Agosto 12, 2023
Sabado sa Ikanapulog-walong Semana sa Panahon sulod sa Tuig
Mga Pagbasa alang Karong Adlawa
Santa Jane Frances de Chantal, Relihiyosa—Opsiyonal nga Handumanan
Paminaw sa Iningles
Unya miduol ang mga tinun-an kang Jesus sa dihang sila-sila na lamang ug miingon, “Nganong wala man namo kini mahinginli?” Miingon Siya kanila, “Tungod kay gamay ra ang inyong pagtuo. Sa pagkatinuod, sultihan Ko kamo, kon may pagtuo kamo nga sama kadako sa liso sa mustasa, makaingon kamo niining bukira, ‘Balhin gikan dinhi ngadto didto,’ ug mobalhin kini. Walay imposible alang kaninyo.” Mateo 17:19–20
Usa ka tawo ang miduol kang Jesus, miluhod sa Iyang atubangan ug nangamuyo Kaniya nga ayohon ang iyang anak nga lalaki nga giyawaan. Gipasabot sa tawo nga gisulayan sa mga tinun-an ni Jesus ang paghingilin sa demonyo, apan wala sila makahimo niini. Ang unang tubag ni Jesus sa tawo mao kini, “O kaliwatan nga walay pagtuo ug hiwi, hangtod kanus-a pa man Ako magpabilin uban kaninyo? Hangtod kanus-a pa man Ako mag-antos kaninyo?” Apan dayon gipadala ni Jesus ang bata ngadto Kaniya, ug Iyang gihinginlan ang demonyo.
Ang kinutlo sa ibabaw nagpadayag sa panag-istoryahanay nga dihadiha misunod tali ni Jesus ug sa Iyang mga tinun-an nga wala makahinginli sa demonyo. Tungod sa ilang kakulang sa pagtuo, wala sila makahimo niini. Angayng timan-an nga lig-on ang pagbadlong ni Jesus niining kakulang sa pagtuo aron ipasiugda ang kahinungdanon sa pagbaton og mas putli nga pagtuo.
Tinuod ba nga kon ikaw adunay “pagtuo nga sama kadako sa liso sa mustasa,” makahimo ka sa pagbalhin og bukid? Oo, sa walay duhaduha. Apan kinahanglang sabton pag-ayo kini nga pahayag. Una sa tanan, makabaton lamang kita og “pagtuo” sa unsay anaa sa hunahuna ug kabubut-on sa Diyos. Ang pagtuo mao ang pagtubag sa gisulti sa Diyos kanato. Kita maminaw, mosabot ug motuo. Mao kini ang pagtuo. Ang pagtuo dili lamang ang hilabihang pagtuo sa usa ka butang nga maningkamot kita nga mahitabo kini pinaagi sa atong kaugalingong kabubut-on. Busa, kon tinuod nga buot sa Diyos nga ang usa ka bukid malangkat ug mabalhin, ug gisulti Niya kini kanimo ug gihangyo ka nga buhaton kini, nan kon maminaw ka sa Iyang Tingog ug motubag uban sa hingpit nga pagsalig, mahitabo gayod kini. Apan, siyempre, ang himaya sa Diyos dili matuman pinaagi sa pagbalhin sa usa ka literal nga bukid, busa lagmit kaayo nga dili gayod kini mahitabo pinaagi sa gasa sa pagtuo.
Apan gisulti kini ni Jesus sa Iyang mga tinun-an ug kanato aron pasaligon kita nga kinahanglan kitang maminaw, mosabot ug motuo sa tanan Niyang gisulti. Sa pag-ayo sa batang giyawaan, tin-aw nga kabubut-on sa Diyos nga hinginlan sa mga tinun-an ang demonyo. Apan wala sila motuo ug, busa, wala sila makahimo sa pagpatuman sa kabubut-on sa Diyos pinaagi sa ilang pagtuo.
Mahitungod sa pagbalhin sa mga bukid, kanunay kining mahitabo sa mahulagwayon ug espirituhanong paagi. Sa matag higayon nga ang Dios molihok sa atong kinabuhi sa labaw sa kinaiyahan nga paagi, o gamiton kita sa Dios aron molihok sa kinabuhi sa uban sa labaw sa kinaiyahan nga paagi, labaw pa kaayo sa usa ka “bukid” ang mabalhin. Gikan sa panglantaw sa kahangtoran, unsa man ang mas mahimayaon ug mas makahatag og himaya sa Dios? Ang literal nga pagbalhin sa usa ka bukid? O ang pagbag-o pinaagi sa grasya ug ang pag-usab sa atong kinasuloran pinaagi sa Dios aron makahatag Kaniya og walay kataposang himaya? Ug unsa man ang mas makapahingangha? Ang makahimo sa pagsupak sa mga balaod sa pisika sa paagi nga mahitabo ug mahanaw sa usa lang ka pagpamilok, o ang magamit aron mausab ang kalag sa usa ka tawo alang sa kahangtoran? Sa walay pagduhaduha, ang paggamit sa Dios kanato aron mausab ang kalag sa uban alang sa kahangtoran adunay dili masukod nga mas dakong bili.
Pamalandongi karon ang kahinungdanon sa pagpaminaw sa Tingog sa Dios ug sa pagtubag uban sa hingpit nga pagkamasinugtanon ug gugma. Mao kini ang pagtuo. Unsang “bukid” ang gusto sa Dios nga ibalhin sa imong kinabuhi? Unsang pagbag-o ang gusto Niyang buhaton? Paminaw Kaniya ug tuo sa tibuok mong pagkatawo. Samtang nagbuhat ka niini, ang Dios dili lamang mobuhat og mga butang nga dili mo mahanduraw sa imong kinabuhi, kondili pinaagi kanimo, mobuhat usab Siya og mga butang nga dili mahanduraw sa kinabuhi sa uban.
Ginoo kong Manluluwas, nakabuhat Ka og mga katingalahang butang sa kinabuhi sa daghan kaayong tawo. Gibag-o Mo ang mga kalag ug gihimo silang bag-ong binuhat diha sa Imong kalooy. Palihog, itugyan kanako ang gasa sa pagtuo aron madungog ko ang Imong Tingog ug makatubag uban sa labing dakong pagkamanggihatagon ug pagtuo. Gamita ako, hinigugmang Ginoo, aron mahimo usab akong instrumento sa Imong dili mahanduraw nga grasya sa kinabuhi sa uban. Jesus, misalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Mga Santos sa Adlaw – Santa Jane Frances de Chantal, Relihiyosa
Mga Kapilian sa mga Basahon sa Misa
Gipiling hulagway sa ibabaw: Si Jesus ug ang Senturyon ni Jorge Afonso, pinaagi sa Wikimedia Commons
