nga ang mga pulong nga “gugma” ug “dumot” dinhi wala gamita sa paagi nga kasagarang paggamit nato niini. Niining teksto, gigamit ni Jesus ang pulong nga “gugma” aron ipasabot ang pagkahakog o ang pagpatuyok sa tanan sa kaugalingon. Ug gigamit Niya ang pulong nga “dumot” aron ipasabot ang dili pagkahakog o ang masakripisyohong paghalad sa kaugalingon. Sa laing pagkasulti, ang hakog sa iyang pagkinabuhi mawad-an sa tanan sa kataposan, apan ang tinuod nga dili hakog ug naghalad sa kaugalingon sa iyang pagkinabuhi sa kataposan makaangkon sa tanan.
Kining lawom nga pagtulon-an sa atong Ginoo lisod sabton kon wala ang gasa sa grasya. Ang atong tawhanong pangatarongan lamang mahimong maglisod sa pagsabot nga maayo ang pagkinabuhing dili hakog. Sayon ra alang sa pangatarongan ang paghinapos nga mas maayo gayod nga ipataas nato ang atong kaugalingon labaw sa tanan. Ang atong panghunahuna mahimong mohinapos nga ang kalipay ug ang “maayong kinabuhi” makaplagan sa pag-angkon og bahandi, dungog, gahom ug pagtahod sa tanan. Apan kining hakog ug sa kaugalingon lamang nagtuyok nga pagkinabuhi, bisan pa og madanihon kon tan-awon sa tawhanong panglantaw lamang, mao hinuon ang dalan paingon sa pagkawala sa tanang tinuod nga maayo. Sa kasukwahi, kon tugotan lamang nato ang grasya sa Diyos nga mogiya sa atong tawhanong pangatarongan, makahinapos kita nga ang dili pagkahakog, inay ang pagkahakog, mao ang labing maayo. Ang dili pagkahakog nagpasabot nga ang atong mga mata kanunayng nagtutok sa kaayohan sa uban. Nagpasabot kini nga dili kita magpabilin nga naghunahuna lamang sa atong kaugalingon. Nagpasabot kini nga bug-os kitang mapasaligon sa pag-alagad sa Diyos ug sa atong isigkatawo, bisan unsa pa ang atong isakripisyo. Kinahanglan natong ihatag ang tanan diha sa pag-alagad ug paghigugma sa Diyos, ug mao lamang kana ang paagi nga ang Diyos mohatag balik kanato og labaw pa sa bisan unsa nga atong malaoman.
Si San Lorenzo, nga atong gipasidunggan karong adlawa, usa ka diyakono ug martir sa ikatulong siglo. Kining bantog nga santos literal nga mibiya sa tanan, lakip sa iyang kinabuhi mismo, aron moingon og “Oo” sa Diyos. Isip diyakono sa Simbahang Katedral sa Roma, gitugyan kaniya ang buluhaton sa pag-apod-apod og limos ngadto sa mga kabos nga nanginahanglan. Niadtong Agosto sa tuig 258, ang Emperador nagpagula og usa ka mando nga ang tanang klero kinahanglang patyon. Human patya ang Santo Papa, ilang gipangita si Lorenzo ug, sa wala pa siya patya, gisugo siya nga itugyan ang tanang bahandi sa Simbahan. Nangayo siya og tulo ka adlaw aron tigomon kadtong mga bahandi, ug sulod niadtong tulo ka adlaw, iyang giapod-apod ngadto sa mga kabos ang tanan niyang maapod-apod. Unya, sa ikatulong adlaw, mipaatubang siya sa prepekto ug gidala niya dili ang materyal nga bahandi sa Simbahan kondili ang tinuod nga bahandi niini. Gidala niya ang mga kabos, mga bakol, mga buta ug mga nag-antos, ug mipahayag nga ang Simbahan tinuod gayod nga dato ug nga ang mga tawo nga iyang kauban mao ang tinuod nga mga bahandi sa Simbahan. Sa kasuko, gihukman sa prepekto si Lorenzo nga patyon pinaagi sa pagsunog, ug kinabubut-on kining gidawat ni Lorenzo.
Pamalandongi karong adlawa ang halangdong Kristohanong pagtawag nga imong nadawat: ang pagkinabuhi nga hingpit nga dili hakog ug matinugyanon sa kaugalingon sa tanang paagi. Kon imong mamatikdan nga kasagaran sa imong hunahuna nagpunting lamang sa imong kaugalingon, paningkamoti nga usbon kana nga naandan. Ipunting ang imong mga mata ngadto sa Dios ug sa pag-alagad sa uban. Paningkamoti nga mas hatagan og pagtagad ang mga panginahanglan sa mga tawo sa imong palibot kay sa imong kaugalingong mga kabalaka. Buhata kini kay mao kini ang gipatawag ni Jesus nga atong buhaton, ug kon gitawag kita Niya sa ingon nga kinabuhi nga dili hakog, angay kitang masayod ug motuo nga takos gayod kini sa kataposan.
Ginoo ko nga naghalad sa Imong kaugalingon, tungod sa gugma Imong gihatag ang Imong bililhong kinabuhi alang sa tanan. Ang hingpit nga paghalad sa Imong kinabuhi nagdala og kaluwasan niadtong modawat niining mahimayaong gasa. Tabangi ako nga dili lamang ablihan ang akong kaugalingon sa pagdawat niining Imong gasa nga walay bayad, kondili mosundog usab sa Imong kinabuhi nga dili hakog pinaagi sa pagtugyan sa akong kaugalingon sa pag-alagad Kanimo ug sa uban. San Lorenzo, diyakono ug martir, iampo mo kami. Jesus, misalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Santos sa Adlaw – San Lorenzo, Diyakono ug Martir
Mga Kapilian sa mga Basahon sa Misa
